ટોક્સિકની તારીખ બદલાતાં વરુણની ફિલ્મના નિર્માતા નારાજ

- રમેશ તૌરાણીનો રોષઃઅમને વિશ્વાસમાં નથી લેવાયા

- ટોક્સિકની કારણે વરુણ ધવનની  હૈ જવાની તો ઈશ્ક હોના હી થા પર સંકટનાં વાદળો

મુંબઇ : રણવીરની 'ધુરંધર ટુ' સાથે ટક્કર ટાળવા માટે યશની 'ટોક્સિક'ની રીલિઝ ડેટ પાછળ ઠેલીને ચોથી જૂન  નક્કી કરવામાં આવી છે. પરંતુ, તેના કારણે વરુણ ધવનની ફિલ્મ 'હૈ  જવાની તો ઈશ્ક હોના હી થા'ના નિર્માતા રમેશ તૌરાણી નારાજ થઈ ગયા છે. આ ફિલ્મની  રીલિઝ ડેટ અગાઉથી  ચોથી જૂન નક્કી થઈ ગઈ છે.

 હવે 'ટોક્સિક' સામે વરુણ ધવનની ફિલ્મ ટિકિટબારી પર પહેલા જ દિવસથી દમ તોડી શકે છે એ નિશ્ચિત છે. 

આ સંજોગોમાં આ ફિલ્મની રીલિઝ પણ આઘીપાછી કરવી પડે તેવી શક્યતા છે. 

કેહેવાય છે કે રમેશ તૌરાણીએ 'ટોક્સિક'ની તારીખ બદલીને ચોથી જૂન કરતી વખતે પોતાને વિશ્વાસમાં ન લેવાયા હોવા બાબતે બળાપો પણ વ્યક્ત  કર્યો છે. 

તેમના જણાવ્યા અનુસાર સામાન્ય શિરસ્તો છે કે જ્યારે એક નિર્માતા પોતાની રીલિઝ ડેટ નક્કી કરે ત્યારે તે તારીખે અગાઉથી જ રીલિઝ ઘોષિત કરી ચૂકેલા નિર્માતાને વિશ્વાસમાં લેતા હોય છે. પરંતુ, આ કિસ્સામાં આવું બન્યું નથી. 

બીજી  તરફ 'ટોક્સિક'ની ટીમના દાવા પ્રમાણે તેમના દ્વારા અગાઉથી જ રમેશ તૌરાણીને નવી  તારીખ અંગે જાણ કરી દેવામાં આવી  હતી.