ગુજરાતમાં ઉદ્યોગોને મોટી રાહત: GPCBએ CCA રિન્યુઅલની જટિલ પ્રક્રિયા બંધ કરી, હવે ઓનલાઈન ફી ભરીને જ મળશે એક્સ્ટેન્શન

GPCB Ends Complex CCA Renewal Process: ગુજરાત પ્રદૂષણ નિયંત્રણ બોર્ડ (GPCB) દ્વારા રાજ્યના ઉદ્યોગોને મોટી રાહત આપતો એક મહત્ત્વપૂર્ણ નિર્ણય લેવામાં આવ્યો છે. GPCBએ 'Consolidated Consent and Authorization' (CCA)ના રિન્યુઅલની હાલની જટિલ પ્રક્રિયા તાત્કાલિક અસરથી બંધ કરી દીધી છે. તેના બદલે હવે નવી 'CCA એક્સ્ટેન્શન ફી સિસ્ટમ' અમલમાં મૂકવામાં આવી છે.

રાજ્યમાં Ease of Doing Business (EoDB) એટલે કે 'વેપાર-ધંધો કરવાની સરળતા'ને વધુ પ્રોત્સાહન આપવા માટે અને કેન્દ્ર સરકારના પર્યાવરણ મંત્રાલયની નવી માર્ગદર્શિકા મુજબ આ ઓર્ડર જાહેર કરાયો છે.

નવી વ્યવસ્થાથી ઉદ્યોગોને શું ફાયદો થશે?

અલગથી અરજી કરવાની જરૂર નહીં: જે ઉદ્યોગો પાસે પહેલેથી જ માન્ય (Valid) CCA છે, તેમણે હવે રિન્યુઅલ માટે નવી લાંબી અરજીઓ કરવી પડશે નહીં.

ઓનલાઈન ફી ભરી શકાશે: ઉદ્યોગકારોએ માત્ર XGN Portal પર જઈને ઓનલાઈન નિયત 'એક્સ્ટેન્શન ફી' જમા કરાવવાની રહેશે.
પહોંચ પત્ર મળશે: ફી ભર્યા બાદ GPCB દ્વારા એક 'એક્સ્ટેન્શન ફી પેમેન્ટ એક્નોલેજમેન્ટ લેટર' આપવામાં આવશે, જેમાં હવે પછીની ફી ક્યારે ભરવાની રહેશે તેની તારીખ પણ દર્શાવવામાં આવશે.

શરતો અને સુધારા માટેના નિયમો

સુધારા (Amendment) ની પ્રક્રિયા યથાવત: જો કોઈ ઉદ્યોગે CCA માં કોઈ સુધારો કે ફેરફાર કરવાનો હશે, તો હાલની CTE/CCA Amendment પ્રક્રિયા મુજબ જ અલગથી અરજી કરવાની રહેશે.

નિયમભંગ પર કડક કાર્યવાહી: જો કોઈ ઉદ્યોગ નિયમોનું ઉલ્લંઘન કરશે, એક્સ્ટેન્શન ફી કે અન્ય દંડ સમયસર નહીં ભરે, તો GPCB તેનો CCA રદ અથવા સસ્પેન્ડ કરી શકશે.

બોર્ડે સ્પષ્ટ કર્યું છે કે આ નવો ઓર્ડર તાત્કાલિક અસરથી લાગુ થઈ ગયો છે અને અગાઉના રિન્યુઅલ સંબંધિત તમામ જૂના પરિપત્રો રદબાતલ કરવામાં આવ્યા છે.