વડોદરામાં સેન્ટ્રલ લાઈટિંગ માટે 2 કરોડના ખર્ચે 1100 પોલ ખરીદાશે

- નવા વિસ્તારોમાં તેમજ શહેરમાં સેન્ટ્રલ ડિવાઈડર સાથેના નવા રોડ બનતા પોલની માંગ વધી 

વડોદરા, તા. 02 

વડોદરા મ્યુનિસિપલ કોર્પોરેશનનું નવા નાણાકીય વર્ષ 2022-23નું બજેટ તાજેતરમાં મંજૂર કરવામાં આવ્યું છે. આ બજેટમાં શહેરના નવા મુખ્ય રસ્તાઓ અને કોર્પોરેશનની હદમાં સમાવિષ્ટ નવા વિસ્તારોમાં સેન્ટ્રલ અને સાઈડ લાઇટિંગ ના કામો અંગે આયોજન પણ જાહેર કરાયા છે. કોર્પોરેશન દ્વારા વાર્ષિક ઈજારા થી ૧૦ મીટરની ઊંચાઇ ધરાવતા હોટ ડીપ ગેલ્વેનાઈઝ ક્રોનિકલ પોલ આશરે 2.06 કરોડના ખર્ચે ખરીદવાના છે  આવા આશરે 1100 પોલ ખરીદવાના છે. આ ઇલેક્ટ્રીક પોલ ના ઈજારા માટે ત્રણ વખત ટેન્ડર મંગાવ્યા હતા. સ્ટ્રીટ લાઈટ વિભાગની સેન્ટ્રલ અને સાઈડ લાઈટ ની કામગીરીમાં વધારો થતાં આટલા પોલ ની આવશ્યકતા ઉભી થઇ રહી છે. આ માટે સ્થાયી સમિતિમાં દરખાસ્ત રજૂ થઈ છે. 

પોલની સાથે સાથે જરૂરી 31 લાખના ખર્ચે કેબલો ખરીદવાની દરખાસ્ત સ્ટેન્ડિંગ સમિતિમાં રજૂ કરવામાં આવી છે. કેબલો માટે પણ ત્રણ વખત ટેન્ડર મંગાવ્યા હતા. કોર્પોરેશન મુખ્ય માર્ગો ઉપર સેન્ટ્રલ લાઇટિંગ માટે અંડર ગ્રાઉન્ડ કેબલ ની કામગીરી કરે છે .વડોદરા શહેરની હદમાં નવા વિસ્તારોનો સમાવેશ થતાં અને નવા સેન્ટ્રલ ડિવાઈડર સાથે રોડ બનતા સ્ટ્રીટ લાઈટની સુવિધા માટે પોલની આવશ્યકતા રહે છે. કામગીરી મોટી હોવાથી હજી વધુ સંખ્યામાં પણ પોલ જોઈશે. આ પોલની આવરદા 20 વર્ષની હોય છે. કોર્પોરેશનમાં જેમ બજેટ ઉપલબ્ધ થતું જાય તેમ ઈલેક્ટ્રીક પોલ માટે ફાળવણી કરાતી રહે છે.