રૂપિયામાં ઐતિહાસિક ગાબડું: ડૉલર સામે 93.13 ની રેકોર્ડબ્રેક નીચલી સપાટીએ, ક્રૂડ ઓઈલ $112

Rupees against Dollar News : અખાતી દેશોમાં ચાલી રહેલા ભીષણ યુદ્ધની સીધી અસર હવે ભારતીય અર્થતંત્ર અને સામાન્ય જનતાના ખિસ્સા પર જોવા મળી રહી છે. મિડલ ઈસ્ટમાં ચાલી રહેલા સંઘર્ષને કારણે વૈશ્વિક એનર્જી માર્કેટમાં ધરખમ ફેરફારો જોવા મળી રહ્યા છે. ક્રૂડ ઓઈલની કિંમતોમાં સતત વધારો અને ડૉલરની મજબૂતીને કારણે ભારતીય રૂપિયો અત્યાર સુધીના સૌથી ખરાબ તબક્કામાંથી પસાર થઈ રહ્યો છે.

ડૉલર સામે રૂપિયો તળીયે 

ઈરાન અને ઈઝરાયલ વચ્ચેના યુદ્ધને કારણે ઉભી થયેલી તેલ પુરવઠાની કટોકટીએ ભારતીય ચલણ 'રૂપિયા'ની કમર તોડી નાખી છે. સોમવારે રૂપિયો 92.62 ની સપાટીએ પહોંચ્યા બાદ આજે તેણે તમામ રેકોર્ડ તોડી નાખ્યા છે. ડૉલર સામે રૂપિયો 93.13 ની સર્વોચ્ચ નીચલી સપાટીને સ્પર્શી ગયો છે. રૂપિયાના આ ઐતિહાસિક ઘટાડાને કારણે આયાત મોંઘી થશે, જેની સીધી અસર ભારતમાં મોંઘવારી પર પડી શકે છે.

ક્રૂડ ઓઈલ 112 ડૉલર નજીક 

તાજેતરના ડેટા અને ચાર્ટ મુજબ, બ્રેન્ડ ક્રૂડ ઓઈલ WTI ફ્યુચર્સમાં 4.76% નો વધારો નોંધાયો છે, જેનાથી તેની કિંમત પ્રતિ બેરલ $112 પર પહોંચી ગઈ છે. ઉલ્લેખનીય છે કે જ્યારથી અખાતી દેશોમાં યુદ્ધ શરૂ થયું છે, ત્યારથી બ્રેન્ટ ક્રૂડના ભાવમાં અંદાજે 40% નો તોતિંગ વધારો જોવા મળ્યો છે. ઉર્જા ક્ષેત્રે આયાત પર નિર્ભર ભારત જેવા દેશો માટે આ સ્થિતિ આર્થિક જોખમોમાં વધારો કરી રહી છે.

શા માટે તૂટી રહ્યો છે રૂપિયો?

ઓઈલના વધતા ભાવ: ભારત પોતાની જરૂરિયાતનું મોટાભાગનું તેલ આયાત કરે છે. તેલ મોંઘું થતા ડૉલરની માંગ વધે છે, જે રૂપિયાને નબળો પાડે છે.

મૂડી પ્રવાહમાં ઘટાડો: વૈશ્વિક અનિશ્ચિતતાને કારણે વિદેશી રોકાણકારો ભારતીય બજારમાંથી નાણાં પાછા ખેંચી રહ્યા છે.

સપ્લાય ચેઈનમાં અવરોધ: દાયકાઓ પછી ઉર્જા બજારમાં આટલી મોટી સપ્લાય ડિસ્ટ્રપ્શન જોવા મળી છે, જેની અસર ગ્લોબલ માર્કેટ પર પડી રહી છે.

નિષ્ણાતોના મતે જો અખાતી દેશોમાં તણાવ જલ્દી ઓછો નહીં થાય, તો આગામી દિવસોમાં રૂપિયો હજુ પણ વધુ નબળો પડી શકે છે અને પેટ્રોલ-ડીઝલના ભાવમાં મોટો ઉછાળો આવી શકે છે.