‘મુન્નાભાઈ’ ફેમ એક્ટર અશ્વિન મુશરાન વિવાદમાં: ગોવામાં રોંગ સાઈડ કાર ચલાવી પિતા-પુત્રની બાઈકને ટક્કર મારી!

Actor Ashwin Mushran Goa Road Accident: 'લગે રહો મુન્નાભાઈ' ફિલ્મના એક્ટર અશ્વિન મુશરાન ગોવામાં થયેલા એક માર્ગ અકસ્માત બાદ વિવાદમાં ફસાયા છે. રિપોર્ટ અનુસાર, મડગાંવના કુસમાન વિસ્તારમાં બપોરે 12:30 વાગ્યાની આસપાસ તેમની કાર પિતા-પુત્રની બાઈકને ટક્કર મારી હતી. અકસ્માતમાં પિતાને ગંભીર ઇજાઓ થઈ હતી અને તેમની હોસ્પિટલમાં સારવાર ચાલી રહી હોવાનું જણાય છે. આ ઘટના બાદ નજીકના લોકોએ એક્ટર પર રસ્તાની ખોટી બાજુએ વાહન ચલાવવાનો આરોપ લગાવ્યો હતો. પ્રત્યક્ષદર્શીઓના જણાવ્યા અનુસાર, બાઇક નજીક આવી રહી હતી ત્યારે રોંગ સાઈડથી આવતી કારે ટક્કર મારી હતી.

ઈજાગ્રસ્ત પરિવાર માટે એક્ટર પાસેથી વળતરની માગ

રિપોર્ટ અનુસાર, કારની જમણી બાજુના ફેન્ડરમાં બાઈક સવારનું હાડકું ફસાઈ ગયા બાદ લોકો ઉશ્કેરાઈ ગયા હતા. સ્થાનિકોએ ઈજાગ્રસ્ત પરિવાર માટે એક્ટર પાસેથી વળતરની માંગણી કરી હતી. જો કે, અકસ્માત અંગે ચોક્કસ સંજોગો અને જવાબદારી અંગે પોલીસ તપાસ હજુ બાકી છે. અકસ્માત બાદ અશ્વિન મુશરાન અને તેની પત્ની સ્થાનિકો સાથે કથિત રીતે દલીલ કરતા જોવા મળતો એક વીડિયો સોશિયલ મીડિયા પર વાઈરલ થઈ રહ્યો છે.

ગોવાના સ્થાનિકોનો આરોપ છે કે, બોલાચાલી દરમિયાન એક્ટરની પત્નીએ એક વ્યક્તિ પર થૂંક્યું હતું, જેનાથી પરિસ્થિતિ વધુ વણસી હતી. એવું કહેવાય છે કે, ઝઘડા પછી દંપતી ઘટનાસ્થળેથી ચાલ્યા ગયા હતા. જો કે, અશ્વિન પાછળથી ઘટનાસ્થળે પાછો ફર્યો અને લોકોની માફી માંગી હતી. સ્થાનિક લોકોએ પણ તેમના વર્તન અંગે પ્રશ્નો ઉઠાવ્યા છે. અત્યાર સુધી પોલીસ તરફથી કોઈ સત્તાવાર નિવેદન આવ્યું નથી અને ઘટનાની સંપૂર્ણ પરિસ્થિતિની તપાસ કરવામાં આવી રહી છે.

એક્ટર તરફથી કોઈ પ્રતિક્રિયા નહીં

અશ્વિન મુશરાન કે તેમની ટીમ તરફથી પણ આરોપો પર કોઈ જાહેર પ્રતિક્રિયા સામે આવી નથી. આ ઘટના બાદ સોશિયલ મીડિયા પર માર્ગ સલામતી અને સેલિબ્રિટીઓની જવાબદારીઓ અંગે ચર્ચા વધુ તીવ્ર બની છે. ઘણા લોકોએ માગ કરી છે કે, કાયદો બધાને સમાન રીતે લાગુ પડે અને ટ્રાફિક નિયમોનું ઉલ્લંઘન કરનાર કોઈપણ વ્યક્તિ સામે નિષ્પક્ષ કાર્યવાહી કરવામાં આવે.