Surat News : સુરત પાલિકાની આગામી ચૂંટણીના કારણે સુરતના વિકાસની દિશા પણ બદલાઈ રહી છે, સુરત પાલિકાએ ડુમસ સી ફેઝ પ્રોજેક્ટ લોકપ્રિય બનાવવા અઠવાગેટથી ડુમસનો ડબલ ડેકર બસનો રૂટ જાહેર કર્યો છે. જેમાં જીએસઆરટીસીની ડબલ ડેકર બસનું ટ્રાયલ કરવામાં આવ્યું હતું. જો કે, પાલિકાએ જાહેર કરેલા રૂટના બદલે બીજે બસ દોડાવાતા મતદારો નારાજ થયા છે. આમ, પાલિકાની ચૂંટણીના માહોલ વચ્ચે અચાનક બસનો રૂટ બદલાઈ જતા વિવાદ ઉભો થયો છે. જેને લઈને સુરત પાલિકાની ડબલ ડેકરની ડબલ ગેમ હોવાનું ચર્ચાઈ રહ્યું છે, આ પહેલા ડબલ ડેકરનો રૂટ ડુમસને બદલે કામરેજ અને કોસાડ તરફ ટ્રાયલ કરાતા, મતદારોને લોભાવવા માટે થયુ હોવાની ચર્ચા થઈ રહી છે.
સુરતમાં જાહેર કરાયેલા રૂટના બદલે બીજે બસ દોડાવાતા મતદારો નારાજ!
સુરતમાં મેટ્રો ટ્રાયલ બાદ હવે ડબલ ડેકર બસ ટ્રાયલ પણ રાજકીય રંગમાં રંગાતો દેખાઈ રહ્યો છે. જાહેર થયેલા રૂટ અને વાસ્તવિક ટ્રાયલ રૂટ વચ્ચેનો ફરક શહેરમાં ચર્ચાનો વિષય બન્યો છે. આ પહેલા સુરત પાલિકાએ સુરતીઓના ડુમસ સી ફેઝની મજા ડબલ થાય તે માટે એસી ડબલ ડેકર બસ શરૂ કરવા માટે આયોજન કરાયું હતું.
ડુમસ સી ફેઝ માટે એ.સી. ડબલ ડેકર બસ ખરીદવા તથા ડ્રાઈવર સહિત 10 વર્ષના કોમ્પ્રીહેન્સીવ એન્યુઅલ મેઈન્ટેનન્સ કોન્ટ્રાકટની દરખાસ્ત મંજૂર કરવામાં આવી હતી. જેમાં સુરત પાલિકા ગુજરાત સ્ટેટ રોડ ટ્રાન્સપોર્ટ કોર્પોરેશન દ્વારા બસ ખરીદ કરવા ટેન્ડર મંગાવી સ્વીચ મોબીલીટી ઓટોમેટીવ લિમિટેડ, ચેન્નાઈને વર્ક ઓર્ડર આપવામાં આવ્યો છે. આ બસ ડિસેમ્બર માસમાં આવે તેવી શક્યતા છે.
હાલમાં પાલિકાએ જીએસઆરટીસી પાસે ડબલ ડેકર બસ મંગાવી ટ્રાયલ રૂટ શરૂ કર્યો છે. પાલિકાએ ડુમસ સી ફેઝ લોકપ્રિય બનાવવા માટે એસી ડબલ ડેકર બસ માટેની યોજના જાહેર કરી હતી. પરંતુ જાહેર કરાયેલા ટ્રાયલ રૂટ અઠવાગેટથી ડુમસની જગ્યાએ દિલ્હી ગેટથી કોસાડ અને દિલ્હી ગેટથી કામરેજ પર ટ્રાયલ કરવામાં આવી હતી. પાલિકાએ સુરતીઓને ડુમસ સી ફેઝ સુધી ડબલ ડેકર બસ દોડશે તેવા સપના બતાવ્યા હતા, પણ મતદારોને લોભાવવા ટ્રાયલ રૂટ બદલવામાં આવ્યો હોવાના આક્ષેપ ઉઠ્યા છે.
એક તરફ વિકાસના નામે નવી સુવિધાઓનો દાવો કરવામાં આવે છે, તો બીજી તરફ આવા નિર્ણયો અને ટ્રાયલની પદ્ધતિ રાજકીય ફાયદા માટે હોવાનો આક્ષેપ શહેરમાં ચર્ચાનું કેન્દ્ર બન્યું છે.
