દલાઈ લામાને 90 વર્ષની વયે ‘ગ્રેમી ઍવૉર્ડ’; બેસ્ટ ઓડિયો બુક, નેરેશન અને સ્ટોરી ટેલિંગ શ્રેણીમાં વિજેતા

Dalai Lama Wins Grammy at 90 for Best Audio Book and Spoken Word Album : તિબેટના આધ્યાત્મિક ગુરુ દલાઈ લામાએ 90 વર્ષની વયે એક નવી ઐતિહાસિક સિદ્ધિ હાંસલ કરી છે. સંગીત જગતના સૌથી પ્રતિષ્ઠિત ગણાતા 68મા 'ગ્રેમી એવોર્ડ્સ'માં દલાઈ લામાને તેમના સ્પૉકન વર્ડ આલ્બમ 'Meditations: The Reflections of His Holiness the Dalai Lama' માટે 'બેસ્ટ ઓડિયો બુક, નેરેશન અને સ્ટોરીટેલિંગ રેકોર્ડિંગ' શ્રેણીમાં વિજેતા જાહેર કરવામાં આવ્યા છે.

આ મારી વ્યક્તિગત સિદ્ધિ નથીઃ દલાઈ લામા

આ અંગે દલાઈ લામાએ જણાવ્યું હતું કે, ‘હું આ સન્માનને કૃતજ્ઞતા અને નમ્રતા સાથે સ્વીકારું છું. હું આને વ્યક્તિગત સિદ્ધિ તરીકે નથી જોતો, પરંતુ આ આપણી સહિયારી વૈશ્વિક જવાબદારીની સ્વીકૃતિ છે. મારું માનવું છે કે 8 અબજ માનવીઓના સામૂહિક કલ્યાણ માટે શાંતિ, કરુણા, પર્યાવરણની સંભાળ અને માનવતાની એકતાની ભાવના અનિવાર્ય છે. આ ઍવૉર્ડ દ્વારા તેમના શાંતિના સંદેશા વધુ લોકો સુધી પહોંચશે તેવી તેમને આશા છે.’

અનેક દિગ્ગજો આ સ્પર્ધામાં સામેલ હતા 

ગ્રેમી ઍવૉર્ડની આ શ્રેણીમાં દલાઈ લામાનો મુકાબલો અમેરિકાના સુપ્રીમ કોર્ટના જસ્ટિસ કેતંજી બ્રાઉન જેક્સન, પ્રખ્યાત કોમેડિયન ટ્રેવર નોહ અને અભિનેત્રી કેથી ગાર્વર જેવા દિગ્ગજો સાથે હતો. દલાઈ લામા વતી સંગીતકાર રુફસ વેઇનરાઇટએ આ સન્માનનો સ્વીકાર કર્યો હતો. 

આલ્બમમાં શાસ્ત્રીય સંગીત અને આધુનિકતાનો સંગમ 

આ આલ્બમની વિશેષતા દલાઈ લામાનું આ વિજેતા આલ્બમ હિન્દુસ્તાની શાસ્ત્રીય સંગીત અને આધુનિક ધૂનોનું અદ્ભુત મિશ્રણ છે. જેમાં દલાઈ લામાના માનસિક શાંતિ, કરુણા અને પર્યાવરણ પ્રત્યેના વિચારોને રૅકોર્ડ કરાયા છે. આ પ્રોજેક્ટમાં ભારતની જાણીતી સરોદ વાદક જોડી અમાન અને અયાન અલી બંગાશ તેમજ સરોદ માસ્ટ્રો અમજદ અલી ખાનનું પણ મહત્ત્વનું યોગદાન રહ્યું છે.

નોબેલ શાંતિ પુરસ્કાર વિજેતા દલાઈ લામા છેલ્લા સાડા છ દાયકાથી ભારતમાં રહીને વિશ્વભરમાં માનવીય મૂલ્યો અને શાંતિનો પ્રચાર કરી રહ્યા છે, ત્યારે આ ગ્રેમી ઍવૉર્ડ તેમના જીવનના સંઘર્ષ અને સંદેશમાં એક નવું સાંસ્કૃતિક છોગું ઉમેરે છે.