ચાંદીમાં એક જ દિવસમાં 17000 રૂપિયાનો જંગી ઉછાળો, સોનામાં પણ રૅકોર્ડ તેજી, જાણો કારણો

Silver and Gold Price News : સોના અને ચાંદીના ભાવમાં અકલ્પનીય તેજી જોવા મળી રહી છે. શુક્રવારે MCX પર ચાંદીના ભાવમાં ₹17,000થી વધુનો ઉછાળો આવ્યો, જ્યારે સોનાના ભાવ પણ નવી ટોચે પહોંચ્યા.

સોના અને ચાંદીના ભાવમાં અત્યારે ઘોડાદોડ તેજીનો માહોલ જોવા મળી રહ્યો છે. દરરોજ તેમની કિંમતોમાં ભારે ઉછાળો આવી રહ્યો છે. રિટેલથી લઈને મોટા રોકાણકારો પણ હવે ખુલીને તેના પર દાવ લગાવી રહ્યા છે. આ તેજીની સાથે, મોટા નિષ્ણાતો પણ માની રહ્યા છે કે સોના-ચાંદીના ભાવ લાંબા ગાળે ઉપર જ રહેશે.

ચાંદીમાં ઐતિહાસિક ઉછાળો 

શુક્રવારની જ વાત કરીએ તો, MCX પર ચાંદીના ભાવમાં અકલ્પનીય તેજી જોવા મળી. કોમોડિટી માર્કેટમાં વેપાર બંધ થતાં સુધીમાં 5 માર્ચ વાયદા માટે 1 કિલો ચાંદીની કિંમત ₹17,145 વધીને ₹2,40,935 પર પહોંચી ગઈ હતી. જોકે, દિવસના વેપાર દરમિયાન ચાંદીમાં ₹19,000નો ઉછાળો આવ્યો હતો અને તે ₹ 2.42 લાખ પ્રતિ કિલોના ઓલ-ટાઇમ હાઇ લેવલ પર પહોંચી ગઈ હતી.

સોનામાં પણ તેજી 

સોનાની કિંમતમાં પણ જોરદાર ઉછાળો જોવા મળ્યો હતો. MCX પર 5 ફેબ્રુઆરી વાયદા માટે 10 ગ્રામ સોનાનો ભાવ ₹70 વધીને ₹1,39,940 પર પહોંચ્યો હતો, જ્યારે દિવસ દરમિયાન તેમાં લગભગ ₹1,200નો ઉછાળો આવ્યો હતો. સોનાએ પણ શુક્રવારે પોતાનો ઓલ-ટાઇમ હાઇ રૅકોર્ડ બનાવ્યો હતો.

એક સપ્તાહમાં જ ભાવ પહોંચ્યા આસમાને

છેલ્લા એક સપ્તાહમાં જ સોના-ચાંદીના ભાવમાં એટલો મોટો ઉછાળો આવ્યો છે કે તે સામાન્ય માણસની પહોંચની બહાર થઈ ગયું છે. 19 ડિસેમ્બરે 10 ગ્રામ સોનાનો ભાવ ₹1,34,196 હતો, જે હવે ₹1.40 લાખની નજીક છે. એટલે કે માત્ર એક સપ્તાહમાં જ તેની કિંમતમાં ₹6,000નો વધારો થયો છે. તેનાથી પણ વધુ તેજી ચાંદીમાં આવી છે. 19 ડિસેમ્બરે ચાંદીની કિંમત ₹2.08 લાખ પ્રતિ કિલો હતી, જે હવે ₹2.40 લાખને પાર કરી ગઈ છે. એટલે કે એક સપ્તાહમાં જ તેના ભાવમાં ₹32,000નો જબરદસ્ત ઉછાળો આવ્યો છે.

આટલી તેજી પાછળ શું છે કારણ?

આંતરરાષ્ટ્રીય સ્તરે સોના અને ચાંદીની કિંમત તેમના રૅકોર્ડ ઉચ્ચ સ્તરે પહોંચી ગઈ છે, જેના કારણે સ્થાનિક બજારમાં પણ ભાવ સતત વધી રહ્યા છે.

ગોલ્ડ અને સિલ્વર ETFમાં રોકાણકારોની સંખ્યા ઝડપથી વધી રહી છે. બજારમાં ઘટાડા વચ્ચે લોકો સુરક્ષિત રોકાણ તરીકે સોના-ચાંદીના ETF તરફ વળી રહ્યા છે.

ઈલેક્ટ્રોનિક્સ, ગ્રીન ટૅક્નોલૉજી જેવા ક્ષેત્રોમાં ચાંદીની માંગ ઝડપથી વધી રહી છે, જેનાથી ઔદ્યોગિક માંગમાં વધારો થયો છે.

રાજકીય તણાવ, તેલ બજાર અને સંઘર્ષના કારણે રોકાણકારો જોખમથી બચવા માટે સોના-ચાંદીમાં વધુ ખરીદી કરી રહ્યા છે.

વિશ્વભરની કેન્દ્રીય બૅંકો દ્વારા પણ કિંમતી ધાતુઓની વધુ માત્રામાં ખરીદી કરવામાં આવી રહી છે, જેનાથી માંગ વધી રહી છે અને ભાવ ઉપર જઈ રહ્યા છે.

હવે રોકાણકારોએ શું કરવું જોઈએ?

નિષ્ણાતોનું કહેવું છે કે સોના અને ચાંદીની માંગ યથાવત્ રહેશે, પરંતુ ટૂંકા ગાળામાં તેમાં નફાવસૂલી જોવા મળી શકે છે અને ભાવમાં ઘટાડો આવી શકે છે. આથી, રોકાણકારોએ સાવધાનીપૂર્વક નાણાંનું રોકાણ કરવું જોઈએ. નિષ્ણાતો ભૌતિક સોના-ચાંદી ખરીદવાને બદલે ETF દ્વારા દર અઠવાડિયે કે મહિને ધીમે ધીમે રોકાણ કરવાની સલાહ આપે છે, જે લાંબા ગાળે વધુ નફો કરાવી શકે છે.