પેટ્રોલ વાહનો છોડી લોકોએ આ ઈંધણવાળા વાહનો ખરીદી શરૂ કરી! આંકડાએ ચોંકાવ્યા

Alternative Fuels Overtake Petrol Cars: ભારતીય ઓટોમોબાઇલ બજારમાં કાર ખરીદનારાઓની પસંદગીમાં ઐતિહાસિક પરિવર્તન નોંધાયું છે. લાંબા સમયથી બજારમાં સૌથી વધુ પસંદગી મેળવનારી પેટ્રોલ કાર્સની સરખામણીએ ગ્રાહકો હવે વૈકલ્પિક ઇંધણ તરફ ઝડપથી વળી રહ્યા છે. ઑગસ્ટ મહિનામાં પહેલીવાર એવું બન્યું છે જ્યારે CNG, હાઇબ્રિડ અને ઇલેક્ટ્રિક (EV) કાર્સનું સંયુક્ત વેચાણ પેટ્રોલ કાર્સ કરતાં આગળ નીકળી ગયું છે. આ ત્રણેય વિકલ્પોએ મળીને પેસેન્જર વ્હીકલના રિટેલ વેચાણમાં રેકોર્ડ 42% હિસ્સેદારી હાંસલ કરી લીધી છે, જ્યારે પેટ્રોલ કાર્સનો હિસ્સો ઘટીને 41%ના ઓલ-ટાઇમ નીચલા સ્તરે પહોંચી ગયો છે.

પેસેન્જર વ્હીકલ્સનું એકંદર વેચાણ વધ્યું, પેટ્રોલ કાર્સમાં 5%નો કડાકો

ઇંધણની પસંદગી બદલાવા છતાં દેશમાં કાર્સની એકંદર માંગમાં કોઈ ઘટાડો થયો નથી. ઑગસ્ટમાં પેસેન્જર વ્હીકલ્સનું રિટેલ વેચાણ વાર્ષિક ધોરણે 16% વધીને આશરે 4.01 લાખ યુનિટ નોંધાયું છે. ગયા વર્ષે ઑગસ્ટમાં પેટ્રોલ કાર્સનો માર્કેટ શેર 46% હતો, જે એક જ વર્ષમાં 5% ઘટીને 41% પર આવી ગયો છે. કાર ખરીદતી વખતે ગ્રાહકો હવે કિંમત અને ડિઝાઇન ઉપરાંત માઇલેજ, રનિંગ કોસ્ટ અને નવી ટેક્નોલોજી જેવા પરિબળોને પ્રાથમિકતા આપી રહ્યા છે.

CNG સેગમેન્ટમાં ઐતિહાસિક તેજી: કિયા પણ એન્ટ્રી માટે તૈયાર

એક રિપોર્ટ અનુસાર, પેસેન્જર વ્હીકલ સેગમેન્ટમાં એકલા CNG કાર્સની હિસ્સેદારી વધીને 25%ના રેકોર્ડ સ્તરે પહોંચી ગઈ છે, જે ગયા વર્ષે સમાન ગાળામાં 21% હતી. દિલ્હીમાં CNGના ભાવમાં તાજેતરમાં ₹6નો વધારો થયો હોવા છતાં, પેટ્રોલની સરખામણીએ ઓછી રનિંગ કોસ્ટ અને બજારમાં ઉપલબ્ધ નવા મોડલ્સને કારણે ગ્રાહકો CNGને ખૂબ પસંદ કરી રહ્યા છે. પ્રીમિયમ કાર બ્રાન્ડ ગણાતી કિયા ઇન્ડિયા પણ હવે ફેક્ટરી-ફિટેડ 'Kia Carens CNG' સાથે આ સેગમેન્ટમાં પ્રવેશવા જઈ રહી છે.

CNG માર્કેટ શેરમાં કંપનીઓનું પ્રદર્શન:

• મારુતિ સુઝુકી: દેશમાં વેચાયેલી કુલ CNG કાર્સમાં આશરે 71% હિસ્સો
• ટાટા મોટર્સ: આશરે 17% બજાર હિસ્સેદારી
• હ્યુન્ડાઇ: આશરે 9% માર્કેટ શેર

ડીઝલ કાર્સની સ્થિતિ અને ઇલેક્ટ્રિક વ્હીકલ્સમાં 52%નો ઉછાળો

બજારમાં વિકલ્પો ઓછા હોવા છતાં ડીઝલ વાહનોની હિસ્સેદારી ઑગસ્ટમાં લગભગ 17% રહી છે, ખાસ કરીને પેટ્રોલ સાથે ઇથેનોલ બ્લેન્ડિંગ (E20) અંગે ચાલી રહેલી ચર્ચાઓ વચ્ચે એક વર્ગ હજુ પણ ડીઝલ એન્જિન પસંદ કરી રહ્યો છે.

બીજી તરફ, ઇલેક્ટ્રિક કાર્સના વેચાણમાં વાર્ષિક ધોરણે 52%નો જબરદસ્ત ઉછાળો નોંધાયો છે અને કુલ વેચાણ આશરે 30,700 યુનિટે પહોંચ્યું છે. પેસેન્જર કાર માર્કેટમાં EVનો હિસ્સો ગયા વર્ષના 5.9%થી વધીને 7.7% થયો છે. ઇલેક્ટ્રિક કાર્સના સેગમેન્ટમાં ટાટા મોટર્સનો દબદબો અકબંધ છે, જેણે આશરે 43% માર્કેટ શેર સાથે ડિસેમ્બર 2025 પછીનું પોતાનું સર્વશ્રેષ્ઠ પ્રદર્શન જાળવી રાખ્યું છે. આ આંકડા દર્શાવે છે કે પેટ્રોલ હવે કાર ખરીદનારાઓ માટે આપોઆપ ડિફોલ્ટ વિકલ્પ રહ્યો નથી.