Business

જેપી મોર્ગન ઈન્ડેક્સમાં ભારતના જોડાવાથી ત્રણ ઊભરતાં બજારોનું વેઈટેજ ઘટશે

By GS Team
26 Jun 20242 mins read
This article was originally published on 26 Jun 2024
જેપી મોર્ગન ઈન્ડેક્સમાં ભારતના જોડાવાથી ત્રણ ઊભરતાં બજારોનું વેઈટેજ ઘટશે

નવી દિલ્હી : થાઈલેન્ડ, પોલેન્ડ અને ચેક રિપબ્લિક એ ભારતના ત્રણ ઉભરતા બજાર સ્પર્ધકો છે, જેમને આગામી ૧૦ મહિનામાં જેપી મોર્ગન ઇમજગ માર્કેટ્સ બોન્ડ ઈન્ડેક્સમાં પોતપોતાના વેઈટેજમાં ઘટાડાનો સામનો કરવો પડે તેવી શક્યતા છે એમ એચએસબીસીના વિશ્લેષકોએ તાજેતરમાં જણાવ્યું હતું. ૨૮ જૂન, ૨૦૨૪થી ભારત સરકારની સિક્યોરિટીઝ આ ઇન્ડેક્સમાં સામેલ થવાનું શરૂ કરશે.

ઇન્ડેક્સમાં ભારતના ૧૦ ટકા વેઇટિંગમાં એડજસ્ટમેન્ટથી ઇન્ડેક્સમાં અન્ય ઉભરતા બજાર સમકક્ષો માટે વેઇટિંગમાં ફેરફાર જોવા મળશે, જે તેમના વેઈટેજમાં ઘટાડા તરફ દોરી જશે.  જો કે, ભારતમાં ફેરફારની અસર વધુ નહીં પડે, કારણ કે ૧૦ મહિનાના સમયગાળામાં ભારતને તબક્કાવાર રીતે ઈન્ડેક્સમાં સંપૂર્ણ રીતે સામેલ કરવામાં આવશે.

દરમિયાન, ૨૧ સપ્ટેમ્બર, ૨૦૨૩ ના રોજ તેમના સમાવેશ અંગેની જાહેરાત બાદથી ભારતીય સરકારી બોન્ડ્સમાં ૧૦.૪ બિલિયન ડોલરનો પ્રવાહ જોવા મળ્યો છે. તેની સરખામણીમાં, ૨૦૨૩ના પ્રથમ આઠ મહિનામાં માત્ર ૨.૪ બિલિયન ડોલરનું રોકાણ આવ્યું હતું અને ૨૦૨૧ અને ૨૦૨૨માં ૧ બિલિયન ડોલરનો વાર્ષિક વિદેશી મૂડીનો પ્રવાહ નોંધવામાં આવ્યો હતો.

સપ્ટેમ્બર ૨૦૨૩ થી સરકારી બોન્ડ્સમાં વિદેશી રોકાણ પર નજર કરીએ તો, ઇન્ડેક્સ-લિંક્ડ બોન્ડ્સમાં માત્ર ૮.૩ બિલિયન ડોલરનું  રોકાણ કરવામાં આવ્યું હતું અને એકલા ચાર મુદ્દાઓ રોકાણમાં ૬૬ ટકા હિસ્સો ધરાવે છે.

મોટાભાગના ઇન્ડેક્સ-પાત્ર સરકારી બોન્ડ્સમાં વિદેશી રોકાણની સ્થિતિ હજુ પણ ઉભરતા બજારના ઇન્ડેક્સમાં તેમના સંભવિત વેઈટેજ કરતાં ઓછી છે.  

સરકારી બોન્ડ્સ માર્કેટનું કદ ૧૧૨ સિક્યોરિટીઝ સાથે રૂ. ૧.૩ લાખ કરોડની આસપાસ છે. 

જો કે, કોઈપણ રોકાણ પ્રતિબંધો વિના વિદેશી રોકાણને માત્ર નિર્દિષ્ટ લિક્વિડ બેન્ચમાર્ક સિક્યોરિટીઝમાં જ મંજૂરી આપવામાં આવે છે જે સંપૂર્ણપણે અક્સેસિબલ રૂટ હેઠળ આવતી સિક્યોરિટીઝ તરીકે વર્ગીકૃત કરવામાં આવે છે.