અયોધ્યા પ્રવાસે ગયેલા અમદાવાદના જ્વેલર્સનું સીમ કાર્ડ કોઈએ બ્લોક કરાવી નાખ્યું, 84 લાખ ઉપાડી લીધા

SIM Swap Fraud Ahmedabad: અમદાવાદમાં નવરંગપુરા સી.જી. રોડ પર આવેલી એક જાણીતા જ્વેલરી શોપના માલિકનું સીમ કાર્ડ બ્લોક કરાવી, ગઠિયાઓએ ઓટીપી (OTP) મેળવીને 84 લાખ રૂપિયા અલગ-અલગ બેંક ખાતામાં ટ્રાન્સફર કરી છેતરપિંડી આચરી હોવાની ફરિયાદ સાયબર ક્રાઇમ સેલમાં નોંધાઈ છે. આ કેસમાં સૌથી ચોંકાવનારી બાબત એ સામે આવી છે કે, જ્વેલર્સનું સીમ કાર્ડ બ્લોક કરાવનાર વ્યક્તિની વિગતો આપવાનો મોબાઇલ સર્વિસ પ્રોવાઇડરે ઇન્કાર કરી દીધો હતો.

ઉસ્માનપુરાની શિલ્પ પાર્ક સોસાયટીમાં રહેતા ભાગ્યેશ સોની સી.જી. રોડ પર જ્વેલરી શોપ ધરાવે છે. તેમની દુકાનનું બેંક એકાઉન્ટ જે મોબાઇલ નંબર સાથે લિંક હતું, તેના પર આવતા ઓટીપી અને મેસેજના આધારે જ તમામ નાણાંકીય વ્યવહારો થતા હતા. ગત 30મી મેના રોજ ભાગ્યેશભાઇ પરિવાર સાથે અયોધ્યા ફરવા ગયા હતા, ત્યારે અચાનક તેમના મોબાઇલ ફોનનું નેટવર્ક જતું રહ્યું હતું. કોઈ ટેકનિકલ ખામીના કારણે ફોન બંધ થયો હોવાનું માનીને તેઓ જ્યારે અમદાવાદ પરત આવ્યા અને વોડાફોન સ્ટોર પર જઈને તપાસ કરી, ત્યારે જાણવા મળ્યું કે કોઈ અજ્ઞાત વ્યક્તિએ ભાગ્યેશભાઇના નામે સીમ કાર્ડ બંધ કરાવવાની વિનંતી કરીને કાર્ડ બ્લોક કરાવી દીધું હતું.

ત્યારબાદ તે ગઠિયાએ નવું સીમ કાર્ડ મેળવી લીધું હતું. ભાગ્યેશભાઈએ જ્યારે પોતાનું સીમ કાર્ડ બ્લોક કરાવનાર વ્યક્તિની વિગતો માંગી, ત્યારે વોડાફોનના સ્ટાફે આ માહિતી આપવાની ના પાડી દીધી હતી. બીજી તરફ બેંક એકાઉન્ટ ચેક કરતા જાણવા મળ્યું કે, પહેલી અને બીજી જૂનના રોજ ઓટીપી મેળવીને કોઈએ 83.37 લાખ રૂપિયાની રકમ અલગ-અલગ બેંક ખાતામાં ટ્રાન્સફર કરી લીધી હતી. આ અંગે સાયબર ક્રાઇમ સેલે ગુનો નોંધીને ટેકનિકલ એનાલિસિસના આધારે તપાસ શરૂ કરી છે.