ચાંદીનો ભાવ રૂ. 2700ના ઉછાળા સાથે નવી ઐતિહાસિક સપાટીએ, સોનામાં પણ તેજી

Silver Price News : વર્ષના છેલ્લા મહિના ડિસેમ્બરમાં સોના-ચાંદીના ભાવ (Gold-Silver Rates)માં ફરી એકવાર તોફાની તેજી જોવા મળી રહી છે. બુધવારે મલ્ટી કોમોડિટી એક્સચેન્જ (MCX) પર કારોબાર શરુ થતાંની સાથે જ ચાંદીનો ભાવ નવો શિખર સર કરીને ઓલ ટાઇમ હાઇ પર પહોંચી ગયો હતો.

કેટલે પહોંચ્યો ચાંદીનો ભાવ? 

બુધવારે MCX પર કારોબારની શરુઆતમાં ચાંદીનો ભાવ તેના અગાઉના બંધ ભાવ ₹1,88,064 પ્રતિ કિલોગ્રામની તુલનામાં વધીને ₹1,88,959 પર ખૂલ્યો હતો. ત્યારબાદ ગણતરીની મિનિટોમાં જ તે ₹2,735ના વધારા સાથે ₹1,90,799ની નવી ઊંચાઈ પર પહોંચી ગયો હતો. આ વધારા સાથે ચાંદીનો ભાવ હવે ₹2 લાખના આંકડાની ખૂબ નજીક પહોંચી ગયો છે. માત્ર આ સપ્તાહના બે કારોબારી દિવસોમાં જ ચાંદીના ભાવમાં લગભગ ₹10,000 પ્રતિ કિલોગ્રામનો ઉછાળો જોવા મળ્યો છે.

સોનાના ભાવની સ્થિતિ

સોનાના ભાવ(Gold Rate)માં પણ તેજી જોવા મળી છે, જોકે તે હજી પણ તેની સર્વકાલીન ઊંચી સપાટીથી ઘણું સસ્તું મળી રહ્યું છે. બુધવારે 5 ફેબ્રુઆરીની એક્સપાયરીવાળા સોનાનો વાયદા ભાવ ₹1,30,502 પ્રતિ 10 ગ્રામ પર પહોંચ્યો હતો. જોકે, તેની ઊંચી સપાટી ₹1,34,024 હતી, જેનાથી સોનું હજી પણ ₹3,522 પ્રતિ 10 ગ્રામ સસ્તુ છે.

IBJA શું રેટ દર્શાવે છે? 

ઇન્ડિયન બુલિયન જ્વેલર્સ ઍસોસિએશન(IBJA)ની વેબસાઇટ પર ઘરેલું બજારમાં ચાંદીનો ભાવ મંગળવારની સાંજે ₹1,78,893 પ્રતિ કિલોગ્રામ હતો. જ્યારે 24 કેરેટ સોનાનો ભાવ આ સપ્તાહે નરમ પડ્યો છે અને મંગળવારની સાંજે તે ઘટીને ₹1,27,974 પ્રતિ 10 ગ્રામ પર આવ્યો છે, જે શુક્રવારના બંધ ભાવ કરતાં ₹618 ઓછો છે.

₹2 લાખને પાર જવાનું અનુમાન

એક અહેવાલ મુજબ, ચાંદીનો ભાવ જલ્દી જ ₹2 લાખ પ્રતિ કિલોગ્રામનો આંકડો પાર કરી શકે છે. કન્સલ્ટન્સી ફર્મે આ ઝડપી વૃદ્ધિ પાછળ નબળા અમેરિકી મેક્રો ઈકોનોમિક ડેટા, યુએસ ફેડરલ રિઝર્વ દ્વારા વ્યાજ દરોમાં ઘટાડાની વધતી અપેક્ષાઓ અને વૈશ્વિક ભંડારમાં ઘટાડાને મુખ્ય કારણો ગણાવ્યા છે.