જૂનાગઢમાં નાયબ મામલતદાર પર ખુરશી ફેંકી કરી હાથાપાઈ
રજિસ્ટર દસ્તાવેજના સોગંદનામા મુદ્દે માથાકૂટ : ચેમ્બરમાં ઘૂસી ગાળો આપી RTI કરવા તેમજ મારી નાખવા ધમકી આપી ફરજમાં રૂકાવટ
જૂનાગઢ, : જૂનાગઢ શહેર મામલતદાર કચેરીમાં ફરજ બજાવતા નાયબ મામલતદાર સાથે રજીસ્ટર દસ્તાવેજના સોગંદનામા બાબતે એક શખ્સે ઉશ્કેરાઈ જઈ ખુરસી ફેંકી હાથાપાઈ કરી હતી અને ગાળો આપી આરટીઆઈ કરવા ધમકી દઈ ફરજમાં રૂકાવટ કરી હતી. આ અંગે ફરિયાદ થતા બી ડીવીઝન પોલીસે વધુ કાર્યવાહી હાથ ધરી છે.
આ અંગેની વધુ વિગત મુજબ જૂનાગઢના ચોબારી રોડ પર રહેતા અને તાલુકા સેવા સદનમાં ઈ-ધારા કેન્દ્રમાં નાયબ મામલતદાર તરીકે ફરજ બજાવતા ભાર્ગવભાઈ નવનીતભાઈ ધામેચા આજે બપોરે ફરજ પર હતા ત્યારે રવિ ઉર્ફે રવિન્દ્ર પ્રવિણચંદ્ર ચંદેની સાથે કામ કરતા હરેશ હરી કાચા અને રમેશ પોપટ કાપડીયા વેંચાણ દસ્તાવેજની એન્ટ્રી પાડવાની અરજી લઈ આવ્યા હતા. જેની ચકાસણી કરતા ગામ નમૂના નં.૭માં પાણી લેવાના તથા રસ્તાના હક્ક લખાયેલા હતા પરંતુ દસ્તાવેજમાં તેનો કોઈ ઉલ્લેખ ન હતો. આ બાબતે સ્પષ્ટતા કરવા વધારાનું સોગંદનામું રજુ કરવા કહ્યું હતું. હરેશ કાચાને ઓનલાઈન રજીસ્ટર દસ્તાવેજની એન્ટ્રી કરી ફિંગરપ્રિન્ટ આપી કામનો નિકાલ કર્યો હતો. હરેશ કાચાએ તેના શેઠ રવિ ઉર્ફે રવિન્દ્ર ચંદેને ફોન કરી વાત કરી હતી. આથી રવિ ચંદેએ નાયબ મામલતદાર ભાર્ગવભાઈ સાથે વાત કરી હતી. સમજાવવા છતાં રવિ ચંદેએ નાયબ મામલતદાર ભાર્ગવભાઈને ગાળો આપી તેમજ જોઈ લેવા અને આરટીઆઈ કરવા ધમકી આપી હતી. થોડીવાર બાદ રવિ ચંદેએ ચેમ્બર ઘુસી લાકડાની ખુરસી નાયબ મામલતદાર પર ફેંકી મુંઢ ઈજા કરી મારી નાખવા ધમકી આપી ફરજમાં રૂકાવટ કરી હતી. ત્યાં હાજર લોકોએ નાયબ મામલતદારને બચાવ્યા હતા. આ અંગે નાયબ મામલતદાર ભાર્ગવભાઈ ધામેચાએ રવિ ઉર્ફે રવિન્દ્ર પ્રવિણચંદ્ર ચંદે સામે ફરિયાદ કરતા બી ડીવીઝન પોલીસે ફરજમાં રૂકાવટ સહિતની કલમ મુજબ ગુનો દાખલ કરી વધુ કાર્યવાહી હાથ ધરી છે.
