ટ્રમ્પના ટેરિફની અસર છતાં ભારતનું અર્થતંત્ર, ભારતની GDPને લઈને IMFએ આપી ખુશખબર

આંતરરાષ્ટ્રીય નાણાકીય ભંડોળ (ઇન્ટરનેશનલ મોનેટરી ફંડ - IMF) એ ભારતના અર્થતંત્ર માટે સારા સમાચાર આપ્યા છે. તેના તાજેતરના વર્લ્ડ ઇકોનોમિક આઉટલુક (WEO) રિપોર્ટમાં, IMFએ 2025-26 માટે ભારતના GDP વૃદ્ધિ દરનો અંદાજ 6.4% થી વધારીને 6.6% કર્યો છે. આ સુધારો એ વાતનો પુરાવો છે કે યુનાઇટેડ સ્ટેટ્સ દ્વારા ભારતીય નિકાસ પર લાદવામાં આવેલા નવા ટેરિફની અસર છતાં, ભારતનું અર્થતંત્ર મજબૂત ગતિ જાળવી રહ્યું છે.

મજબૂત શરૂઆતે વધાર્યો ભરોસો

IMF રિપોર્ટ અનુસાર, એપ્રિલ-જૂન ક્વાર્ટરમાં ભારતના અર્થતંત્રમાં 7.8% નો શાનદાર વધારો નોંધાયો હતો, જે છેલ્લા પાંચ ક્વાર્ટરમાં શ્રેષ્ઠ પ્રદર્શન છે. આ ઉત્સાહ અને ગતિએ અમેરિકાની ટેરિફની અસરને ઓછી કરી. IMF એ જણાવ્યું હતું કે, '2025 માટે અમારું અનુમાન પહેલા કરતા સારું છે. પ્રથમ ક્વાર્ટરની મજબૂત શરૂઆત ટેરિફની અસરને સરભર કરે છે, જોકે 2026 માટે આગાહી થોડી ઓછી થઈ છે." ભારતમાં મજબૂત ઘરેલૂ માગ, મેન્યુફેક્ચરિંગ સેક્ટરમાં તેજી અને સરકારની મૂડી ખર્ચ નીતિઓએ આ ગતિ જાળવી રાખી છે.

આ પણ વાંચો: રૂપિયો ફરી ગગડ્યો, ડૉલર સામે 12 પૈસા ગબડીને 88.80ના નવાં તળિયે પહોંચ્યો

વિશ્વ બેંકે પણ પોતાનું અનુમાન વધાર્યું

આ મહિનાની શરૂઆતમાં IMFએ ચાલુ નાણાકીય વર્ષ (2024-25) માટે ભારત માટે GDPની આગાહી 6.3% થી વધારીને 6.5% કરી હતી. વિશ્વ બેંકનું કહેવું છે કે ભારત નજીકના ભવિષ્યમાં વિશ્વની સૌથી ઝડપથી વિકસતી મુખ્ય અર્થવ્યવસ્થા રહેશે. આ ભારત માટે એક મોટી સિદ્ધિ છે, જે વૈશ્વિક આર્થિક પડકારો વચ્ચે પણ પોતાની તાકાત દર્શાવી રહ્યું છે. જ્યારે IMFએ 2025-26 માટેનો અંદાજ વધારીને 2026-27 માટે GDPની વૃદ્ધિ 6.4% થી ઘટાડીને 6.2% કરી. આ થોડો ઘટાડો વૈશ્વિક વેપાર અને અન્ય આર્થિક પડકારોમાં અનિશ્ચિતતાઓને કારણે છે. અગાઉ, એપ્રિલ 2025 ના તેના અહેવાલમાં IMF એ 2025 માટે 6.2% વૃદ્ધિ અને 2026 માટે 6.3% વૃદ્ધિનો અંદાજ લગાવ્યો હતો.

ગ્લોબલ ઇકોનોમી પર નજર

IMF એ પણ તેના વૈશ્વિક અંદાજો શેર કર્યા. અહેવાલ મુજબ, વૈશ્વિક આર્થિક વૃદ્ધિ 2024 માં 3.3% થી ઘટીને 2025 માં 3.2% અને 2026 માં 3.1% થવાની ધારણા છે. આ જુલાઈ કરતા થોડું સારું છે, પરંતુ ઓક્ટોબર 2024 ના અગાઉના અંદાજો કરતા 0.2% ઓછું છે. IMF એ આ મંદીને સંરક્ષણવાદી નીતિઓ, વેપાર અનિશ્ચિતતા અને વ્યાપક આર્થિક પડકારોને આભારી છે. ઉભરતા અને વિકાસશીલ દેશોમાં વૃદ્ધિ 2024 માં 4.3% થી ઘટીને 2025 માં 4.2% અને 2026 માં 4% થવાની ધારણા છે. IMF અને વિશ્વ બેંકના આ અંદાજો ભારતની આર્થિક શક્તિને પ્રતિબિંબિત કરે છે. વૈશ્વિક પડકારો છતાં, ભારતનું મજબૂત પ્રદર્શન અને સરકારી નીતિઓ તેને વિશ્વની સૌથી ઝડપથી વિકસતી અર્થવ્યવસ્થા બનવામાં મદદ કરી રહી છે.

આ પણ વાંચો: GST બાદ મિડલ ક્લાસ માટે વધુ બે ગુડ ન્યૂઝ! RBI કરી શકે છે મોટી જાહેરાત