ચાંદીમાં ભાવમાં 6 હજારનો વધારો, સોનાના ભાવમાં સતત ઘટાડા બાદ બ્રેક, જાણો લેટેસ્ટ રેટ

Gold and Silver Price: મંગળવારે સરાફા બજારમાં સોના અને ચાંદીના ભાવમાં જોરદાર તેજી જોવા મળી હતી. ખાસ કરીને ચાંદીના ભાવમાં 2.34 ટકા એટલે કે અંદાજિત 6,000 રૂપિયાનો વધારો થતા તે 2,62,500 પ્રતિ કિલોગ્રામ પર પહોંચી ગઈ છે. બીજી તરફ, છેલ્લા ત્રણ દિવસથી સોનાના ભાવમાં જોવા મળી રહેલા ઘટાડા પર આજે પૂર્ણ વિરામ મુકાયું. 24 કેરેટ સોનાના ભાવમાં 1,050 (લગભગ 1 ટકા) રૂપિયાનો ઉછાળો આવતા તે 1,61,300 પ્રતિ 10 ગ્રામના સ્તરે પહોંચી ગયું છે.

કેમ વધી રહ્યા છે ભાવ?

નિષ્ણાતોના મતે, વૈશ્વિક સંકેતો નબળા હોવા છતાં ભૂ-રાજનૈતિક તણાવને કારણે રોકાણકારો સલામત રોકાણ તરીકે સોના-ચાંદી તરફ વળ્યા છે. સ્થાનિક બજારમાં રૂપિયાની નબળાઈને કારણે ભારતીય બજારમાં સોનાના ભાવ વૈશ્વિક મંદીથી અલગ રહીને વધ્યા છે. જોકે, ફેડરલ રિઝર્વના સ્પષ્ટ વલણ વગર કિંમતોમાં હજુ પણ ભારે ઉતાર ચઢાવ જોવા મળી શકે છે.

વૈશ્વિક બજાર અને મોંઘવારીનો ડર

આંતરરાષ્ટ્રીય સ્તરે સ્થિતિ થોડી અલગ છે, જ્યાં સોનું ઘટીને 5,003.68 ડોલર અને ચાંદી 80.46 ડોલર પ્રતિ ઔંસ પર ટ્રેડ કરી રહ્યા હતા. નિષ્ણાતો માને છે કે ખાડી દેશોમાં વધતા સંઘર્ષને કારણે તેલના ભાવ વધી શકે છે, જે મોંઘવારીમાં વધારો કરશે. આ સ્થિતિમાં કેન્દ્રીય બેંકો વ્યાજ દરોમાં કાપ મૂકવામાં વિલંબ કરી શકે છે, જે સોનાની તેજી પર મર્યાદા લાગી શકે છે. હાલમાં તમામ રોકાણકારોની નજર ફેડરલ ઓપન માર્કેટ કમિટી (FOMC)ની બેઠક પર ટકેલી છે.

આ પણ વાંચો: VIDEO: ગુજરાત પોલીસ માટે શરમજનક ઘટના! પાટણમાં 20 લોકોનું ટોળું જોઈને પોલીસ ભાગી

વર્ષ 2025માં સોનું 75% અને ચાંદી 167% મોંઘી થઈ

31 ડિસેમ્બર 2024ના રોજ 24 કેરેટ સોનાનો ભાવ રૂ.76,162 હતો, જે 31 ડિસેમ્બર 2025 સુધીમાં રૂ.57,033 વધીને રૂ.1,33,195 પર પહોંચ્યો હતો. આ ગાળા દરમિયાન ચાંદીમાં રૂ.1,44,403નો તોતિંગ વધારો થયો. 31 ડિસેમ્બર 2024ના રોજ એક કિલો ચાંદીની કિંમત રૂ. 86,017 હતી, જે વર્ષ 2025ના અંતિમ દિવસે રૂ. 2,30,420 પ્રતિ કિલો થઈ ગઈ હતી. ટકાવારીની દૃષ્ટિએ જોઈએ તો વર્ષ 2025માં સોનાએ 75% તો ચાંદીએ 167%એ રિટર્ન આપ્યું છે.