શેરબજારમાં કડાકો: સેન્સેક્સ 835 પોઇન્ટ તૂટ્યો, સોના-ચાંદીના ભાવમાં પણ મોટું ગાબડું

Stock Market and Gold And Silver Price News : ભારતીય શેરબજાર અને કોમોડિટી માર્કેટ માટે આજનો દિવસ 'બ્લેક ફ્રાઇડે' સાબિત થયો છે. વૈશ્વિક દબાણ અને પશ્ચિમ એશિયામાં વધી રહેલા યુદ્ધના તણાવ વચ્ચે આજે સેન્સેક્સ, નિફ્ટી સહિત સોના અને ચાંદીના ભાવમાં પણ મોટો ઘટાડો જોવા મળ્યો છે. બજાર ખૂલતાંની સાથે જ રોકાણકારોમાં ગભરાટ જોવા મળ્યો હતો, જેના પરિણામે ચારેબાજુ વેચવાલીનો માહોલ રહ્યો હતો.

શેરબજારમાં રક્તપાત

આંકડા મુજબ, BSE સેન્સેક્સ આજે 77,000ની સપાટીની નજીક આવી ગયો છે. બજાર ખૂલતાંની સાથે જ સેન્સેક્સમાં 835 પોઇન્ટથી વધુનો કડાકો જોવા મળ્યો હતો. બીજી તરફ નિફ્ટી 50 પણ 24,000ની મનોવૈજ્ઞાનિક સપાટી તોડીને નીચે ટ્રેડ કરી રહ્યો છે. બૅન્કિંગ, આઇટી અને રિયલ્ટી સેક્ટરમાં ભારે વેચવાલી જોવા મળી છે.

સોના-ચાંદીના ભાવમાં કડાકો

માત્ર શેરબજાર જ નહીં, પણ કિંમતી ધાતુઓમાં પણ આજે ગાબડા પડ્યા છે. MCX પર સોનાના ભાવમાં પ્રતિ કિલો અંદાજે 1011 રૂપિયાનો ઘટાડો નોંધાયો છે, જે ₹1,50,945ના સ્તરે પહોંચ્યો છે. જ્યારે ચાંદીમાં વધુ ખરાબ સ્થિતિ જોવા મળી છે. ચાંદીના ભાવમાં 2313 રૂપિયાનો મોટો ઘટાડો આવતાં તે ₹2,40,087ના સ્તર પર કારોબાર કરી રહી છે.

ઘટાડા પાછળના મુખ્ય કારણો

બજારના નિષ્ણાતોના મતે, પશ્ચિમ એશિયામાં ઈરાન અને ઈઝરાયલ વચ્ચે વધતા જતાં યુદ્ધના ભય અને અમેરિકી નૌકાદળની હિલચાલને કારણે રોકાણકારો જોખમ લેવાનું ટાળી રહ્યા છે. આ ઉપરાંત, વૈશ્વિક શેરબજારોમાં નબળાઈ અને વિદેશી સંસ્થાકીય રોકાણકારોની (FII) સતત વેચવાલી પણ આ મોટા કડાકા પાછળ જવાબદાર માનવામાં આવે છે.