Stock market and Silver and Gold Price News : ઈરાન અને ઈઝરાયલ વચ્ચે ફરી એકવાર લેબેનોનને લઈને યુદ્ધ ભડકતાં બંને દેશોએ એકબીજા પર બેલેસ્ટિક મિસાઈલો ઝીંકતા મિડલ ઈસ્ટમાં નવેસરથી તણાવ વધી ગયું છે. આ સૌની અસર હવે દુનિયાભરના શેરબજાર અને કોમોડિટી માર્કેટ પર થઇ રહી છે.
ભારતમાં સેન્સેક્સ-નિફ્ટીની શું છે સ્થિતિ?
ફરી એકવાર યુદ્ધની શક્યતાને જોતા આજે ભારતીય શેરબજાર નકારાત્મક ખુલ્યુ હતું. સેન્સેક્સની વાત કરીએ તો સેન્સેક્સમાં આજે એકઝાટકે 925 પોઈન્ટનો કડાકો બોલાઈ ગયો હતો. પ્રિસેશનના કડાકા બાદ સેન્સેક્સમાં થોડીક રિકવરી દેખાઈ અને તે સમાચાર લખવા સુધીમાં 800 પોઈન્ટના કડાકા સાથે 73471.78 પોઈન્ટની આસપાસ ટ્રેડ થઇ રહ્યો હતો. જ્યારે નિફ્ટીની વાત કરીએ તો જે શુક્રવારે 23336.70 પોઈન્ટ પર ક્લોઝ થઈ હતી તે આજે સોમવારે સીધો 296 પોઇન્ટના કડાકા સાથે 23070 પર પહોંચી ગયો હતો. ત્યારબાદ તેમાં પણ થોડીક રિકવરી આવતી હતી સમાચાર લખવા સુધીમાં નીફ્ટી 23134 પોઈન્ટ પર ટ્રેડ થઇ રહ્યો હતો.
સોના-ચાંદી પણ તૂટ્યા
આજે સોનાની વાત કરીએ તો વાયદા બજારમાં શુક્રવારનું સોનાનું ક્લૉઝિંગ રેટ 155594 રૂપિયા હતું જે આજે સીધું 153596 સુધી ગગડી ગયું હતું. એટલે કે તેમાં કુલ 1998 રૂપિયાનો કડાકો બોલાઈ ગયો હતો. જ્યારે ચાંદીની વાત કરીએ તો તેમાં 6547 રૂપિયાનો કડાકો બોલાઈ ગયો હતો. શુક્રવારે ચાંદી 248537 રૂપિયાના ભાવે ક્લૉઝ થઇ હતી જે આજે સીધી 241990 રૂપિયાના તળિયે ખુલી હતી. આ સાથે રોકાણકારોને નુકસાન ભોગવવાનો વારો આવ્યો છે.
બ્રેન્ટ ક્રૂડમાં ભડકો, રૂપિયો પણ તૂટ્યો
બીજી બાજુ બ્રેન્ટ ક્રૂડ ઓઈલના ભાવ ફરી એકવાર આસમાને પહોંચી ગયા છે. આજે 3.31 ડૉલરના વધારા સાથે બ્રેન્ટ ક્રૂડ ઓઈલના ભાવ 96.40 ડૉલરની આજુબાજુ ટ્રેડ થઈ રહ્યા છે. જ્યારે બીજી બાજુ ડૉલર સામે રૂપિયો પણ કમજોર થયો છે. આજે રૂપિયો 29 પૈસાની નબળાઈ સાથે ડૉલર સામે ફરી 95.23ની સપાટીને કૂદાવી ગયો છે જે ફરી એકવાર મોંઘવારી વધવાના સંકેત આપી રહ્યો છે.
