ભારે તેજી બાદ અચાનક સસ્તી થઈ ચાંદી! સોનાના ભાવમાં ઉછાળો, જાણો લેટેસ્ટ રેટ

Gold-Silver Rate: છેલ્લા કેટલાંક સમયથી સોના અને ચાંદીના ભાવમાં સતત ઉતાર-ચઢાવ જોવા મળી રહ્યો છે. એવામાં શુક્રવારે બજારમાં અજીબોગરીબ સ્થિતિ જોવા મળી હતી. એક તરફ જ્યાં ચાંદીએ ટ્રેડિંગ દરમિયાન અત્યાર સુધીનો નવો રૅકોર્ડ બનાવ્યો, તો બીજી તરફ દિવસના અંતે તેમાં મોટો ઘટાડો નોંધાયો હતો. બીજી બાજુ, શરુઆતી ઘટાડા બાદ સોનાના ભાવમાં ફરી તેજી જોવા મળી હતી.

શુક્રવારે ચાંદી ₹439ના ઘટાડે બંધ

મલ્ટી કોમોડિટી એક્સચેન્જમાં શુક્રવારે ચાંદીના ભાવ ભારે અસ્થિર રહ્યા હતા. એક સમયે ચાંદી ₹2,08,603ની સર્વોચ્ચ સપાટીએ પહોંચી ગયા બાદ, બજાર બંધ થતાં સુધીમાં તેમાં નરમાઈ જોવા મળી હતી. અંતે ₹439 ઘટીને તે ₹2,08,000ના ભાવે બંધ થઈ હતી.

સોનામાં શરુઆતી ઘટાડા બાદ રિકવરી

સોનાના ભાવમાં પણ શુક્રવારે મોટી હલચલ જોવા મળી હતી. MCX પર સોનું શરુઆતમાં ₹966ના ઘટાડા સાથે ₹1,33,555 સુધી નીચે ઉતરી ગયું હતું, પરંતુ નીચા ભાવે લેવાલી વધતાં તે ફરી રિકવર થયું અને દિવસના અંતે ₹1,34,206 પ્રતિ 10 ગ્રામ પર સ્થિર થયું.

ઘરેલુ બજારમાં (IBJA) સોનું-ચાંદી સસ્તા થયા

એક તરફ જ્યાં MCXમાં સોના-ચાંદીના ભાવ સતત ઉપર-નીચે થઈ રહ્યા હતા, ત્યાં બીજી તરફ આપણા સ્થાનિક બજારમાં સોનું અને ચાંદી બંને સસ્તા થયા છે. ઇન્ડિયન બુલિયન જ્વેલર્સ ઍસોસિએશન(IBJA)ના જણાવ્યા મુજબ, ઘરેલું માર્કેટમાં આજે સોનાના ભાવમાં ₹695નો ઘટાડો થયો છે, જેને કારણે હવે 24 કેરેટ સોનાનો ભાવ ₹1,31,779(પ્રતિ 10 ગ્રામ) પર આવી ગયો છે. એટલું જ નહીં, ચાંદીના ભાવમાં તો ₹1053નો મોટો ઘટાડો જોવા મળ્યો છે, જેથી હવે એક કિલો ચાંદી ₹2,00,067માં મળી રહી છે. આમ, દાગીના ખરીદનારાઓ માટે સ્થાનિક બજારમાં ભાવ ઘટતાં થોડી રાહત જોવા મળી છે.

સોનાની વિવિધ ક્વોલિટીના આજના ભાવ (પ્રતિ 10 ગ્રામ)

સ્થાનિક બજારમાં સોનાની વિવિધ ક્વોલિટીના ભાવમાં પણ મોટો તફાવત જોવા મળ્યો છે. શુદ્ધ સોના એટલે કે 24 કેરેટ ગોલ્ડનો ભાવ હવે ₹1,31,779 પ્રતિ 10 ગ્રામ પર પહોંચ્યો છે. તેમજ 22 કેરેટ સોનાની કિંમત ₹1,28,620 નોંધાઈ છે. ઓછી શુદ્ધતા ધરાવતા સોનાની વાત કરીએ તો, 20 કેરેટ સોનું ₹1,17,280, 18 કેરેટ સોનું ₹1,06,740 અને સૌથી ઓછી શુદ્ધતા ધરાવતું 14 કેરેટ સોનું ₹85,000 પ્રતિ 10 ગ્રામના ભાવે વેચાઈ રહ્યું છે. આમ, ગ્રાહકો પોતાની પસંદગી અને બજેટ મુજબ સોનાની ખરીદી કરી શકે છે.

આ પણ વાંચો: ઓમાન ખાતે જ્વેલરી નિકાસ 150 મિલિયન ડોલર પહોંચશે

જોકે, અહીં એ વાત ખાસ ધ્યાનમાં રાખવા જેવી છે કે IBJA દ્વારા જાહેર કરાયેલા ભાવ આખા દેશમાં એકસરખા હોય છે, પરંતુ જ્યારે તમે ઘરેણાં ખરીદવા જશો ત્યારે તેના પર GST અને મેકિંગ ચાર્જ(ઘડામણ) અલગથી લાગે છે. આ ચાર્જ દરેક રાજ્ય અને શહેરમાં અલગ-અલગ હોઈ શકે છે, જેના કારણે દાગીના ખરીદતી વખતે તમારે આ ભાવ કરતાં થોડી વધુ કિંમત ચૂકવવી પડશે.