દમણ અને દીવના MP ઉમેશ પટેલની સજા પર સ્ટેની અરજી ફગાવાઈ, સાંસદ પદ ગુમાવવાનું જોખમ

MP Umesh Patel Sentence Stay Rejected: દમણ અને દીવના સાંસદ ઉમેશ પટેલને સેશન્સ કોર્ટમાંથી મોટો આંચકો લાગ્યો છે. સેશન્સ જજ રાજેશ એસ. તિવારીની કોર્ટે ઉમેશ પટેલની સજાના અમલ પર સ્ટે આપવાની અરજી ફગાવી દીધી છે. આ ચુકાદાને કારણે 'લોકપ્રતિનિધિત્વ અધિનિયમ, 1951' ની કલમ 8 હેઠળ સાંસદ તરીકે તેમની ગેરલાયકાતનો ખતરો તોળાઈ રહ્યો છે.

મેજિસ્ટ્રેટ કોર્ટે સંભળાવી હતી 2 વર્ષની જેલ અને દંડની સજા

ગત 1 ઓગસ્ટ 2026ના રોજ ચીફ જ્યુડિશિયલ મેજિસ્ટ્રેટ, દમણ દ્વારા ઉમેશ પટેલ અને સહ-આરોપી સુરેશ પટેલને કલમ 186 અને 353 હેઠળ દોષિત ઠેરવવામાં આવ્યા હતા. આ કેસમાં બંનેને 2 વર્ષની સાદી કેદ અને પ્રત્યેકને રૂપિયા 5000 નો દંડ ફટકારવામાં આવ્યો હતો.

સરકારી ફરજમાં રુકાવટ અને કર્મચારીઓ સાથે આચરવામાં આવી ગેરવર્તણૂક

દમણની સ્પોર્ટ્સ ક્લબ ખાતે એક્સાઇઝ સબ ઇન્સ્પેક્ટરની શારીરિક કસોટી ચાલી રહી હતી ત્યારે તેમણે ફરજ પરના પોલીસકર્મીઓને ધક્કો માર્યો હતો, બળજબરીથી ઓફિસમાં ઘૂસી ગયા હતા અને સરકારી સમિતિના સભ્યોને તેમની કાયદેસરની ફરજ બજાવતા અટકાવ્યા હતા. સાંસદના વકીલે દલીલ કરી હતી કે 2 વર્ષની સજા થતાં તેઓ આપોઆપ સાંસદ પદેથી ગેરલાયક ઠરી શકે છે, જેથી આ પરિણામો ટાળવા અપીલ પેન્ડિંગ હોય ત્યાં સુધી સજા પર સ્ટે આપવો જોઈએ.

સરકારી વકીલનો વિરોધ: સોશિયલ મીડિયા પર ફેસબુક લાઈવ અંગે રજૂઆત

સામે પક્ષે સરકારી વકીલે અરજીનો સખત વિરોધ કરતા જણાવ્યું કે સાંસદે જાહેર સેવકો પર હુમલો કર્યો હતો, તેથી આ કોઈ અપવાદરૂપ કેસ નથી. સરકારી વકીલે ઉમેર્યું કે ઉમેશ પટેલ અન્ય કેસોનો પણ સામનો કરી રહ્યા છે અને સજા સંભળાવ્યા પછી પણ પસ્તાવો વ્યક્ત કરવાને બદલે તેઓ ફેસબુક પર લાઈવ આવ્યા હતા, જે તેમની લડાયક વૃત્તિ અને ગુનાની કબૂલાત દર્શાવે છે.

કોર્ટની આકરી ટીકા: અંતિમ સુનાવણીમાં વિલંબ કરવાનો પ્રયાસ

કોર્ટે નોંધ્યું કે સાંસદનું કૃત્ય દર્શાવે છે કે તેમને ભરતી પ્રક્રિયા અને કાયદાની પવિત્રતા પ્રત્યે માન નથી. કોર્ટે 15 દિવસમાં મુખ્ય અપીલની અંતિમ સુનાવણી પૂર્ણ કરવા કહ્યું હતું, પરંતુ સાંસદે તેનો ઇનકાર કરીને માત્ર સજા પર સ્ટે આપવા આગ્રહ રાખ્યો હતો. કોર્ટે આ અંગે આકરી ટીકા કરતા જણાવ્યું કે સાંસદ માત્ર તરફેણકારી આદેશ મેળવીને અંતિમ સુનાવણીમાં વિલંબ કરવા માંગે છે. અંતે, કોર્ટે સ્ટે અરજી ફગાવીને મુખ્ય અપીલની સુનાવણી ઝડપી કરવા જણાવ્યું છે.