અમદાવાદ: ઝાડ કાપવાના બહાને નવરંગપુરાના બંગલામાં ચોરી કરનાર ગેંગનો પર્દાફાશ, સગીર સહિત ત્રણ ઝડપાયા

Ahmedabad Crime News: અમદાવાદમાં દિવસેને દિવસે વધી રહેલા ચોરીના બનાવો વચ્ચે અમદાવાદ પોલીસે એક મોટી સફળતા મેળવી છે. ઝોન-1 લોકલ ક્રાઈમ બ્રાન્ચ (LCB) અને નવરંગપુરા પોલીસની સર્વેલન્સ ટીમે સંયુક્ત ઓપરેશન હાથ ધરી ઝાડ કાપવાના બહાને ઘરોની રેકી કરી ચોરી કરતી ગેંગના ત્રણ સભ્યોને દબોચી લીધા છે. પકડાયેલા આરોપીઓમાં એક સગીરનો પણ સમાવેશ થાય છે. આ ગેંગે નવરંગપુરાના એક બંગલામાંથી રૂ.11 લાખથી વધુની કિંમતના સોના-ચાંદીના દાગીના અને રોકડ રકમની ચોરી કરી હતી.

પોલીસ સૂત્રોના જણાવ્યા અનુસાર આ ઘટના 24 ઓક્ટોબરના રોજ નવરંગપુરા વિસ્તારમાં આવેલી કમલા સોસાયટી ખાતે બની હતી. ફરિયાદીના બંગલામાં સવારે 10 થી સાંજના 4.30 વાગ્યાની વચ્ચે જ્યારે પરિવાર બહાર હતો, ત્યારે આરોપીઓએ છતનો લાકડાનો દરવાજો તોડી ઘરમાં પ્રવેશ કર્યો હતો અને તિજોરીમાંથી દાગીના અને રોકડ રકમ લઈ ફરાર થઈ ગયા હતા. આ મામલે નવરંગપુરા પોલીસ સ્ટેશનમાં ફરિયાદ નોંધાતા LCB અને નવરંગપુરા પોલીસે અલગ-અલગ ટીમો તપાસ બનાવી તપાસ શરૂ કરવામાં આવી હતી. 

આ પણ વાંચો: અમદાવાદ: 'તાંત્રિક વિધિ કરાવવા પતિ અને સાસરિયાંએ કપડાં ઉતારી માર માર્યો..', પરીણિતાએ કરી પોલીસ ફરિયાદ

પોલીસ ટીમોએ ઘટનાસ્થળની આસપાસના લગભગ 200 જેટલા CCTV કેમેરાના ફૂટેજ ઝીણવટપૂર્વક તપાસ્યા હતા. આ ફૂટેજમાં ઘટનાના સમય દરમિયાન બંગલાની નજીક કેટલાક શંકાસ્પદ ચહેરાઓ કેમેરામાં કેદ થયા હતા. ટેકનિકલ લીડ્સ અને સ્થાનિક બાતમીદારોની મદદથી, પોલીસે આરોપીઓને પીરાણા ક્રોસરોડ પાસેના ગણેશનગર વિસ્તારમાંથી પકડી પાડ્યા હતા.

પકડાયેલા આરોપીઓની ઓળખ પરેશ ઉર્ફે ગગુ સુરેશભાઈ દંતાણી (21 વર્ષ) અને શૈલેષ ઉર્ફે કિશન કનુભાઈ રાવત (28 વર્ષ), બંને ગણેશનગરના રહેવાસી, તરીકે થઈ છે, જ્યારે ત્રીજો સભ્ય કાયદાના સંઘર્ષમાં આવેલો સગીર છે.

પોલીસે તેમની પાસેથી રૂ.9.57 લાખની કિંમતના સોના-ચાંદીના દાગીના, રૂ.1.18 લાખ રોકડા અને રૂ.25,000 ની કિંમતની ઓટોરિક્ષા સહિત કુલ રૂ.11.01 લાખનો મુદ્દામાલ કબજે કર્યો હતો. તપાસમાં બહાર આવ્યું છે કે પરેશ અને શૈલેષ બંને રીઢા ગુનેગાર છે. પરેશ સામે અગાઉ વટવા પોલીસ સ્ટેશનમાં, જ્યારે શૈલેષ સામે 2018 માં નારોલ પોલીસ સ્ટેશનમાં ઘરફોડ ચોરીના ગુના નોંધાયેલા છે.

ચોરીની મોડસ ઓપરેન્ડી

એક વરિષ્ઠ પોલીસ અધિકારીએ જણાવ્યું કે, 'આ ગેંગ ઝાડ કાપનાર તરીકે ઓળખ આપીને સોસાયટીઓમાં ફરતી હતી. તેઓ બંધ મકાનોની રેકી કરતા અને ખાતરી કરતા કે ઘરમાં કોઈ હાજર નથી. ત્યારબાદ દિવસના સમયે જ તેઓ ઓજારો વડે છત કે દરવાજા તોડી ઘરમાં પ્રવેશતા અને ચોરીને અંજામ આપતા.' પોલીસ હાલ આ ગેંગ શહેરની અન્ય વણઉકેલાયેલી ચોરીઓમાં સંડોવાયેલી છે કે કેમ તે દિશામાં વધુ તપાસ કરી રહી છે.