જાણીતા અભિનેતા મુશ્તાક ખાનનું નિધન: 'વેલકમ' ફિલ્મના 'બલ્લૂ' તરીકે બનાવી હતી ખાસ ઓળખ

Mushtaq Khan Passes Away : 'મેરી એક ટાંગ નકલી હૈ, મૈં હૉકી કા બહોત બડા ખિલાડી થા…' અક્ષય કુમારની લોકપ્રિય ફિલ્મ 'વેલકમ'નો આ ડાયલોગ સાંભળતાં જ જે ચહેરો સામે આવે છે તે જાણીતા અભિનેતા મુશ્તાક ખાન હવે આપણી વચ્ચે નથી રહ્યા. લાંબી માંદગી બાદ તેમણે 24 સપ્ટેમ્બરના રોજ અંતિમ શ્વાસ લીધા હતા. તેમના નિધનથી બોલિવૂડ અને ટેલિવિઝન જગતમાં ઊંડા શોકની લાગણી ફેલાઈ ગઈ છે.

સુનીલ પાલે આપી નિધનની માહિતી

મુશ્તાક ખાનના નજીકના મિત્ર અને જાણીતા કોમેડિયન સુનીલ પાલે તેમના નિધનની પુષ્ટિ કરી છે. સુનીલ પાલના જણાવ્યા અનુસાર, મુશ્તાક ખાન લાંબા સમયથી કેન્સર જેવી ગંભીર બીમારી સામે ઝઝૂમી રહ્યા હતા. તેઓ કેન્સરના છેલ્લા સ્ટેજમાં હતા અને તેમની તબિયત સતત નાજુક બની રહી હતી. મુંબઈની નાણાવટી હોસ્પિટલમાં તેમની સારવાર ચાલી રહી હતી, જ્યાં તેમણે અંતિમ શ્વાસ લીધા.

સંઘર્ષના દિવસો: ફૂટપાથ અને રેલવે સ્ટેશન પર રાતો વિતાવી

મુશ્તાક ખાનનો જન્મ 31 ડિસેમ્બર 1959ના રોજ મધ્ય પ્રદેશના બાલાઘાટમાં થયો હતો. બાળપણમાં રામલીલા અને પછી કોલેજના નાટકોમાં અભિનય કરીને તેમણે કલાક્ષેત્રે ઓળખ બનાવી હતી. જોકે, જ્યારે તેઓ અભિનેતા બનવાનું સપનું લઈને મુંબઈ પહોંચ્યા ત્યારે શરૂઆતના દિવસો ભારે સંઘર્ષપૂર્ણ રહ્યા હતા. રહેવા માટે કોઈ છત ન હોવાથી તેઓ ફૂટપાથ અને રેલવે સ્ટેશન પર રાતો વિતાવતા હતા. દિવસભર કામની શોધમાં ભટક્યા પછી પણ તેમને માત્ર નકારો મળતો હતો.

આ રીતે શરૂ થઈ ફિલ્મી સફર

મુશ્તાક ખાને મુંબઈમાં થિયેટર સાથે જોડાઈને નાટકોમાં કામ કરવાનું શરૂ કર્યું. એક નાટક દરમિયાન જાણીતા ફિલ્મ નિર્માતા ઇસ્માઇલ શ્રોફની નજર તેમના અભિનય પર પડી. તેમના કામથી પ્રભાવિત થઈને ઇસ્માઇલ શ્રોફે તેમને ફિલ્મ 'થોડી સી બેવફાઈ'માં કામ કરવાની તક આપી અને આ રીતે તેમની ફિલ્મી સફર શરૂ થઈ. ત્યારબાદ પ્રખ્યાત લેખક સલીમ ખાને તેમની મુલાકાત દિગ્દર્શક મહેશ ભટ્ટ સાથે કરાવી હતી. મહેશ ભટ્ટ તેમના અભિનયથી એટલા ખુશ થયા કે તેમણે પોતાની ફિલ્મ 'કબ્ઝા' સહિત લગભગ દરેક આગામી ફિલ્મમાં તેમને રોલ આપ્યો.

સેંકડો ફિલ્મો અને સીરિયલ્સમાં યાદગાર અભિનય

તેમણે પોતાના લાંબા કરિયરમાં 'વેલકમ', 'સડક', 'દિલ હૈ કિ માનતા નહીં', 'સાથી', 'આશિકી', 'જુનૂન', 'ગુમરાહ', 'ગોપી કિશન', 'રાજા', 'ગદર', 'ક્રાંતિવીર', 'હમ હૈં રાહી પ્યાર કે', 'નારાઝ' અને 'સર' જેવી સેંકડો ફિલ્મોમાં નાના પણ ખૂબ જ મહત્વના પાત્રો ભજવ્યા. આ ઉપરાંત તેઓ 'અદાલત', 'ભારત એક ખોજ' અને 'વાગલે કી દુનિયા' જેવા પ્રખ્યાત ટેલિવિઝન શોમાં પણ જોવા મળ્યા હતા.

'વેલકમ' ફિલ્મનો 'બલ્લૂ' અને અમર ડાયલોગ

વર્ષ 2007માં રિલીઝ થયેલી ફિલ્મ 'વેલકમ' તેમના કરિયરની સૌથી યાદગાર ફિલ્મ સાબિત થઈ. આ ફિલ્મમાં તેમણે નાના પાટેકરની ગેંગના ગુંડા 'બલ્લૂ'નું પાત્ર ભજવ્યું હતું. ફિલ્મમાં તેમનો એક જ ડાયલોગ હતો, પરંતુ પોતાના શાનદાર અભિનયથી તેમણે આ ડાયલોગને દરેક ઘરમાં જાણીતો બનાવી દીધો. આજે પણ સોશિયલ મીડિયા પર તેમના આ ડાયલોગ પર અસંખ્ય મીમ્સ બને છે, જે હંમેશા દર્શકોના દિલમાં તેમની યાદ તાજી રાખશે.