સુરત: એક જ દિવસમાં શિયાળા-ઉનાળા અને ચોમાસાની મોસમનો અનુભવ

સુરત, તા. 01 ડિસેમ્બર 2021 બુધવાર 

લો પ્રેશરના કારણે શિયાળાની શરૂઆત સાથે જ વરસાદી ઝાપટાના કારણે લોકો કન્ફ્યુઝ થઈ રહ્યા છે. એક જ દિવમસાં શિયાળો, ઉનાળો અને ચોમાસુ ત્રણેય ઋતુનો અનુભવ સુરતીઓને થયો છે. ગઈકાલે રાતથી સુરતમાં વરસાદી ઝાંપટા પડવાનું શરૂ થતાં લોકોને કુતુહલ થયું હતું. સવારે પણ વરસાદ ચાલુ રહેતાં નોકરી ધંધા પર જતાં લોકોને મુશ્કેલી પડી હતી. સવારે શિયાળો અને ચોમાસાનો માહોલ બન્ને સાથે હોવાથી લોકોની મુંઝવણમાં વધારો થયો હતો.

સુરતમાં હજી માંડ શિયાળાની શરૂઆત થઈ છે પરંતુ બપોરે તાપ લાગી રહ્યો છે. આ બે ઋતુ સાથે થવાના કારણે સુરતમાં વાઈરલ ઈન્ફેક્શનના કેસમામં વધારો થયો છે. લોકો એક જ દિવસમાં બે ઋતુથી ટેવાઈ તે પહેલાં દરિયામાં થયેલા લો પ્રેશરના કારણે સુરત સહિત ગુજરાતમાં વરસાદી મોહાલ ઉભો થયો છે. 

સુરતમાં ગઈકાલે રાત્રે વરસાદના હળવા ઝાંપટા પડયા હતા પરંતુ વહેલી સવારે શહેરના અનેક વિસ્તારમાં ચોમાસા જેવા વરસાદના ઝાંપટા પડતાં લોકોની મુશ્કેલીમાં વધારો થયો હતો.

શિયાળાના કારણે વહેલી સવારે નોકરી ધંધા માટે જતાં લોકો સ્વેટર કે કોટ જેવા ગરમ કપડાં પહેરીને જવા માટે તૈયારી કરતાં હતા પરંતુ વરસાદ પડતાં તેઓ કન્ફ્યુઝ થઈ ગયાં હતા. વરસાદ અને ઠંડી બન્ને સાથે હોવાથી કેટલાક લોકોએ ગરમ  કપડા પર રેઈન કોટ પહેર્યા હતા. 

ગઈકાલે બપોરે ગરમી લાગતી હતી અને ત્યાર બાદ વરસાદ અને ઠંડી બન્નેનો ચમકારો થતાં એક જ દિવસમાં ત્રણ ઋતુનો અનુભવ થતાં સુરતીઓ બેચેન બની ગયા છે. એક જ દિવસમામં ત્રણ ઋતુ હોવાના કારણે સુરતીઓના આરોગ્ય પર માઠી અસર થાય તેવી ભીતી વ્યક્ત થઈ રહી છે.