બોલિવૂડની એ કલ્ટ ક્લાસિક ફિલ્મ, જે શેક્સપિયરના 400 વર્ષ જૂના નાટક પરથી બની અને જીત્યા અનેક ઍવોર્ડ્સ!

Story of Omkara: હિન્દી સિનેમામાં અનેક એવી વાર્તાઓ જોવા મળે છે, જેનો અંત દર્શકોને આશ્ચર્યચકિત કરી દે છે. આજે આપણે જે વાર્તાની વાત કરી રહ્યા છીએ, તે લગભગ 400 વર્ષ પહેલાં લખવામાં આવી હતી, જેને બાદમાં દેશી અંદાજ આપીને બોલિવૂડની એક કલ્ટ ક્લાસિક ફિલ્મમાં બદલી નાખવામાં આવી હતી.
ફિલ્મ જોતી વખતે ભાગ્યે જ કોઈ દર્શકને એ વાતનો અહેસાસ થયો હશે કે મોટા પડદા પર તેઓ જે વાર્તા જોઈ રહ્યા છે, તે 400 વર્ષ જૂની છે. દમદાર પાત્રો, દેશી ભાષા, રાજકારણ, ગુનાખોરી અને સંબંધોની ગૂંચવણો સાથે લખાયેલી આ વાર્તાએ સૌના દિલ જીતી લીધા હતા. આ ફિલ્મની સૌથી મોટી ખાસિયત એ હતી કે તેના મેકર્સે જૂની વાર્તાની બેઠ્ઠી કોપી કરવાને બદલે, તેને ભારતીય અંદાજ, લોકલ રાજકારણ અને ઉત્તર પ્રદેશની સંસ્કૃતિમાં એવી રીતે ઢાળી દીધી કે તે એકદમ આપણી પોતાની જ વાર્તા લાગવા માંડી. ફિલ્મમાં પ્રેમ, વિશ્વાસ, દગો, સત્તાની ભૂખ અને બદલાની ભાવનાને જે રીતે દર્શાવવામાં આવી, તેણે તેને એક સામાન્ય ક્રાઇમ ડ્રામાથી ઘણે આગળ પહોંચાડી દીધી.
જો તમે હજુ પણ અંદાજ નથી લગાવી શક્યા, તો જણાવી દઈએ કે આ ફિલ્મ બીજું કોઈ નહીં, પરંતુ વર્ષ 2006માં રીલિઝ થયેલી કલ્ટ ક્લાસિક ફિલ્મ ‘ઓમકારા' છે. ડિરેક્ટર વિશાળ ભારદ્વાજે આ ફિલ્મ પ્રખ્યાત અંગ્રેજી લેખક વિલિયમ શેક્સપિયરના લોકપ્રિય નાટક 'ઓથેલો'થી પ્રેરિત થઈને બનાવી હતી. આ માત્ર રિમેક નહોતી, પણ એક એવું ભારતીય એડપ્ટેશન હતું જેણે ઓરિજિનલ સ્ટોરીને પૂરી રીતે દેશી રંગમાં રંગી દીધી. ઉત્તર પ્રદેશના મેરઠ અને તેની આસપાસના રાજકીય માહોલમાં વણાયેલો તેનો દરેક સીન અને દરેક પાત્ર રિયલ લાગતું હતું.
ફિલ્મની દમદાર સ્ટારકાસ્ટ
'ઓમકારા'ની સ્ટારકાસ્ટ જ તેની સૌથી મોટી તાકાત સાબિત થઈ હતી:

• અજય દેવગન: ઓમકારા શુક્લાના લીડ રોલમાં શાનદાર એક્ટિંગ.
• કરીના કપૂર ખાન: ડોલી મિશ્રાનું માસૂમ અને મજબૂત પાત્ર હતું.
• વિવેક ઓબેરોય: કેસુ ફિરંગીની ભૂમિકા ભજવી હતી.
• કોંકણા સેન શર્મા: ઇન્દુના અત્યંત પ્રભાવશાળી કિરદારમાં જોવા મળી હતી.
• બિપાશા બાસુ: બિલ્લો બનીને ફિલ્મમાં ગ્લેમરનો તડકો લગાવ્યો હતો.

જોકે, સૌથી વધુ લાઈમલાઈટ સૈફ અલી ખાન લૂંટી ગયો હતો. તેણે 'લંગડા ત્યાગી' બનીને પોતાની કરિયરનું સૌથી દમદાર પરફોર્મન્સ આપ્યું, જેનું નેગેટિવ પાત્ર આજે પણ બોલિવૂડના સૌથી યાદગાર વિલન તરીકે ઓળખાય છે.
ધુરંધરોનું યોગદાન અને સંગીતનો જાદુ
વર્ષ 2006માં રિલીઝ થયેલી આ ફિલ્મને માત્ર દર્શકોએ જ નહીં, પણ ક્રિટિક્સે પણ ખૂબ વખાણી હતી. વિશાળ ભારદ્વાજનું ડિરેક્શન, શાનદાર સ્ક્રીનપ્લે, યુપીની લોકલ ભાષામાં લખાયેલા ડાયલોગ્સ અને મ્યુઝિકની ભારે પ્રશંસા થઈ હતી. ગુલઝાર સાહેબે લખેલા ગીતો અને વિશાળ ભારદ્વાજનું સંગીત ફિલ્મની સૌથી મોટી ખૂબીઓમાંથી એક હતું.
ફિલ્મને મળ્યા ઢગલાબંધ એવોર્ડ્સ
'ઓમકારા' એ નેશનલ અને ઇન્ટરનેશનલ બંને સ્તરે પોતાની એક અલગ ઓળખ બનાવી હતી:

• નેશનલ એવોર્ડ્સ: 54મા નેશનલ ફિલ્મ એવોર્ડ્સમાં ફિલ્મે 3 મોટા એવોર્ડ્સ પોતાના નામે કર્યા હતા (જેમાં કોંકણા સેન શર્માને બેસ્ટ કો-એક્ટ્રેસનો એવોર્ડ મળ્યો હતો).
• ફિલ્મફેર એવોર્ડ્સ: 52મા ફિલ્મફેર એવોર્ડ્સમાં ફિલ્મને કુલ 19 કેટેગરીમાં નોમિનેશન મળ્યું અને 9 એવોર્ડ જીતીને રેકોર્ડ બનાવ્યો.
• સૈફ અલી ખાનને 'લંગડા ત્યાગી' માટે બેસ્ટ વિલન અને કરીના કપૂર ખાનને ક્રિટિક્સ ચોઈસ બેસ્ટ એક્ટ્રેસનો એવોર્ડ મળ્યો હતો.
• આંતરરાષ્ટ્રીય સન્માન: આ ફિલ્મને વર્ષ 2006ના પ્રતિષ્ઠિત કાન્સ ફિલ્મ ફેસ્ટિવલના 'Marché du Film' સેક્શનમાં પણ રજૂ કરવામાં આવી હતી, જેનાથી તેને વૈશ્વિક સ્તરે મોટી નામના મળી હતી.