- નડિયાદમાં લોન અપાવવાના બહાને લાખોનું ફૂલેકું ફેરવતી ફાઈનાન્સ પેઢી
- NX-1 કોમ્પ્લેક્સમાં કાર્યરત પેઢી સામે વીમા પ્રીમિયમ અને ડિપોઝિટના નામે નાણાં પડાવ્યાનો આક્ષેપ પોલીસે અરજી સ્વીકારીને આ કૌભાંડમાં સંડોવાયેલા શખ્સો વિરુદ્ધ તપાસના ચક્રો ગતિમાન કર્યા
સોશિયલ મીડિયા પર લોન સંબંધિત લોભામણી પોસ્ટ જોઈને ગ્રામ્ય વિસ્તારના ભોગ બનનાર લોકો આ કન્સલ્ટન્સી સુધી ખેંચાઈ આવ્યા હતા. સંચાલકોએ વ્યવસ્થિત નેટવર્ક ગોઠવીને વર્તમાનપત્રોમાં પણ જાહેરાતો આપી હતી, જેના કારણે લોકોએ આ સંસ્થાને અધિકૃત માનીને પોતાની મહેનતની બચતના નાણાં ડિપોઝિટ પેટે જમા કરાવી દીધા હતા. આ કન્સલ્ટન્સી દ્વારા સોશિયલ મીડિયા અને વર્તમાનપત્રોમાં આકર્ષક જાહેરાતો આપી લોકોને લોન માટે આકર્ષવામાં આવ્યા હતા. આથક જરૂરિયાત ધરાવતા મધ્યમ અને ગરીબ વર્ગના લોકોએ જ્યારે આ પેઢીનો સંપર્ક કર્યાે ત્યારે શરૂઆતમાં તેમને વિશ્વાસમાં લેવામાં આવ્યા હતા. ત્યારબાદ લોન મંજૂર કરવાના બહાને ફાઈલ ચાર્જ, ડોક્યુમેન્ટ વેરિફિકેશન અને ખાસ કરીને વીમા પ્રીમિયમ પેટે દરેક વ્યક્તિ પાસેથી હજારો રૂપિયા વસૂલવામાં આવ્યા હતા. લાંબો સમય વીતવા છતાં લોન ન મળતા અને ઓફિસ સંચાલકો દ્વારા સંતોષકારક જવાબ ન મળતા આખરે છેતરાયા હોવાનું જણાતા ભોગ બનનારાઓએ પોલીસના દ્વાર ખખડાવ્યા છે. પોલીસે હાલ અરજી સ્વીકારીને આ કૌભાંડમાં સંડોવાયેલા શખ્સો વિરુદ્ધ તપાસના ચક્રો ગતિમાન કર્યા છે.
- વીમા કવચના નામે ઉઘાડી લૂંટ
લોન પાસ કરાવવા માટે વીમો લેવો અનિવાર્ય હોવાનું જણાવીને એજન્ટો દ્વારા અરજદારો પર દબાણ લાવવામાં આવતું હતું. વીમા પ્રીમિયમના નામે લેવામાં આવેલી રકમ કોઈ અધિકૃત કંપનીમાં જમા કરાવવાને બદલે સંચાલકોએ પોતે જ હજમ કરી લીધી હોવાના આક્ષેપો અરજદારો દ્વારા કરવામાં આવ્યા છે.
- રકમ પરત માંગતા ધમકી અને ધક્કા
છેતરાયેલા અરજદારોએ પોતાની ભરેલી રકમ પરત માંગવાનો પ્રયાસ કર્યો ત્યારે ઓફિસ સ્ટાફ દ્વારા ઉદ્ધત વર્તન કરવામાં આવતું હતું, તેવા પણ આક્ષેપો થઈ રહ્યાં છે. વારંવાર ધક્કા ખવડાવીને લોકોને કંટાળી જવા મજબૂર કરવામાં આવ્યા હતા અને અંતે કોઈ રસ્તો ન જણાતા પીડિતોએ પોલીસ મથકે એકઠા થઈને ન્યાયની માંગણી કરી છે.
