તમારા આધાર કાર્ડનો તો ક્યાંક દુરુપયોગ નથી થઇ રહ્યો ને! આ રીતે કરો ચેક

Check Aadhaar Usage And Prevent Fraud: ડિજિટલ યુગમાં બૅંકિંગથી લઈને સિમ કાર્ડ ખરીદવા સુધી દરેક જગ્યાએ આધાર કાર્ડ અનિવાર્ય બની ગયું છે, પરંતુ તેની સાથે તેના દુરુપયોગ અને ડેટા ચોરીનો ખતરો પણ વધ્યો છે. ઝેરોક્ષની દુકાને નકલ છોડી દેવી કે અજાણ્યા પ્લેટફોર્મ પર બાયોમેટ્રિક આપવું મુશ્કેલીમાં મૂકી શકે છે. જોકે, તમે જાતે જ તમારા કાર્ડનો ઉપયોગ ટ્રેક કરીને તેને સુરક્ષિત રાખી શકો છો.

શું છે આધાર ઓથેન્ટિકેશન હિસ્ટ્રી?

જ્યારે પણ કોઈ સેવા માટે આધાર દ્વારા વેરિફિકેશન થાય છે, ત્યારે UIDAIના સિસ્ટમમાં તેનો ડિજિટલ રૅકોર્ડ નોંધાય છે:

છેલ્લા 6 મહિનાનો રૅકોર્ડ: છેલ્લા 6 મહિનામાં થયેલા તમામ ઓથેન્ટિકેશન પ્રયાસોની વિગતો ચકાસી શકાય છે.

સંપૂર્ણ વિગતો: વેરિફિકેશનની ચોક્કસ તારીખ, સમય અને માધ્યમ—જેમ કે OTP, ફિંગરપ્રિન્ટ કે આઇરિસ—સ્પષ્ટપણે નોંધાયેલા હોય છે.

દુરુપયોગની ઓળખ: તમારી જાણ બહાર થયેલા કોઈપણ વેરિફિકેશનની તાત્કાલિક ઓળખ થઈ જાય છે.

mAadhaar એપથી ઓથેન્ટિકેશન હિસ્ટ્રી ચેક કરવાની 4 સ્ટેપની રીત

• એપ ડાઉનલોડ અને લોગિન: Google Play Store અથવા Apple App Store પરથી સત્તાવાર mAadhaar App ડાઉનલોડ કરીને આધાર નંબર અને OTP થી લોગિન કરો.
• PIN સેટ કરો: સુરક્ષિત એક્સેસ માટે 4 અંકનો PIN સેટ કરો અને એપના 'My Aadhaar' સેક્શનમાં જાઓ.
• સિક્યોરિટી ટેબ: 'Security' ટેબ હેઠળ આપેલા 'Aadhaar Authentication History' વિકલ્પ પર ટેપ કરો.
• સમયગાળો પસંદ કરો: જે સમયગાળાની માહિતી જોવી હોય તે પસંદ કરીને સમગ્ર હિસ્ટ્રી અને રૅકોર્ડ્સ ચકાસો.

શંકાસ્પદ વપરાશ દેખાય તો તાત્કાલિક કરો આ પગલાં

UIDAI હેલ્પલાઇન: જો હિસ્ટ્રીમાં કોઈ અજાણી એન્ટ્રી દેખાય તો વિલંબ કર્યા વિના UIDAIના ટોલ-ફ્રી નંબર 1947 પર સંપર્ક કરીને રિપોર્ટ નોંધાવો.

બાયોમેટ્રિક લોક: mAadhaar એપમાં આપેલા ફીચરની મદદથી ફિંગરપ્રિન્ટ અને આઇરિસ ડેટાને તાત્કાલિક લોક કરો, જેથી કોઈ અન્ય તેનો ઉપયોગ ન કરી શકે. જરૂર પડે ત્યારે તેને એપ દ્વારા તુરંત અનલોક પણ કરી શકાય છે.

આધાર સુરક્ષા માટેના જરૂરી નિયમો

માસ્ક્ડ આધારનો ઉપયોગ: ઓળખના પુરાવા તરીકે જ્યાં પણ નકલ જમા કરાવવાની હોય ત્યાં માસ્ક્ડ આધારનો ઉપયોગ કરો, જેમાં આગળના અંકો છુપાયેલા હોય છે.

અનધિકૃત જગ્યાએ નકલ ન આપવી: કોઈપણ અજાણી, બિનસત્તાવાર દુકાન કે વ્યક્તિને આધાર કાર્ડની ફોટોકોપી આપવાનું ટાળો.

બાયોમેટ્રિક્સ લોક રાખવા: જ્યારે વેરિફિકેશનની જરૂર ન હોય ત્યારે તમારા બાયોમેટ્રિક્સને હંમેશાં લોક સ્થિતિમાં જ રાખો.