બિગ બોસ 20: ઇશા રિખીએ બાદશાહ સાથેના સંબંધો પર તોડ્યું મૌન, કહ્યું- 'મારી સાથે દગો થયો, હું અધવચ્ચે લટકી રહી હતી'

Isha Rikhi On Badshah Separation: પંજાબી અભિનેત્રી અને હાલ રિયાલિટી શો 'બિગ બોસ 20'ની સ્પર્ધક ઇશા રિખીએ પ્રખ્યાત રેપર બાદશાહ સાથેના તાજેતરના છૂટાછેડા અને સંબંધોના અંત અંગે ખુલીને વાત કરી છે. શોના તાજેતરના એપિસોડમાં સહ-સ્પર્ધક કનિકા માન સાથે વાતચીત દરમિયાન ઇશાએ સંકેત આપ્યો હતો કે સંબંધમાં તેની લાગણીઓ સાથે રમત રમાઈ હતી અને તેની સાથે દગો થયો હતો. જોકે તેણે સીધું બાદશાહનું નામ લીધું નહોતું, પરંતુ તેના તમામ નિવેદનો સ્પષ્ટપણે તેમના તાજેતરના લગ્નજીવન તરફ જ ઇશારો કરી રહ્યા હતા.

'પુરાવા વિના માનતી નહોતી, પણ અંતે ખબર પડી કે દગો થયો'

પોતાના સંબંધોના વિશ્વાસ અને તૂટેલા ભરોસા અંગે વાત કરતાં ઇશાએ જણાવ્યું,

"જો કોઈ આવીને મને કહે કે કનિકા આવી છે, તો જ્યાં સુધી હું મારી નરી આંખે ન જોઉં ત્યાં સુધી હું વિશ્વાસ કરતી નથી. હું સંબંધોમાં પણ આવી જ વ્યક્તિ છું. જો કોઈ મને આવીને કંઈક કહેતું, તો હું સામે કહેતી કે મને પુરાવા આપો નહીંતર મને પરેશાન ન કરો. પરંતુ જ્યારે બધું પૂરું થયું, ત્યારે મને ખબર પડી કે અહીં તો મારી સાથે મોટો ખેલ થઈ ગયો છે (યહાં તો કટ ગયા)."

ઇમોશનલ અને ફિઝિકલ ચીટિંગ: 'અધવચ્ચે લટકવું અત્યંત ટોક્સિક હતું'

જ્યારે કનિકા માને ઇશાને સીધો સવાલ પૂછ્યો કે શું તેની સાથે ઇમોશનલી કે ફિઝિકલ રીતે છેતરપિંડી થઈ હતી, ત્યારે ઇશાએ આઘાતજનક ખુલાસો કરતાં કહ્યું, "આ તમામ બાબતો." આ સ્થિતિ પોતાના માટે કેટલી ઝેરીલી બની ગઈ હતી તે સમજાવતાં ઇશાએ કહ્યું, "પેલી જે અધવચ્ચે લટકવાની સ્થિતિ હોય છે ને, એવી પરિસ્થિતિમાં ફસાઈ રહેવું મારા માટે ખૂબ જ ટોક્સિક (માનસિક ત્રાસદાયક) બની જતું હોય છે."

'હું ક્યારેય તારી બેસ્ટ ફ્રેન્ડ હતી જ નહીં'

સંબંધમાં સામેની વ્યક્તિના બેવડા વલણને સમજાવવા માટે ઇશાએ એક ઉદાહરણ આપ્યું:

"આ એવી વાત જેવું હતું કે હું તમને કહું કે તમે મારા બેસ્ટ ફ્રેન્ડ છો અને તમને બેસ્ટ ફ્રેન્ડ જેવી તમામ ફિલિંગ્સ પણ આપું. હું બહાર તમને મારા બેસ્ટ ફ્રેન્ડ તરીકે દર્શાવું, પણ પાછળથી તમને ખબર પડે કે હું તો ક્યારેય તમારી બેસ્ટ ફ્રેન્ડ હતી જ નહીં. અને આ બધી વાતો હું માત્ર પ્રાઇવેટ સર્કલમાં જ કરી રહી હતી, કારણ કે તમારા બીજા પણ અન્ય બેસ્ટ ફ્રેન્ડ્સ હતા."

બાદશાહ અને ઇશા રિખીના ખાનગી લગ્ન

બાદશાહ અને ઇશા રિખીએ પોતાના સંબંધો અને લગ્નને હંમેશાં લાઇમલાઇટથી દૂર અને ગુપ્ત રાખ્યા હતા. બંને લગભગ ચાર વર્ષ સુધી એકબીજા સાથે રિલેશનશિપમાં રહ્યા બાદ લગ્નના બંધનમાં બંધાયા હતા. માર્ચ 2026માં તેમના લગ્નનો ખુલાસો ત્યારે થયો જ્યારે ઇશાની માતા પૂનમે ઇન્સ્ટાગ્રામ પર તેમના સાદગીપૂર્ણ લગ્ન સમારોહની તસવીરો શેર કરી હતી. ત્યારબાદ જૂન 2026માં ઇન્સ્ટાગ્રામ પર યોજાયેલા 'Ask Me Anything' સેશનમાં ઇશાએ બાદશાહ સાથેના લગ્નની સત્તાવાર પુષ્ટિ કરી હતી, પરંતુ બંનેએ પોતાની અંગત જિંદગી અંગે જાહેરમાં વાત કરવાનું ટાળ્યું હતું.

સપ્ટેમ્બરમાં સંયુક્ત નિવેદન દ્વારા છૂટાછેડાની કરી હતી જાહેરાત

લગ્નના ગણતરીના મહિનાઓ બાદ સપ્ટેમ્બર મહિનામાં આ કપલે સંયુક્ત નિવેદન બહાર પાડીને અલગ થવાની જાહેરાત કરી હતી. નિવેદનમાં જણાવાયું હતું કે, "હું અને ઇશા રિખી પરસ્પર સંમતિથી અલગ થવાનો અને પોતપોતાના માર્ગે આગળ વધવાનો નિર્ણય લીધો છે. આ નિર્ણય પરસ્પર આદર સાથે લેવામાં આવ્યો છે અને અમે સૌને વિનંતી કરીએ છીએ કે આ મુશ્કેલ સમયમાં અમારી ગોપનીયતાનું સન્માન કરવામાં આવે."

કપલે તેમના સંબંધો અંગે કોઈપણ પ્રકારની અટકળો કે ધારણાઓ ન બાંધવા માટે પણ લોકોને અપીલ કરી હતી.