ક્રુડના આયાત બિલમાં ભારતને ચાલું નાણાં વર્ષમાં 15 ટકા ફાયદો

મુંબઈ : ક્રુડ તેલના આંતરરાષ્ટ્રીય ભાવમાં ઘટાડા ઉપરાંત રશિયા ખાતેથી સસ્તા ભાવે પૂરવઠાને પરિણામે વર્તમાન નાણાં વર્ષના પ્રથમ છ મહિનામાં દેશનું ક્રુડ તેલનું આયાત બિલ વાર્ષિક ધોરણે ૧૪.૭૦ ટકા નીચું રહી ૬૦.૭૦ અબજ ડોલર રહ્યું છે. ગયા નાણાં વર્ષના પ્રથમ છ મહિનામાં આ આંક ૭૧.૨૦ અબજ ડોલર રહ્યો હતો એમ પેટ્રોલિયમ પ્લાનિંગ એન્ડ એનાલિસિસ સેલના ડેટા જણાવે છે.

ઓર્ગેનાઈઝેશન ઓફ પેટ્રોલિયમ એકસપોર્ટિંગ કન્ટ્રીસ અને સાથી દેશો દ્વારા ક્રુડ તેલના પૂરવઠામાં વધારાને કારણે ભાવ નીચા જોવા મળી રહ્યા છે.  વર્તમાન નાણાં વર્ષના પાછલા છ મહિનાના પ્રારંભિક મહિના એટલે  કે ઓકટોબરમાં પણ ભાવ નોધપાત્ર ઘટી પ્રતિ બેરલ ૬૨ ડોલરની અંદર સરકી ગયા છે, તેનો પણ ભારતને લાભ મળી રહેશે. 

વર્તમાન સંપૂર્ણ નાણાં વર્ષમાં ક્રુડ તેલનું  આયાત બિલ  ગયા વર્ષની તુલનાએ  નીચું રહેવાની શકયતા જોવાઈ રહી છે. 

સપ્ટેમ્બરમાં સમાપ્ત થયેલા છ મહિનામાં દેશની ક્રુડ તેલની આયાત સાધારણ વધી ૧૨.૧૨ કરોડ ટન રહેવા છતાં બિલમાં ઘટાડો જોવા મળ્યો છે. ગયા નાણાં વર્ષના પ્રથમ છ મહિનામાં ૧૨.૦૭ કરોડ ટન આયાત કરાયું હતું. 

ભારત તેની આવશ્યકતાના ૮૦ ટકાથી વધુ ક્રુડ તેલ આયાત કરે છે. 

પ્રાપ્ત ડેટા પ્રમાણે ઓકટોબરના પ્રથમ પખવાડિયામાં રશિયા ખાતેથી ક્રુડ તેલની આયાત  વધી પ્રતિ દિન ૧૮ લાખ બેરલ જોવા મળી રહી છે.  જે સપ્ટેમ્બરની સરખામણીએ વીસ લાખ બેરલ વધુ છે. ભાવમાં પણ ડિસ્કાઉન્ટ મળી રહ્યું છે.