વન મહોત્સવ 2026: પોરબંદરમાં ‘સર્વોદય વન’નું લોકાર્પણ, 1.5 લાખથી વધુ રોપાઓનું વાવેતર

વર્ષ 2004માં શરૂ કરાયેલી સાંસ્કૃતિક વન નિર્માણની પરંપરા અંતર્ગત રાજ્યનું 25મું સાંસ્કૃતિક વન ‘સર્વોદય વન’ નું લોકાર્પણ મુખ્યમંત્રી શ્રી ભૂપેન્દ્રભાઈ પટેલે મહાત્મા ગાંધીજીની જન્મભૂમિ પોરબંદરના ઓડેદરા ખાતે 77મા રાજ્યકક્ષાના વન મહોત્સવની ઉજવણી અંતર્ગત કર્યું છે.

'સર્વોદય વન' ની મુખ્ય વિશેષતાઓ

પોરબંદરના ઓડેદરા ખાતે રાજ્યનું 25મું સાંસ્કૃતિક વન ‘સર્વોદય વન’ વિકસાવવામાં આવ્યું છે. આશરે 14 હેક્ટર વિસ્તારમાં ₹20 કરોડના ખર્ચે તૈયાર કરાયેલું આ વન પ્રકૃતિપ્રેમીઓ તેમજ પ્રવાસીઓ માટે એક નવું આકર્ષણ બનશે. અહીં 70થી વધુ વિવિધ પ્રજાતિના 1.5 લાખથી વધુ રોપાઓનું વાવેતર કરીને હરિયાળી અને જૈવ-વિવિધતાને પ્રોત્સાહન આપવામાં આવ્યું છે.

‘સર્વોદય વન’માં મુલાકાતીઓ માટે સી-વ્યૂ ગાર્ડન જેવી સુવિધા વિકસાવવામાં આવી છે, જ્યાંથી દરિયાઈ સૌંદર્ય ઉપરાંત સૂર્યોદય અને સૂર્યાસ્તનો નજારો માણી શકાય છે. આ ઉપરાંત દિવ્યાંગજનો માટે વિશેષ રમતગમત વિસ્તાર પણ બનાવવામાં આવ્યો છે. ચિંગરીયા ગામના કારીગરોની હાથવણાટની શાલને પ્રોત્સાહન આપી સ્થાનિક હસ્તકલાને પણ આ વન સાથે જોડવામાં આવી છે.

વનની હરિયાળી અને જૈવ-વિવિધતા વધારવા માટે વિવિધ પ્રજાતિના આશરે 1.25 લાખ રોપાઓ વાવવામાં આવ્યા છે. તેમાં આશરે 1.5 હેક્ટર વિસ્તારમાં 18,000 રોપાઓ સાથે ‘વન કવચ’ વિકસાવવામાં આવ્યું છે. પર્યાવરણ અને વનવિસ્તારનું નિરીક્ષણ કરવા માટે અહીં વોચ ટાવરની સુવિધા પણ ઉભી કરવામાં આવી છે.

વન વિભાગની કામગીરી અને ક્ષમતાને વધુ મજબૂત બનાવવા માટે ₹11.20 કરોડના ખર્ચે 89 વાહનોની ફાળવણી કરવામાં આવી છે. આ વાહનોને મુખ્યમંત્રીશ્રી દ્વારા ફ્લેગ ઓફ કરવામાં આવ્યા હતા. આ પહેલથી વન સંરક્ષણ, વ્યવસ્થાપન અને મેદાની કામગીરીને વધુ અસરકારક બનાવવામાં મદદ મળશે.

પરીક્ષાલક્ષી પ્રશ્ન 

પ્રશ્ન 1:  ગુજરાતનું 25મું સાંસ્કૃતિક વન ‘સર્વોદય વન’ ક્યાં વિકસાવવામાં આવ્યું છે?

(A) ગીર સોમનાથ
(B) પોરબંદરના ઓડેદરા
(C) રાજકોટ
(D) જામનગર