ઉત્પાદન ક્ષેત્રની પ્રવૃત્તિઓ ઓગસ્ટમાં ધીમી પડીને પાંચ વર્ષના તળિયે ઊતરી

ઓગસ્ટનો મેન્યુફેક્ચરિંગ પીએમઆઈ ઘટીને ૫૨.૮ રહ્યો, જે જુલાઈમાં ૫૩.૫ હતો : વિદેશથી ઓર્ડર વધ્યા
અમદાવાદ : ભારતનું ઉત્પાદન ક્ષેત્ર ઓગસ્ટમાં ધીમું પડયું હતું. ઉત્પાદન ધીમું થવા અને નવા ઓર્ડર વૃદ્ધિને કારણે ઉત્પાદન પ્રવૃત્તિમાં પાંચ વર્ષમાં સૌથી ધીમી વૃદ્ધિ જોવા મળી છે. આજે જાહેર કરાયેલ ઓગસ્ટનો HSBC ઇન્ડિયા મેન્યુફેક્ચરિંગ પરચેઝિંગ મેનેજર્સ ઇન્ડેક્સ (પીએમઆઈ) ઘટીને ૫૨.૮ રહ્યો હતો, જે જુલાઈમાં ૫૩.૫ હતો. આ સતત ત્રીજા મહિને ઘટાડો નોંધાયો છે.
ઓગસ્ટનો આંકડો પણ ૫૪.૨ ની લાંબા ગાળાની સરેરાશથી નીચે હતો. ૫૦થી ઉપરનું પીએમઆઈ વાંચન ઉત્પાદન પ્રવૃત્તિમાં વધારો દર્શાવે છે, જ્યારે ૫૦થી નીચેનું વાંચન ઘટાડો દર્શાવે છે. આનો અર્થ એ કે ઉત્પાદન ક્ષેત્ર હજુ પણ વૃદ્ધિ કરી રહ્યું છે, પરંતુ તેની ગતિ ધીમી પડી છે.
ઓગસ્ટમાં ઉત્પાદન સૂચકાંક ઓગસ્ટ ૨૦૨૧ પછીના સૌથી નીચા સ્તરે આવી ગયો છે. આનો અર્થ એ થયો કે કંપનીઓ ઉત્પાદન વધારી રહી છે, પરંતુ પાછલા વર્ષોની તુલનામાં મુખ્યત્વે નબળી માંગ અને નવા ઓર્ડરમાં ધીમી વૃદ્ધિને કારણે પીછેહટ નોંંધાવી હતી. ઓગસ્ટમાં નવો વ્યવસાય વધતો રહ્યો, પરંતુ તેની ગતિ પાંચ વર્ષમાં સૌથી ધીમી રહી હતી. ઓગસ્ટમાં વિદેશથી ઓર્ડર વધ્યા હતા.
કંપનીઓએ જણાવ્યું હતું કે મુશ્કેલ બજાર પરિસ્થિતિઓ અને કેટલાક ઉત્પાદનોની નબળી માંગને કારણે નવા ઓર્ડરની ગતિ ધીમી પડી હતી.
નબળી માંગને કારણે રોજગાર પર પણ અસર પડી હતી. લગભગ અઢી વર્ષમાં પહેલીવાર ઉત્પાદન ક્ષેત્રમાં રોજગારમાં ઘટાડો થયો હતો. જોકે, આ ઘટાડો ખૂબ જ સામાન્ય હતો. જે કંપનીઓએ તેમના કાર્યબળમાં ઘટાડો કર્યો હતો તેઓએ મુખ્ય કારણ તરીકે ઓછી વ્યવસાયિક જરૂરિયાતો દર્શાવી હતી.
નબળી માંગને કારણે કોર્પોરેટ ખરીદી પર પણ અસર પડી હતી. કાચા માલ અને અન્ય ઇનપુટ્સની ખરીદી સતત ૬૨મા મહિનામાં વધી હતી, પરંતુ આ સમયગાળા દરમિયાન ગતિ સૌથી ધીમી હતી.
કેટલીક કંપનીઓએ તેમની ઇન્વેન્ટરી વધારવા માટે ખરીદી ચાલુ રાખી, જ્યારે અન્યોએ નબળી માંગને કારણે તેમની ખરીદી ઘટાડી હતી.