ઐતિહાસિક તેજી : સોનું પ્રથમવાર ₹1.50 લાખ અને ચાંદી ₹3.28 લાખની સર્વોચ્ચ ટોચે

Silver and Gold Price News : ભારતીય વાયદા બજાર(MCX)માં મંગળવારે, 20 જાન્યુઆરી, 2026ના રોજ સોના અને ચાંદીના ભાવે તમામ રૅકોર્ડ તોડીને એક નવો ઇતિહાસ રચ્યો છે. સોનાના ભાવે પ્રથમ વખત પ્રતિ 10 ગ્રામ ₹1,50,000ની સપાટી વટાવી ગયા બાદ હાલ 1,49,951 પર ટ્રેડ થઈ રહ્યો છે. જ્યારે ચાંદી પણ ₹3,28,000ની નજીક પહોંચ્યા બાદ હાલ 3,21,335 પ્રતિ કિલો પર ટ્રેડ થઈ રહ્યી છે. આ ઐતિહાસિક તેજી પાછળ વૈશ્વિક કોમોડિટી બજારોમાં મજબૂત સંકેતો, અને રોકાણકારોની ભારે ખરીદી મુખ્ય કારણભૂત છે.

ચાંદીના ભાવમાં તોતિંગ વધારો

આજે 20 જાન્યુઆરી, 2026ના રોજ રાત્રે 10.00 વાગ્યાના સમયગાળા દરમિયાન MCX પર ચાંદીનો ભાવ રૂ. 3,21,335 પ્રતિ કિલો પર ટ્રેડ થઈ રહ્યો હતો. દિવસ દરમિયાન ચાંદીએ રૂ. 3,27,998ની વિક્રમી સપાટીને પણ સ્પર્શ કર્યો હતો. માત્ર એક જ દિવસમાં ચાંદીના ભાવમાં રૂ. 11,060 (3.56%) જેટલો તોતિંગ વધારો નોંધાયો છે.

સોનું પ્રથમવાર દોઢ લાખને પાર 

આજના કારોબારમાં સોનાએ અભૂતપૂર્વ ઉછાળો નોંધાવ્યો છે. MCX પર 5 ફેબ્રુઆરી, 2026ના વાયદામાં સોનાના ભાવે નવી ઊંચાઈ સર કરી:

જૂનો બંધ ભાવ: સોમવારે સોનાનો વાયદો ₹1,45,639 પ્રતિ 10 ગ્રામ પર બંધ થયો હતો.

આજનો ખૂલતો ભાવ: આજે બજાર ખૂલતા સમયે સોનું ₹1,45,775ના ભાવે ખૂલ્યું હતું.

નવી ઐતિહાસિક સપાટી: દિવસ દરમિયાન સોનાએ ₹1,52,500ની સર્વોચ્ચ સપાટીને સ્પર્શ કર્યો હતો, જે તેનો અત્યાર સુધીનો સર્વોચ્ચ ભાવ છે.

આજનો ઉછાળો: સોનામાં ગઈકાલના બંધ ભાવની સરખામણીમાં આજે કુલ ₹4321નો જોરદાર ઉછાળો જોવા મળી રહ્યો છે.  જોકે હાલમાં સોનું ₹1,49,951 પર ટ્રેડ થઈ રહ્યું છે.

ચાંદીમાં પણ આગ ઝરતી તેજી 

સોનાની સાથે સાથે ચાંદીમાં પણ આજે રૅકોર્ડબ્રેક તેજી જોવા મળી. MCX પર 5 માર્ચ, 2026ના વાયદામાં ચાંદીના ભાવમાં તોફાની ઉછાળો નોંધાયો:

જૂનો બંધ ભાવ: સોમવારે ચાંદીનો વાયદો ₹3,10,275 પ્રતિ કિલોગ્રામ પર બંધ થયો હતો.

આજનો ખૂલતો ભાવ: આજે બજાર ખૂલતા સમયે ચાંદી ₹3,06,499 પર ખૂલી હતી.

નવી ઐતિહાસિક સપાટી: ખૂલ્યા બાદ બજારમાં આવેલી જોરદાર તેજીને કારણે ચાંદીએ ₹3,27,998ની ઓલ-ટાઇમ હાઇ સપાટી બનાવી હતી.

આજનો ઉછાળો: હાલમાં ચાંદી ગઈકાલના બંધ ભાવની સરખામણીમાં આજે ₹11,060નો જંગી ઉછાળો દર્શાવે છે. જોકે હાલમાં તે ₹3,21,335 પર કારોબાર કરી રહી છે.

બંને કિંમતી ધાતુઓમાં આવેલી આ ઐતિહાસિક તેજીને કારણે રોકાણકારોમાં ભારે ઉત્સાહનો માહોલ છે, જ્યારે સામાન્ય ખરીદદારો માટે સોનું-ચાંદી વધુ મોંઘું બન્યું છે.

રાત્રે 10 વાગ્યા સુધીમાં 8,63,460 કિલો ચાંદીનું કામકાજ નોંધાયું

માર્કેટ ડેટા મુજબ, ચાંદીમાં હાલ 'લોન્ગ બિલ્ડઅપ'ની સ્થિતિ જોવા મળી રહી છે. આનો અર્થ એ છે કે રોકાણકારો મોટા પાયે ચાંદીની ખરીદી કરી રહ્યા છે અને ઓપન ઈન્ટરેસ્ટમાં પણ 4.43%નો વધારો થયો છે. ટ્રેડિંગ વોલ્યુમની વાત કરીએ તો રાત્રે 10 વાગ્યા સુધીમાં 8,63,460 કિલો ચાંદીનું કામકાજ નોંધાયું હતું, જેની અંદાજિત કિંમત 2,761,119 લાખ રૂપિયા થાય છે.

કેમ વધી રહ્યા છે ભાવ?

નિષ્ણાતો માને છે કે, વૈશ્વિક સ્તરે ઔદ્યોગિક માંગમાં થયેલો વધારો અને સુરક્ષિત રોકાણ તરીકે ચાંદી તરફ રોકાણકારોનો ઝુકાવ આ તેજી પાછળનું મુખ્ય કારણ છે. ખાસ કરીને સોલર પેનલ અને ઈલેક્ટ્રિક વાહનોના ઉત્પાદનમાં ચાંદીનો ઉપયોગ વધતા આંતરરાષ્ટ્રીય બજારમાં તેની ભારે ખેંચતાણ જોવા મળી રહી છે.