અમદાવાદ: રિવરફ્રન્ટ પર જોખમી સ્ટંટ કરતા શખસોનો વીડિયો વાઈરલ, સીટ પર ઊંધા સૂઈને બાઈક હંકારી, પોલીસ તપાસ શરૂ

Ahmedabad News: અમદાવાદના સાબરમતી રિવરફ્રન્ટ પર મોડી રાત્રે કેટલાક શખસો બેફામ વ્હીકલ હંકારીને જાહેર રસ્તાને બાનમાં લીધો હોવાની ઘટના સામે આવી છે. 4થી 5 જેટલા મોપેડ અને બાઇક પર આવેલા આ નબીરાઓએ રસ્તા પર બેફામ આડાઅવળા વાહનો હંકારીને અન્ય વાહનચાલકોનો જીવ જોખમમાં મૂક્યો હતો. એટલું જ નહીં એક યુવકે ચાલુ બાઇકે સીટ પર આડા પડીને સ્ટંટ કર્યો હતો અને તેનો બીજો સાથીદાર અન્ય ટુ વ્હીલર પરથી આ સમગ્ર ઘટનાનો વીડિયો ઉતારી રહ્યો હતો.

ચાલુ બાઇકે સીટ પર ઊંધા સૂઈને સ્ટંટબાજી

માત્ર સોશિયલ મીડિયા પર ફેમ અને વધુ વ્યુ મેળવવાની લ્હાયમાં આ શખસોએ રાહદારીઓની સુરક્ષા જોખમમાં મૂકી દીધી હતી. સ્ટંટબાજીના આ 4થી 5 જેટલા અલગ-અલગ વીડિયો દિવ્યેશ છાંસઠિયા નામના ઇન્સ્ટાગ્રામ એકાઉન્ટ પર અપલોડ કરીને રોલો પાડવાનો પ્રયાસ કરવામાં આવ્યો છે. પોલીસ પકડી ન શકે તે માટે આ શખસોએ ટુવ્હીલરની નંબર પ્લેટ સાથે પણ ચેડાં કર્યા હતા, જેથી સીસીટીવી કે વીડિયોમાં વાહનોના નંબર સ્પષ્ટ રીતે ઓળખી ના શકાય.

આ સ્ટંટના વીડિયો સોશિયલ મીડિયામાં ફરતા થતાં રિવરફ્રન્ટ પર રાત્રિના સમયે થતા પોલીસ પેટ્રોલિંગની કામગીરી સામે સવાલો ઊભા થયા છે. જોકે, ઘટના સામે આવતા ટ્રાફિક પોલીસ સફાળી જાગી છે. M ડિવિઝન ટ્રાફિક પોલીસે આ વાઇરલ વીડિયોના આધારે હાલ તપાસ હાથ ધરી છે અને આ શખ્સોની ઓળખ કરવાની અને સામે કાર્યવાહી કરવા માટે કાર્યવાહી હાથ ધરી છે.