નવ વર્ષ બાદ સેન્સર બોર્ડની કમિટીમાં ભારેભરખમ બદલાવ: પ્રીતિ ઝિન્ટા, પંકજ ત્રિપાઠી, સુનીલ શેટ્ટી સહિતના દિગ્ગજો સામેલ, જુઓ સંપૂર્ણ યાદી

CBFC Gets New 18-Member Panel: કેન્દ્રીય માહિતી અને પ્રસારણ મંત્રાલય દ્વારા સેન્ટ્રલ બોર્ડ ઓફ ફિલ્મ સર્ટિફિકેશન (CBFC)ની પુનઃરચના કરવામાં આવી છે. કેન્દ્ર સરકારે સિનેમેટોગ્રાફ એક્ટ, 1952ની કલમ 3(1) અને સિનેમેટોગ્રાફ (સર્ટિફિકેશન) રૂલ્સ, 2024ના નિયમ 3 હેઠળ મળેલી સત્તાનો ઉપયોગ કરીને 18 સભ્યોની નવી બોર્ડ પેનલની રચના કરી છે. આ નવું બોર્ડ ત્રણ વર્ષની મુદત માટે અથવા કેન્દ્ર સરકારના આગામી આદેશ સુધી કાર્યરત રહેશે. ભારતમાં ફિલ્મોના સર્ટિફિકેશન અને સેન્સરશિપને લઈને ચાલી રહેલા લાંબા વિવાદો વચ્ચે આ મોટો ફેરફાર કરવામાં આવ્યો છે.

સિનેમા, ટેલિવિઝન અને સંગીત જગતના જાણીતા ચહેરાઓ સામેલ

પુનર્ગઠિત સમિતિમાં ભારતીય ફિલ્મ, ટેલિવિઝન, સંગીત અને થિયેટર જગતની અનેક નામાંકિત હસ્તીઓને સ્થાન આપવામાં આવ્યું છે. બોર્ડમાં સામેલ તમામ 18 સભ્યોની સંપૂર્ણ યાદી નીચે મુજબ છે:

1. પ્રીતિ ઝિન્ટા – જાણીતી બોલિવૂડ અભિનેત્રી
2. પંકજ ત્રિપાઠી – રાષ્ટ્રીય પુરસ્કાર વિજેતા અભિનેતા
3. સુનીલ શેટ્ટી – બોલિવૂડ અભિનેતા અને નિર્માતા
4. પ્રસેનજીત ચેટર્જી – બંગાળી સિનેમાના દિગ્ગજ અભિનેતા
5. મનોજ જોશી – પીઢ ગુજરાતી અને હિન્દી સિનેમા/થિયેટર અભિનેતા
6. રૂપાલી ગાંગુલી – લોકપ્રિય ટેલિવિઝન અભિનેત્રી ('અનુપમા' ફેમ)
7. પલ્લવી જોશી – રાષ્ટ્રીય પુરસ્કાર વિજેતા અભિનેત્રી અને ફિલ્મ નિર્માતા
8. પ્રિયદર્શન – પ્રખ્યાત ફિલ્મ નિર્દેશક
9. રિકી કેજ – ત્રણ વખત ગ્રેમી એવોર્ડ વિજેતા સંગીતકાર
10. હંસરાજ હંસ – જાણીતા ગાયક અને પૂર્વ સાંસદ
11. અભિષેક જૈન – જાણીતા ગુજરાતી ફિલ્મ નિર્દેશક
12. નીલા માધવ પાંડા – જાણીતા ફિલ્મમેકર
13. સુપ્રિયા યાર્લાગડ્ડા – તેલુગુ ફિલ્મ નિર્માતા
14. વિનોદ અનુપમ – રાષ્ટ્રીય પુરસ્કાર વિજેતા ફિલ્મ વિવેચક
15. યતીન્દ્ર મિશ્રા – કવિ, લેખક અને સાંસ્કૃતિક વિદ્વાન
16. નિશિગંધા વાડ – મરાઠી અભિનેત્રી અને લેખિકા
17. વામન કેન્દ્રે – થિયેટર ડિરેક્ટર (ગત બોર્ડમાંથી યથાવત)
18. રમેશ પતંગે – વરિષ્ઠ લેખક (ગત બોર્ડમાંથી યથાવત)

CBFC ચીફના પદ પર કોઈ ફેરફાર નહીં

બોર્ડના 18 સભ્યોની પુનઃરચના કરવામાં આવી હોવા છતાં સેન્સર બોર્ડના અધ્યક્ષ પદ પર કોઈ ફેરફાર કરાયો નથી. શશિ શેખર વેમ્પતિ બોર્ડના ચેરપર્સન તરીકે યથાવત રહેશે. તેમણે મે 2026 માં પ્રસુન જોશીના સ્થાને આ જવાબદારી સંભાળી હતી. CBFCના વડા બનતા પહેલાં વેમ્પતિ વર્ષ 2017થી 2022 દરમિયાન પ્રસાર ભારતીના CEO રહી ચૂક્યા છે, જ્યારે પૂર્વ સેન્સર બોર્ડ ચીફ પ્રસુન જોશી હાલ પ્રસાર ભારતીના ચેરમેન તરીકે સેવા આપી રહ્યા છે.

સર્ટિફિકેશન અને વિવાદો વચ્ચે પુનઃરચના

આ ફેરફાર એવા સમયે આવ્યો છે જ્યારે ભારતમાં સેન્સરશિપ અને કટ્સને લઈને ભારે હોબાળો મચ્યો હતો. તાજેતરમાં દિલજીત દોસાંજ અભિનીત ફિલ્મ ‘સતલજ’ (પહેલાંનું શીર્ષક ‘પંજાબ 95’)નો કેસ ચર્ચામાં રહ્યો હતો. વર્ષ 2022માં CBFC સમક્ષ સબમિટ કરાયેલી આ ફિલ્મ લગભગ ત્રણ વર્ષ સુધી અટવાયેલી રહી હતી. નિર્માતાઓએ આક્ષેપ કર્યો હતો કે બોર્ડે ફિલ્મમાં 127 કટ્સ સૂચવ્યા હતા. આખરે જુલાઈમાં કોઈ કટ્સ વિના આ ફિલ્મ 'સતલજ' નામે OTT પ્લેટફોર્મ પર રિલીઝ થઈ હતી, પરંતુ ભારતમાં રિલીઝના માત્ર 48 કલાકની અંદર તેને પ્લેટફોર્મ પરથી હટાવી દેવામાં આવી હતી. આ અગાઉ 2017માં બોર્ડની રચના થઈ હતી, જે બાદ નવ વર્ષે આ સંપૂર્ણ નવું 18 સભ્યોનું પેનલ કાર્યભાર સંભાળશે.