ઈર્ષ્યા કરવી હોય એ કરો, અમે તો સાથે જ દેખાઈશું: ગોવિંદા સાથે અફેરની અટકળો પર કોમલ રાનીનો જવાબ

Komal Rani Slams Affair Rumours: બોલિવૂડ એક્ટર ગોવિંદા અને અભિનેત્રી કોમલ રાની સ્વર્ણકાર છેલ્લા કેટલાક સમયથી કથિત અફેરની ચર્ચાઓને કારણે લાઇમલાઇટમાં છે. બંનેને અનેક પ્રસંગોએ સાથે જોવા મળ્યા બાદ સોશિયલ મીડિયા પર અફવાઓ તેજ બની હતી. આ મામલે ગોવિંદાની પત્ની સુનિતા આહુજાના સમર્થનમાં દિવ્યા ખોસલા અને કશ્મીરા શાહ સહિતના સેલેબ્સે કોમલ રાની પર આકરા સવાલો ઉઠાવ્યા હતા. હવે આ તમામ વિવાદો પર કોમલ રાનીએ પહેલીવાર મૌન તોડીને વિરોધીઓને જડબાતોડ જવાબ આપ્યો છે.

કોમલ રાનીએ ઇન્સ્ટાગ્રામ સ્ટોરી પર કાઢ્યો બળાપો

પર્સનલ લાઇફનો તમાશો બનાવવાનો આરોપ: કોમલે પોતાની ઇન્સ્ટાગ્રામ સ્ટોરી પર એક લાંબી પોસ્ટ શેર કરી હતી. તેમણે કોઈનું સીધું નામ લીધા વિના ગોવિંદા સાથેના સંબંધો પર નિવેદનો આપનારાઓ પર નિશાન સાધ્યું અને સવાલ ઉઠાવ્યો કે શા માટે તેમની અંગત જિંદગીને સાર્વજનિક તમાશો બનાવવામાં આવી રહી છે.

ફિલ્મ 'રૂપા'નું કર્યું એલાન, અફેરનું નહીં

કોમલે સ્પષ્ટતા કરી કે તેઓ અને ગોવિંદા આગામી ફિલ્મ ‘રૂપા’માં સાથે કામ કરી રહ્યા છે. તેમણે લખ્યું,

"પોતાના હીરો સાથે ગણપતિ બાપ્પાના દર્શન કરવા જવા અને ફિલ્મની સફળતા માટે પ્રાર્થના કરવી ક્યારથી ખોટી બાબત બની ગઈ? અમે ફિલ્મનું એલાન કર્યું છે, કોઈ રોમેન્ટિક અફેરનું નહીં."

લોકો પાસે એ નક્કી કરવાનો અધિકાર નથી કે તેઓ અંગત બાબતો દર્શાવી રહ્યા છે કે ફિલ્મ પ્રમોટ કરી રહ્યા છે.

'અમે આગળ પણ સાથે કામ કરીશું'

વિરોધીઓ પર સીધો કટાક્ષ: કોમલે સાફ શબ્દોમાં કહ્યું કે તેઓ બંને એક પ્રોજેક્ટ પર કામ કરી રહ્યા છે અને ભવિષ્યમાં પણ સાથે નજરે પડશે. કટાક્ષ કરતા તેમણે કહ્યું કે જો કોઈને આ બાબતથી તકલીફ કે ઈર્ષ્યા થતી હોય તો તે બળી શકે છે.

બોલિવૂડ અભિનેત્રીઓ પર નિશાન: ઇન્ડસ્ટ્રીની અમુક અભિનેત્રીઓ પર પરોક્ષ પ્રહાર કરતા કોમલે જણાવ્યું કે જેમની પોતાની કરિયર હવે પહેલાં જેવી નથી રહી, તેઓ બીજાના વિવાદોમાં કૂદીને ચર્ચામાં રહેવાની કોશિશ કરી રહી છે. તેમણે આવા લોકોને પોતાની મર્યાદામાં રહેવાની ચેતવણી પણ આપી હતી.

નામ ન જોડવા અપીલ: દિવ્યા ખોસલા અને કશ્મીરા શાહના કથિત વિરોધ તેમજ સુનિતા આહુજાના કટાક્ષ વચ્ચે કોમલ રાનીએ આખરે લોકોને અપીલ કરી છે કે ગોવિંદા સાથે તેમનું નામ ખોટી રીતે જોડવાનું બંધ કરવામાં આવે.