'મે એને ગોળી મારી દીધી હોત...', અમિતાભ બચ્ચન આતંકી કસાબનું નામ સાંભળી ભડક્યાં!

Big B Threatens Terrorist Kasab: ટેલિવિઝનના લોકપ્રિય ક્વિઝ શો 'કૌન બનેગા કરોડપતિ 18'નો લેટેસ્ટ એપિસોડ ભારે ચર્ચામાં આવ્યો છે. 'પ્રહાર: ધ અનટોલ્ડ સ્ટોરી ઓફ ઉજ્જવલ નિકમ' નામના આ વિશેષ એપિસોડમાં જાણીતા પબ્લિક પ્રોસિક્યુટર ઉજ્જવલ નિકમ હોટ સીટ પર પહોંચ્યા હતા, જ્યાં તેમની સાથે અભિનેતા રાજકુમાર રાવ અને વામિકા ગબ્બી પણ સ્પેશિયલ ગેસ્ટ તરીકે જોડાયા હતા. વાતચીત દરમિયાન 26/11 મુંબઈ આતંકવાદી હુમલા અને તેના પછી કોર્ટમાં ચાલેલી કાનૂની સુનાવણી સંબંધિત અનેક અજાણી બાબતોનો ખુલાસો થયો હતો.

કસાબને ફાંસી આપવામાં કેમ લાગ્યા 4 વર્ષ?

ચર્ચા દરમિયાન શોના હોસ્ટ અમિતાભ બચ્ચને ઉજ્જવલ નિકમને પૂછ્યું કે પાકિસ્તાની આતંકવાદી અજમલ કસાબને ફાંસી આપવા માટે અદાલતમાં લગભગ ચાર વર્ષ જેટલો લાંબો સમય કેમ લાગ્યો. બિગ બીએ આક્રોશ વ્યક્ત કરતાં કહ્યું કે, "તેને તો ત્યાં જ દાટી દેવો જોઈતો હતો. આટલો બધો સમય કેમ લાગ્યો?"
જવાબમાં ઉજ્જવલ નિકમે જણાવ્યું કે કસાબ જ્યારે કોર્ટમાં આવ્યો ત્યારે તે તેમને ઘૂરી રહ્યો હતો અને નિકમ પણ તેને જોઈ રહ્યા હતા. નિકમે જણાવ્યું કે કસાબે શરૂઆતથી જ પોતાની ઓળખ અને ધરપકડને લઈને તપાસ એજન્સીઓ તથા અદાલતને ગેરમાર્ગે દોરવાના પૂરતા પ્રયાસ કર્યા હતા.

કસાબે કહ્યું—'હું અમિતાભ બચ્ચનને મળવા આવ્યો હતો'

ઉજ્જવલ નિકમે ખુલાસો કર્યો કે કસાબે શરૂઆતમાં દાવો કર્યો હતો કે તેને 26/11ના હુમલા વખતે નહીં, પરંતુ 6 નવેમ્બરે જુહુ ચોપાટી પરથી પકડવામાં આવ્યો હતો. નિકમે બિગ બીને કહ્યું કે,

"તમને જાણીને આશ્ચર્ય થશે, તેણે આગળ એવો દાવો કર્યો હતો કે તે તો અમિતાભજીને જોવા અને મળવા માટે મુંબઈ આવ્યો હતો. વાસ્તવમાં આવું બન્યું હતું."

આ સાંભળતાં જ અમિતાભ બચ્ચને અત્યંત આકરો અને તીખો પલટવાર કરતાં કહ્યું:

"ના-ના સર, જો તે આવ્યો હોત તો તે અમારા ઘરેથી જીવતો પાછો જવાનો નહોતો. ત્યાં જ અમે તેને ગોળી મારી દીધી હોત."

સગીર હોવાનો દાવો કરી ઉભો કર્યો હતો કાનૂની અવરોધ

ઉજ્જવલ નિકમે સુનાવણી દરમિયાન કસાબ દ્વારા કરવામાં આવેલા વિવિધ કાવાદાવાઓનો ઉલ્લેખ કર્યો હતો. કસાબે પોતાને સગીર જાહેર કર્યો હતો અને એવો દાવો કર્યો હતો કે તેની ધરપકડ ‘રો' દ્વારા કરવામાં આવી છે. કાયદા અનુસાર કોઈપણ આતંકી સામે ટ્રાયલ આગળ વધારતાં પહેલાં તેની વાસ્તવિક ઉંમર સાબિત કરવી અનિવાર્ય બની ગઈ હતી, જેના લીધે આ કાનૂની પ્રક્રિયામાં સમય લાગ્યો હતો.