મુંબઈ : સમાપ્ત થયેલા નાણાં વર્ષ ૨૦૨૫-૨૬માં ક્રેડિટ કાર્ડસ મારફતનો ખર્ચ વાર્ષિક ધોરણે ૧૨ ટકા વધી રૂપિયા ૨૩.૬૨ ટ્રિલિયન રહ્યો છે જે નાણાં વર્ષ ૨૦૨૪-૨૫માં રૂપિયા ૨૧.૦૯ ટ્રિલિયન રહ્યો હતો. જો કે સમાપ્ત થયેલા નાણાં વર્ષમાં ક્રેડિટ કાર્ડસ જારી થવાની માત્રા ધીમી પડી છે.
વર્તમાન વર્ષના માર્ચમાં ક્રેડિટ કાર્ડ મારફતનો ખર્ચ વધી રૂપિયા ૨.૧૯ ટ્રિલિયન સાથે ત્રણ મહિનાની ઊંચી સપાટીએ રહ્યો છે. નાણાં વર્ષના અંતિમ મહિનામાં ખર્ચમાં થતા વધારાની સાથે ક્રેડિટ કાર્ડસનો વપરાશ પણ વધી જાય છે, એમ રિઝર્વ બેન્ક ઓફ ઈન્ડિયા (આરબીઆઈ)ના સુત્રોએ જણાવ્યું હતું.
ફેબુ્રઆરીમાં ક્રેડિટ કાર્ડ મારફતનો ખર્ચ રૂપિયા ૧.૭૭ ટ્રિલિયન સાથે નાણાં વર્ષ ૨૦૨૬ની નીચી સપાટીએ રહ્યો હતો.
માર્ચમાં પોઈન્ટ ઓફ સેલ ખાતે ક્રેડિટ કાર્ડસ મારફતનો ખર્ચ ૧૬.૩૬ ટકા વધી રૂપિયા ૭૮૪૭૦ કરોડ રહ્યો હતો જે ફેબુ્રઆરીમાં રૂપિયા ૬૭૪૩૫ કરોડ જોવા મળ્યો હતો એમ રિઝર્વ બેન્કના ડેટામાં જણાવાયું છે. ઈ-કોમર્સ પર કાર્ડસ મારફતનો ખર્ચ માસિક ધોરણે ૨૮.૩૮ ટકા વધી રૂપિયા ૧.૪૧ ટ્રિલિયન રહ્યો હતો જે ફેબુ્રઆરીમાં રૂપિયા ૧.૧૦ ટ્રિલિયન નોંધાયો હતો.
માર્ચના અંતે ક્રેડિટ કાર્ડસની સંખ્યા વાર્ષિક ધોરણે ૮ ટકા જેટલી વધી ૧૧.૮૬ કરોડ રહી હતી. ક્રેડિટ કાર્ડસ પેટેના બિલની ચૂકવણીમાં થતી ઢીલને ધ્યાનમાં રાખી બેન્કો દ્વારા કાર્ડસ જારી કરવાની ગતિ ધીમી પડી છે. ૨૦૨૪ના નાણાં વર્ષના અંતે ક્રેડિટ કાર્ડસમાં વાર્ષિક ધોરણે ૧૯ ટકા ઉમેરો થયો છે જે ત્યારબાદના બે વર્ષમાં ધીમો પડી બન્ને વર્ષમાં આઠ ટકા પર આવી ગયો હોવાનું પણ રિઝર્વ બેન્કના ડેટા જણાવે છે.
