ઉનામાં AAP ઉમેદવારની ધરપકડ, પોતાના પર ફાયરિંગ થયાનું નાટક કરીને સામેવાળાને ફસાવવાનો કર્યો પ્રયાસ, તપાસમાં ભાંડો ફૂટ્યો

Una News: ગીર સોમનાથ જિલ્લાના ઉનામાં સ્થાનિક સ્વરાજ્યની ચૂંટણીઓ પૂર્વે રાજકીય વાતાવરણ ગરમાયું છે. આ દરમિયાન પોલીસને ગેરમાર્ગે દોરવા અને પ્રતિસ્પર્ધીને ગંભીર ગુનામાં ફસાવવા માટે ફાયરિંગનું ખોટું નાટક રચનાર આમ આદમી પાર્ટીના નેતા અજય ભાણાભાઇ બાંભણીયાની ગીર સોમનાથ પોલીસે ધરપકડ કરી છે. જણાવી દઈએ કે, ઉના નગરપાલિકાની ચૂંટણીમાં વોર્ડ નંબર 5 અને 7 ના આમ આદમી પાર્ટીના ઉમેદવાર અને એડવોકેટ અજય બાંભણીયા પર ગત રાત્રે (23 એપ્રિલ) રાત્રે 10 વાગ્યે કથિત ફાયરિંગની ઘટના બની હતી. જો કે પોલીસે પ્રાથમિક દૃષ્ટિએ ફાયરિંગની ઘટના નકારી હતી અને ગઈકાલે રાત્રે જ FLS બોલાવી હતી. FSL તપાસમાં અજય બાંભણીયાના પોતાના પર ફાયરિંગના નાટકનો પર્દાફાશ થયો છે.

શું હતી સમગ્ર ઘટના?

અજય બાંભણીયાએ પોલીસ સમક્ષ એવી રજૂઆત કરી હતી કે, તેઓ જ્યારે પોતાની કાર લઈને જઈ રહ્યા હતા ત્યારે મોટરસાયકલ પર આવેલા બે અજાણ્યા શખ્સોએ તેમની કાર સામે ગોળીબાર કરી તેમની હત્યાનો પ્રયાસ કર્યો હતો. આ ઘટનાને પગલે ઉના પોલીસ અને ઉચ્ચ અધિકારીઓ દ્વારા તાત્કાલિક તપાસના આદેશો આપવામાં આવ્યા હતા.

પોલીસ તપાસમાં ભાંડો ફૂટ્યો

પોલીસ અધિક્ષક જયદીપસિંહ જાડેજાના માર્ગદર્શન હેઠળ ઉના પોલીસ, એલ.સી.બી અને એસ.ઓ.જીની અલગ-અલગ ટીમોએ ટેક્નિકલ અને હ્યુમન સોર્સીસની મદદથી તપાસ હાથ ધરી હતી. તપાસ દરમિયાન FSL અધિકારીઓના રિપોર્ટ અને ટેક્નિકલ પુરાવાઓ પરથી જાણવા મળ્યું કે ફાયરિંગની આ ઘટના તદ્દન બનાવટી હતી.

અજય બાંભણીયાએ આગામી સ્થાનિક સ્વરાજ્યની ચૂંટણી-2026 માં પોતાના પ્રતિસ્પર્ધીને ગંભીર ગુનામાં ખોટી રીતે સંડોવી દેવા અને નુકસાન પહોંચાડવાના આશયથી આ ષડયંત્ર રચ્યું હતું. તેણે પોલીસ સમક્ષ ખોટા પુરાવા ઉભા કર્યા હતા અને પોતાની પાસે ગેરકાયદેસર રીતે જીવતો કારતુસ રાખી પોલીસને ગેરમાર્ગે દોરવાનો પ્રયાસ કર્યો હતો.

આરોપી વિરૂદ્ધ પોલીસે કરી કાયદેસરની કાર્યવાહી

પોલીસે અજય બાંભણીયા વિરુદ્ધ ભારતીય ન્યાય સંહિતા-2023ની કલમ 212, 217, 214 તેમજ આર્મ્સ એક્ટ-1959ની કલમ 3 અને 25(1-એ) મુજબ ગુનો દાખલ કરી તેની ધરપકડ કરી છે.

આરોપીનો ગુનાહિત ઇતિહાસ

પકડાયેલ આરોપી અજય બાંભણીયા અગાઉ પણ ગુનાહિત પ્રવૃત્તિઓમાં સંડોવાયેલો રહ્યો છે. વર્ષ 2007માં ઉના પોલીસ સ્ટેશનમાં તેની સામે આઈ.પી.સી. કલમ 397 (લૂંટ) અને 307 (હત્યાનો પ્રયાસ) હેઠળ ગુનો નોંધાયો હતો.

વર્ષ 2018માં પણ મારામારી અને ધમકી આપવાના ગુનામાં તેની સંડોવણી હતી. આ સમગ્ર કામગીરીમાં ઉના પોલીસ ઇન્સ્પેક્ટર જે.કે. મોરી, એલ.સી.બી. ના એસ.વી. રાજપૂત અને અન્ય પોલીસ સ્ટાફ જોડાયેલો હતો.