ચાંદીના ભાવમાં 10 હજારનો ઉછાળો! સોનું પણ ચમક્યું, મિડલ ઈસ્ટમાં શાંતિથી બુલિયન માર્કેટ ગરમાયું

Gold Silver Price Today: અમેરિકા અને ઈરાન વચ્ચે શાંતિ સમજૂતી થવાની વધતી આશાને કારણે શુક્રવારે આંતરરાષ્ટ્રીય અને સ્થાનિક બજારમાં સોનાના ભાવમાં જોરદાર ઉછાળો જોવા મળ્યો છે. અમેરિકન પ્રમુખ ડોનાલ્ડ ટ્રમ્પ દ્વારા ઈરાન સામેના સૈન્ય હુમલા રદ કરવાની જાહેરાત અને સમજૂતીની વાતચીત અંતિમ તબક્કામાં હોવાના નિવેદનથી રોકાણકારોનો ભરોસો મજબૂત થયો છે. 

માર્કેટ એક્સપર્ટ્સના જણાવ્યા અનુસાર, ભલે આ ડીલમાં હજુ પણ કેટલીક અનિશ્ચિતતાઓ અને ખામીઓ હોય, પરંતુ બજાર અત્યારે તેજીમાં છે. આ વૈશ્વિક ઘટનાક્રમને કારણે ઓઇલની કિંમતો, અમેરિકન ડૉલર ઇન્ડેક્સ અને બૉન્ડ યીલ્ડમાં ઘટાડો નોંધાયો છે, જેના સીધા ફાયદા તરીકે સોના અને અન્ય જોખમી એસેટ્સના ભાવ ઉપર ચઢ્યા છે. આગામી સમયમાં આ શાંતિ મંત્રણામાં થનારી પ્રગતિ જ સોના-ચાંદીના ભવિષ્યની દિશા નક્કી કરશે.

સોનાના ભાવમાં રૂ. 3,000નો મોટો વધારો

બજારના જાણકારો મુજબ, 99.9% શુદ્ધતા ધરાવતા સોનાની કિંમતમાં ગુરુવારના બંધ ભાવની સરખામણીએ સીધો રૂ. 3,000નો ઉછાળો આવ્યો છે. ગુરુવારે સોનું રૂ. 1,53,900 પ્રતિ 10 ગ્રામ પર બંધ રહ્યું હતું, જે હવે વધીને રૂ. 1,56,900 પ્રતિ 10 ગ્રામ (તમામ ટેક્સ સહિત)ના ઐતિહાસિક સ્તરે પહોંચી ગયું છે.

આ પણ વાંચો: સેન્સેકસમાં 1695, નિફટીમાં 461 પોઇન્ટનો ઉછાળો

ચાંદીમાં રૂ. 10,000નો વધારો

સોનાની સાથે-સાથે ચાંદીના ભાવમાં પણ રોકેટ ગતિએ વધારો થયો છે. ચાંદીની કિંમતમાં એક જ ઝાટકે રૂ. 10,000નો તોતિંગ વધારો નોંધાયો છે. આ આક્રમક તેજી સાથે ચાંદીનો ભાવ રૂ. 2,55,700 પ્રતિ કિલોગ્રામ (તમામ ટેક્સ સહિત) પર પહોંચી ગયો છે. ઉલ્લેખનીય છે કે, છેલ્લા ટ્રેડિંગ સેશનમાં ચાંદી રૂ. 2,45,700 પ્રતિ કિલોગ્રામ પર બંધ રહી હતી.