એક ઝટકામાં રોકાણકારોના 5 લાખ કરોડ ડૂબ્યા... આજે શેરબજારમાં ભૂકંપ, 1300 પોઇન્ટ તૂટ્યો સેન્સેક્સ
Summarized by AI; it may make mistakes. Check important info
Summarized by AI; it may make mistakes. Check important info
Sensex-Nifty Share Market Today : અમેરિકા, ઈઝરાયલ, ઈરાન યુદ્ધની અસર હજુ પણ ભારતીય શેર માર્કેટ પર જોવા મળી રહી છે અને સતત માર્કેટ ગગડી રહ્યું છે. યુદ્ધ પહેલા એટલે કે 27 ફેબ્રુઆરીએ BSE સેન્સેક્સ 81,287.19 પોઇન્ટ હતો, જે આજે (11 માર્ચે) 76,863.71 પર પહોંચી ગયો છે. એટલે 28 ફેબ્રુઆરીએ યુદ્ધ શરૂ થાય બાદ BSE સેન્સેક્સમાં 4,423.48નો જબરદસ્ત ઘટાડો થયો છે. આજે બેંચમાર્ક ઇન્ડેક્સ સેન્સેક્સ અને નિફ્ટીની શરૂઆત લગભગ સપાટ જોવા મળી હતી. આજે પણ સેન્સેક્સમાં 1500થી વધુ પોઇન્ટની તો નિફ્ટીમાં 450થી વધુ પોઇન્ટની ઉથલ-પાથલ જોવા મળી છે. આ કારણે રોકાણકારોના પાંચ લાખ કરોડ રૂપિયા ડૂબી ગયા છે.
સેન્સેક્સમાં 1500 પોઇન્ટની ઉથલ-પાથલ
BSE સેન્સેક્સની વાત કરીએ તો ગઈકાલે માર્કેટ 78,205.98 પોઇન્ટ પર બંધ થયા બાદ આજે સવારે 78,238.91 પોઇન્ટ પર ખુલ્યું હતું. ત્યારબાદ શરૂઆતથી લઈને દિવસના અંત સુધી 76,759.26થી 78,324.37 સુધીની ઉથલ-પાથલ જોવા મળી હતી. એટલે દિવસ દરમિયાન તેમાં 1,565.11 પોઇન્ટની ઉથલ-પાથલ જોવા મળી હતી. દિવસના અંતે સેન્સેક્સ 1,342.27 (-1.72%) પોઇન્ટના ઘટાડા સાથે 76,863.71 પર બંધ થયું છે.
નિફ્ટીમાં 450 પોઇન્ટની ઉથલપાથલ
જ્યારે નિફ્ટી 50 ગઈકાલે 24,261.60 પોઇન્ટ પર બંધ થયા બાદ આજે દિવસ દરમિયાન તેમાં 23,834.30થી 24,299.00 પોઇન્ટ સુધીનો ટ્રેડ જોવા મળ્યો હતો. એટલે કે તેમાં દિવસ દરમિયાન 464.7 પોઇન્ટની ઉથલપાથલ જોવા મળી હતી. છેવટે દિવસના અંતે તે 394.75 (1.63%) ઘટાડા સાથે 23,866.85 બંધ થયો હતો. અમેરિકા, ઈઝરાયલ અને ઈરાન વચ્ચે છેલ્લા 12 દિવસથી યુદ્ધ ચાલી રહ્યું છે, જેના કારણે આ સમયગાળામાં માત્ર ભારત જ નહીં અનેક દેશોના શેર માર્કેટમાં ધરખમ ઘટાડો થયો છે.
આ પણ વાંચો : વાયદા બજારમાં ઉથલ-પાથલ, ચાંદી ઓલ ટાઇમ હાઇથી 1.44 લાખ સસ્તી, સોનું પણ તૂટ્યું
બૅન્કિંગ અને ફાયનાન્સિયલ શેરો પર દબાણ
આજના શેર માર્કેટમાં સૌથી વધુ બૅન્કિંગ અને ફાયનાન્સિયલ શેરોમાં દબાણ જોવા મળ્યું છે. નિફ્ટી બૅંક ઇન્ડેક્સ બે ટકાથી વધુ તૂટીને 55,735ના સ્તર પર બંધ થયું છે. એક્સિસ બૅન્કમાં લગભગ 4.6 ટકાનો, બજાજ ફાયનાન્સમાં લગભગ 4.9 ટકાનો ઘટાડો થયો છે. તો કોટક બૅંક, એસબીઆઇ અને આઇસીઆઇસીઆઇ જેવા મોટા બૅન્કિંગ શેરોમાં પણ વેચવાલી જોવા મળી હતી. માર્કેટમાં બૅન્કિંગ સેક્ટરનો હિસ્સો મોટો હોવાથી તેની અસર ઇન્ડેક્સ પર જોવા મળી છે.
ઑટો સેક્ટરમાં પણ ઘટાડો
આજે ઑટો શેરોમાં પણ ઘટાડો જોવા મળ્યો છે. નિફ્ટી ઑટો ઇન્ડેક્સ લગભગ ત્રણ ટકાથી વધુ ઘટ્યો છે. મહિન્દ્રા એન્ડ મહિન્દ્રાના શેરમાં લગભગ પાંચ ટકાનો તો બજાજ ઑટો અને મારૂતિ સુઝિકીના શેરમાં પણ ઘટાડો જોવા મળ્યો છે. આ સેક્ટરમાં વેચવાલી વધતા માર્કેટની ધારણાને નબળી પાડી દીધી છે.
