આણંદની અમૂલ ડેરીની ચૂંટણીમાં 9 બેઠક પર 97.48 ટકા મતદાન

- સહેલગાહે લઈ જવાયેલા મતદારોએ બે લક્ઝરી બસમાં સીધા આવી મતદાન કર્યું

- 24 ઉમેદવારોનું ભાવી મતપેટીમાં સીલ : તા. ૧૨મીને શુક્રવારે મતગણતરી : ખંભાત, બોરસદ, કઠલાલ અને કપડવંજ બેઠક ઉપર 100 ટકા મતદાન આણંદ બેઠક ઉપર બે અને પેટલાદ, માતર, નડિયાદમાં એક મતદારે મતદાન ના કર્યું

આણંદની અમૂલ ડેરીની આજે આણંદ અને ખેડા જિલ્લાની ચાર-ચાર બેઠકો તેમજ એક વ્યક્તિગત બેઠકો માટે આણંદની અમૂલ ડેરી ખાતે ચૂંટણી યોજાઈ હતી. ત્યારે સવારે ૯ કલાકે મતદારોએ મતદાન શરૂ કરી દીધું હતું. સવારે ૯થી ૧૧ કલાક દરમિયાન ૮૩૪ પૈકી ૩૧૬ મતદારોએ મતદાન કરતા ૩૭.૯૪ ટકા મતદાન નોંધાયું હતું. જેમાં સૌથી વધુ પેટલાદ બેઠકમાં ૮૯ પૈકી ૫૯ મતદારોનું ૬૬.૨૯ ટકા મતદાન જ્યારે સૌથી ઓછું નડિયાદ બેઠક ઉપર ૧૦૭ પૈકી ૧૦ મતદારોનું ૯.૩૫ ટકા મતદાન થયું હતું. બપોરે ૧ વાગ્યા સુધી બોરસદમાં ૯૩ અને કપડવંજમાં ૧૧૨ મતદારો સાથે બંને બેઠક ઉપર ૧૦૦ ટકા મતદાન થઈ ગયું હતું. બપોરે ૩ કલાક સુધી ૯ બેઠકો ઉપર ૮૩૪ પૈકી ૮૧૩ મતદારો સાથે ૯૭.૪૮ ટકા મતદાન થઈ ગયું હતું. 

મતદાન પ્રક્રિયા પૂર્ણ થઈ ત્યારે ખંભાત, બોરસદ, કઠલાલ અને કપડવંજ બેઠક ઉપર ૧૦૦ ટકા મતદાન થયું છે. આણંદ બેઠક ઉપર ૯૮.૨૦, પેટલાદમાં ૯૮.૮૮, માતરમાં ૯૮.૮૯, નડિયાદમાં ૯૯.૦૭ અને વ્યક્તિગત સભાસદ વિભાગમાં ૩૦.૪૩ ટકા મતદાન નોંધાયું છે. આણંદ બેઠક ઉપર બે તથા પેટલાદ, માતર અને નડિયાદમાં એક મતદારે મતદાન કર્યું ન હતું. 

વ્યક્તિગત સભાસદ વિભાગમાં ૨૩ મતદારો પૈકી ૭ મતદારોએ મતાધિકારનો ઉપયોગ કર્યો હતો. વ્યક્તિગત સભાસદ વિભાગમાં એક મહિલા સભાસદ અને પેટલાદ બેઠક પર વિશ્રામપુરા ડેરીના મતદાર વિદેશથી મતદાન કરવા આવ્યા હતા. જ્યારે ૯ બેઠકો ઉપર કેટલાક વિકલાંગ મતદારો પણ પોતાના મતાધિકારનો ઉપયોગ કરવા આવ્યા હતા.

આણંદ જિલ્લાની પેટલાદ અને બોરસદ બેઠકના મતદારોને નેતાઓ નાણાંના જોરે ખરીદવા નીકળ્યા હોવાના વિવિધ વીડિયો આજે સોશિયલ મીડિયામાં વાયરલ થયા હતા. 

આણંદ અમૂલ ડેરીના નિયામક મંડળની ચૂંટણીમાં દર બે-બે કલાકના આંકડા દર્શાવતું મતદાન પત્રક

અમૂલ ડેરીની ચૂંટણીમાં કઈ બેઠક ઉપર ક્યારે કેટલું મતદાન થયું ?