'નીકળ લુખ્ખા, અહીં મારું ચાલશે': બોપલ PSIનો વીડિયો વાઈરલ, SPએ કહ્યું- 'આ એડિટેડ છે'

Ahmedabad Police Controversy: અમદાવાદના બોપલ પોલીસ સ્ટેશનમાં ન્યાય મેળવવા ગયેલા એક યુવક અને પોલીસ અધિકારી વચ્ચે ઉગ્ર બોલાચાલીની ઘટના સામે આવી છે. નિકોલના યુવકને PSIએ ‘લુખ્ખો’ કહીને લોકઅપમાં પૂરવાની ધમકી આપ્યાની ફરિયાદ SPને કરી છે, જ્યારે બીજી તરફ પોલીસે યુવક પર સરકારી કામમાં અવરોધ અને અધૂરો વીડિયો વાઈરલ કરવાનો આક્ષેપ કર્યો છે.

પગની સર્જરી હોવા છતાં PSIએ દાદાગીરી કરી: યુવકનો આક્ષેપ:

મળતી માહિતી અનુસાર, નિકોલ વિસ્તારમાં રહેતો આશિષ કોસ્ટી નામનો યુવક તેના મિત્રની ફરિયાદ લખાવવા બોપલ પોલીસ સ્ટેશન ગયો હતો. આશિષે દાવો કર્યો હતો કે, ''પગમાં સર્જરી કરાવી હોવાથી હું લાંબો સમય ઊભો રહી શકે તેમ નહોતો, તેથી તે પોલીસ સ્ટેશનની બહાર પોતાની ગાડીના બોનેટ પર બેઠો હતો. આ દરમિયાન સાદા કપડામાં રહેલા પોલીસકર્મીએ મને તુકારો આપ્યો હતો. ત્યારબાદ ત્યાં હાજર PSI જયેશ કાલોતરાએ મને કહ્યું અહીં મારું ચાલશે, નીકળ લુખ્ખા..અને નામ લખીને અંદર પૂરી દેવાની ધમકી આપી હતી.'' આ અંગે આશિષે ગ્રામ્ય SP ઓમ પ્રકાશ જાટને લેખિત ફરિયાદ કરી છે.

આ પણ વાંચો: યોગ ગુરુ પ્રદીપે કરોડોની નકલી નોટો બજારમાં ફરતી કરી હતી! ચીન-પાક. દ્વારા આર્થિક આતંકવાદની આશંકા

પોલીસનો વળતો પ્રહાર 

આ ઘટના અંગે બોપલ પોલીસ સ્ટેશનના PIએ પોલીસનો પક્ષ રજૂ કરતા જણાવ્યું હતું કે, ''યુવકે પોલીસ સ્ટેશનના ગેટ પાસે જ ગાડી પાર્ક કરી હતી, જેના કારણે પોલીસની ગાડી નીકળવામાં અડચણ આવતી હતી. જ્યારે તેને ગાડી હટાવવા અને નીચે ઉતરવા કહેવામાં આવ્યું, ત્યારે યુવકે પોલીસ સાથે તું-તાથી વાત કરી હતી અને ઉગ્ર બોલાચાલી કરી હતી. યુવકે જાણીજોઈને પોતાની ભૂલ છુપાવવા માટે મોબાઈલમાં અડધો જ વીડિયો રેકોર્ડ કર્યો અને તેને એડિટ કરીને વાઈરલ કર્યો છે.''

એસપીની પ્રતિક્રિયા

અમદાવાદ રૂરલ એસપી ઓમ પ્રકાશ જાટના જણાવ્યાનુસાર, ''18મી માર્ચે રાત્રે બોપલ પોલીસ સ્ટેશન ખાતે નાઈટ રવાના પ્રક્રિયા ચાલી રહી હતી અને તે સમયે પીએસઆઇ જયેશભાઈ દ્વારા સ્ટાફની હાજરી લેવામાં આવી રહી હતી. આ દરમિયાન એક વ્યક્તિ પોલીસ સ્ટેશનના કેમ્પસમાં પ્રવેશી ત્યાં પાર્ક કરેલી એક ગાડીના બોનેટ ઉપર બેસી ગયો હતો તથા તેની સાથે આવેલા અંદાજે પાંચથી છ વ્યક્તિઓ તેની આસપાસ ભેગા થયા હતા. પોલીસ સ્ટેશનની શિસ્ત અને સુરક્ષાને ધ્યાનમાં રાખીને ફરજ પર રહેલા એક પોલીસ કર્મચારીએ તેને નમ્રતા પૂર્વક આવી રીતે બેસવા માટે મનાઈ કરી હતી. તે છતાં, તે વ્યક્તિએ પોલીસ કર્મચારી સાથે અયોગ્ય અને ઉદ્ધત વર્તન દાખવ્યું. પરિસ્થિતિ ધ્યાનમાં લઈ હાજર પીએસઆઇ જયેશભાઈએ તેને પૂછપરછ કરી કે તેને શું તકલીફ છે. તેના જવાબમાં તે વ્યક્તિએ પોલીસ કર્મચારીની વાણી અંગે અયોગ્ય આક્ષેપો કર્યા.''

"યુવકના પ્રતિભાવમાં પીએસઆઇએ સમજાવ્યું કે પોલીસ સ્ટેશનના કેમ્પસમાં આવી રીતે બેસવું યોગ્ય નથી અને જાહેર સ્થળે શિસ્ત જાળવવી આવશ્યક છે. આ દરમિયાન તે વ્યક્તિએ પોતે પત્રકાર હોવાની ખોટી ઓળખ આપી પોલીસ પર દબાણ લાવવાનો પ્રયાસ કર્યો તથા અસંયમિત ભાષાનો ઉપયોગ કર્યો. વધુમાં, જાણવા મળ્યું છે કે તે સમગ્ર ઘટનાની મોબાઈલમાં રેકોર્ડિંગ કરી હતી, પરંતુ બાદમાં માત્ર પસંદગીના અને કાપકૂપ કરેલો વીડિયો સોશિયલ મીડિયા પર વાઈરલ કરીને પોલીસ વિભાગની ખોટી છબી ઉભી કરવાનો પ્રયાસ કર્યો છે તેમજ સસ્તી અને ખોટી પ્રસિદ્ધિ મેળવવા માટે આ વીડિયો બનાવ્યો."

ઉલ્લેખનીય છે કે, PSI જયેશ કાલોતરા પર જે આક્ષેપો થઈ રહ્યા છે તે મુદ્દે બોપલ PI અને અમદાવાદ ગ્રામ્ય (Rural) SP ઓમપ્રકાશ જાટે દાવો કર્યો છે કે યુવકે વીડિયો એડિટ કરીને વાઈરલ કર્યો છે. આ બાબતે સત્યતા જાણવા માટે 'ગુજરાત સમાચાર ડિજિટલ' દ્વારા પોલીસ પાસે તેમણે પોતે ઉતારેલો, અન્ય કોઈ જવાને શૂટ કરેલો કે પોલીસ સ્ટેશનના CCTV ફૂટેજની માંગણી કરવામાં આવી હતી, જેથી હકીકત સામે લાવી શકાય. જોકે, પોલીસે જણાવ્યું હતું કે આ ઘટના અંગેનો કોઈ વૈકલ્પિક વીડિયો તેમની પાસે ઉપલબ્ધ નથી.