દેવ ગ્રુપ પરના દરોડામાં રૂ.50 લાખની રોકડ અને 50 લાખના દાગીના પકડાયા

(પ્રતિનિધિ તરફથી)અમદાવાદ,શુક્રવાર
આવકવેરા ખાતાના અધિકારીઓએ આજે સવારથી જામનગરના દેવ ગ્રુપના 15 સ્થળ પર પાડેલા દરોડામાં રૂ.50 લાખ રોકડા અને રૂ.50 લાખના દાગીના મળીને એક કરોડની મત્તા થોડા કલાકોમાં જ મળી આવ્યા છે. આ ગ્રુપ પરના દરોડા દરમિયાન હાથ લાગેલી વિગતોને ધ્યાનમાં લેતા દરોડાના સ્થળ 15થી વધીને 20 સુધી પહોંચી જવાની સંભાવના છે. તેમને ત્યાંથી રૂ.50 લાખની રોકડ અને રૂ.50 લાખના દાગીના હાથ લાગ્યા છે. જોકે રોકાડની ગણતરી અને દાગીનાનું મૂલ્યાંક હજી પૂરી થઈ નથી.
અમદાવાદ, જામનગર, માળીયા અને મિયાણાના 4-4 સ્થળોએ પાડેલા દરોડામાં દેવ ગ્રુપની કંપની દેવ સોલ્ટ પ્રાઈવેટ લિમિટેડ, મૈત્રેયી ડેવલપર્સ, ડી.કે. એન્ટરપ્રાઈસ, અરિહંત અર્થમુવર્સ એન્ડ કોન્ટ્રાક્ટર્સ, વિમલ કીર્તિ કામદાર, વિવેક સોમાણી, રૂપલ કિરણ વ્યાસના ઘર અને ઓફિસને આવરે લીવામાં આવ્યા છે. દરોડાની ઝપટમાં આવેલાઓમાં તેમની ગ્રુપ કંપનીઓ તથા તેમની સાથેના વેપારમાં સંકળાયેલા લોકોનો સમાવેશ થાય છે. તેમાંથી કેટલાક ચાર્ટર્ડ એકાઉન્ટન્ટ તરીકે ગ્રુપ સાથે સંકળાયેલા છે.દેવ સોલ્ટ પ્રાઈવેટ લિમિટેડ હાઈ ક્વોલિટી સોલ્ટના ઉત્પાદક છે. તેમજ બેસ્ટ ગ્રેડનું લિક્વિડ બ્રોમાઈન પણ તૈયાર કરે છે. દેવ ગ્રુપના જ હિતેન્દ્ર ઝાલાને ત્યાં પણ દરોડા પાડવામાં આવ્યા છે.
અમદાવાદમાં વૈષ્ણો દેવી નજીક શાંપ્ગ્રામ નજીક નોર્થ પાક્ર વિલામાંના દેવ ગ્રુપના એકમ પર, રાજપથ ક્લબની પાછળ આવેલા દેવ હાઉસ પર પણ દરોડા પાડવામાં આવ્યા છે. તેમ જ અમદાવાદના ઘૂમા વિસ્તારમાં આરોહી ક્લબ પાસે આવલા દેવ ગ્રુપના એકમ પર પણ દરોડા પાડવામાં આવ્યા છે.
દેવ ગ્રુપના પ્રમોટર્સ બિલ વિના કરવામાં આવતા સોલ્ટના વેપારના નાણાં હોસ્પિટાલિટીના તથા અન્ય બિઝનેસ તરફ ડાયવર્ટ કરવામાં આવતા હોવાનું પણ ધ્યાનમાં આવ્યું છે. દેવ ગ્રુપની કંપનીઓએ રોકડમાં અને બિલ વિનાના ખાસ્સા વહેવારો કર્યા હોવાનું પણ ધ્યાનમાં આવ્યું છે. રોકડની આવકના આ નાણાં રિયલ એસ્ટેટના બિઝનેસ તરફ ડાયવર્ટ કરવામાં આવતા હતા.




