અમદાવાદમાં PCBનો સપાટો: દાસ્તાન સર્કલ નજીક ₹ 1.19 કરોડથી વધુનો વિદેશી દારૂ ભરેલું કન્ટેનર ઝડપાયું

Liquor Bust in Ahmedabad: રાજ્યમાં દારૂબંધીના કડક અમલ વચ્ચે અમદાવાદ શહેર પોલીસની પ્રિવેન્શન ઓફ ક્રાઈમ બ્રાન્ચ (PCB)એ એક મોટી સફળતા મેળવી છે. પીસીબીની ટીમે નિકોલ પોલીસ સ્ટેશન વિસ્તારમાં આવેલા એસ.પી. રિંગરોડ પર દાસ્તાન સર્કલ પાસેથી કન્ટેનર ટ્રકને આંતરીને તેમાંથી 1 કરોડ 19 લાખ રૂપિયાથી વધુની કિંમતનો વિદેશી દારૂનો જથ્થો ઝડપી પાડ્યો હતો. પોલીસે દારૂના જથ્થા અને કન્ટેનર સહિત કુલ 1.34 કરોડ રૂપિયાથી વધુનો મુદ્દામાલ જપ્ત કરી કાયદેસરની કાર્યવાહી હાથ ધરી છે.

ચંદીગઢથી વાયા રાજસ્થાન થઈ બરોડા જવાનો હતો પ્લાન

મળતી માહિતી અનુસાર, PCBને મળેલી ચોક્કસ બાતમીના આધારે આ ઓપરેશન પાર પાડવામાં આવ્યું હતું. તપાસમાં સામે આવ્યું છે કે, આ મોટી કન્ટેનર ટ્રક ચંદીગઢથી વિદેશી દારૂનો જથ્થો ભરીને નીકળી હતી. બૂટલેગરોએ દારૂ ગુજરાતમાં ઘુસાડવા માટે રાજસ્થાનના જયપુર અને ઉદયપુર થઈને ગુજરાતના હિંમતનગર, નાના ચિલોડા અને અમદાવાદનો રૂટ પસંદ કર્યો હતો. આ જથ્થો અમદાવાદ થઈને વડોદરા એક્સપ્રેસ હાઈવે મારફતે વડોદરા તરફ લઈ જવાનો પ્લાન હતો.

બાતમીના આધારે વોચ ગોઠવી ટ્રક ઝડપી લેવાઈ

બૂટલેગરો આ દારૂનો જથ્થો સગેવગે કરે તે પહેલા જ પીસીબીની ટીમે એસ.પી. રિંગરોડ દાસ્તાન સર્કલ પાસે વોચ ગોઠવીને આ કન્ટેનર ટ્રકને રોકી લીધી હતી. કન્ટેનર ખોલીને તપાસ કરતા તેમાંથી મોટા પ્રમાણમાં વિદેશી દારૂની પેટીઓ મળી આવી હતી. પોલીસે ટ્રકચાલક હનુમાન રામ ચૌધરીની સ્થળ પરથી જ અટકાયત કરી લીધી છે અને આ નેટવર્કમાં અન્ય કયા સ્થાનિક બૂટલેગરો સામેલ છે તેની તપાસ શરૂ કરી છે.