એક તરફી પ્રેમમાં યુવકે પરિણીતાના પતિને કાપડના તાકા નીચે દબાવી હત્યા કરી

- પલસાણાની રતન પ્રિયા મિલની ઘટના 

- સુતો હતો ત્યારે તેની ઉપર કાપડના તાકા નાંખી દાટી દીધો : સીસીટીવી ફૂટેજથી ખુલાસો થયો

બારડોલી : સુરત જિલ્લાના પલસાણા ખાતે ઇકો ટેકસટાઇલ પાર્કમાં આવેલી રતન પ્રિયા મિલમાં કામ કરતાં યુવાનની કાપડના તાકા નીચે સડી ગયેલી દુર્ગંધ મારતી લાશ મળી આવી હતી. પોલીસે મિલના સીસીટીવીની ચકાસણી કરતાં તેને તેની સાથે કામ કરતાં શખ્સે કાપડના તાકા નાંખી દાટી દઈ હત્યા કરી હોવાનો ખુલાસો થયો છે. મરનારની પત્ની સાથે હત્યા કરનારને એક તરફી પ્રેમ હોવાનું પ્રાથમિક તપાસમાં જણાયું છે.

પલસાણા તાલુકાના ઈટાળવા ગામે કાઠીયાવાડી હોટલની પાછળ આવેલા બિલ્ડિંગમાં આકાશબાબુ રામબહાદુર કોરી (ઉ.વ.૨૧ મૂળ રહે. મધ્યપ્રદેશ) પત્ની સાથે રહેતો હતો અને ઇકો ટેક્ષ્ટાઈલ પાર્કમાં રતન પ્રિયા મીલમાં કામ કરતો હતો. આકાશબાબુ સાથે લક્ષ્મણ ગિરજાશંકર આરક પણ કામ કરતો હતો. લક્ષ્મણને આકાશબાબુની પત્ની ગમતી હોય એક તરફી પ્રેમ કરતો હતો. લક્ષ્મણે અગાઉ આકાશબાબુની પત્નીને છેડતી કરવા પ્રયત્ન કરતાં આકાશબાબુ તથા તેના વતનમાં અન્ય લોકોએ ઠપકો આપ્યો હતો. જે લક્ષ્મણે મનમાં રાખી મૂક્યો હતો. દરમિયાન ગત સોમવાર તા.૧૪ મીએ રાત્રે નોકરી ઉપર આકાશબાબુ અને લક્ષ્મણ મીલમાં કામ કરતા હતા. દરમિયાન મધ્યરાત્રીએ આકાશબાબુ કાપડના તાકા નજીક ઉંઘી ગયો હતો. તે સમયે લક્ષ્મણે કાપડના તાકા આકાશબાબુ પર નાંખી દીધા હતા. આકાશબાબુ દટાઈ જતા મોત થયું હતું. દરમિયાન ગુરૂવાર સવારે કાપડના તાકામાંથી દુર્ગંધ આવતા કાપડના તાકા ખસેડતા આકાશબાબુની સડી ગયેલી લાશ મળી આવી હતી. પોલીસે પ્રથમ અકસ્માત મોતનો ગુનો નોંધી કાર્યવાહી કરી હતી. દરમિયાન મીલમાં લગાવવામાં આવેલા સીસીટીવી કેમેરાના ફૂટેજ ચેક કરતાં આકાશબાબુ ઊંઘતો હતો ત્યારે  તેના ઉપર લક્ષ્મણ કાપડના તાકા નાંખતો નજરે પડતાં પોલીસે લક્ષ્મણને પકડી લીધો હતો. પોલીસે લક્ષ્મણની પ્રાથમિક પૂછપરછ કરતાં આકાશબાબુની પત્નીને એક તરફી પ્રેમ કરતો હતો અને તેને એક વખત પકડવા જતાં આકાશબાબુ અને તેના વતનના અન્ય લોકોએ ઠપકો આપતાં મનમાં અદાવત રાખી હત્યા કરી હોવાની કબુલાત કરી છે. પોલીસે અકસ્માત બાદ હત્યાનો ગુનો નોંધવાની કાર્યવાહી હાથ ધરી છે.