વિશ્વબજારમાં ઊંચા મથાળે પ્રોફિટ બુકિંગ પાછળ સોના-ચાંદીમાં આગેકૂચ અટકી
મુંબઈ : અમેરિકામાં શટડાઉનની ચિંતા તથા ઊંચા મથાળે પ્રોફિટ બુકિંગને પરિણામે વૈશ્વિક સોનાચાંદીમાં મંગળવારે પીછેહઠ આવી હતી, જેને પગલે ઘરઆંગણે પણ ભાવમાં આગેકૂચ અટકી નરમાઈ જોવા મળી હતી. જો કે અમેરિકન ફેડરલ રિઝર્વ દ્વારા વ્યાજ દરમાં કપાત લગભગ નિશ્ચિત હોવાથી ઘટાડો સીમિત રહ્યો હતો. ક્રુડ ઓઈલનો પૂરવઠો વધવાની શકયતાએ ભાવમાં ઘટાડો ચાલુ રહ્યો હતો.
ઘરઆંગણે મુંબઈ ઝવેરી બજારમાં ૯૯.૯૦ દસ ગ્રામ સોનાના જીએસટી વગરના ભાવ સોમવારની સરખામણીએ સાધારણ ઘટી રૂપિયા ૧૧૫૩૪૯ મુકાતા હતા. જીએેસટી સાથે ભાવ ત્રણ ટકા ઊંચા મુકાતા હતા. ૯૯.૫૦ સોનાના દસ ગ્રામના જીએસટી વગરના ભાવ રૂપિયા ૧૧૪૮૮૭ બોલાતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગરના ભાવ રૂપિયા ૧,૪૨,૪૩૪ મુકાતા હતા. સોમવારની સરખામણીએ ભાવમાં રૂપિયા ૨૦૦૦નો ઘટાડો જોવાયો હતો.
અમદાવાદ સોનુ ૯૯.૯૦ પ્રતિ દસ ગ્રામ ૧,૧૯,૫૦૦ સ્થિર રહ્યા હતા. ૯૯.૫૦ સોનાના દસ ગ્રામના ભાવ રૂપિયા ૧,૧૯,૨૦૦ મુકાતા હતા. ચાંદી .૯૯૯ એક કિલોના રૂપિયા ૧,૪૫,૦૦૦ મુકાતા હતા.
વિશ્વ બજારમાં કિંમતી ધાતુમાં નફા બુકિંગે ભાવમાં પીછેહઠ જોવા મળી હતી. અમેરિકામાં શટડાઉનની ચિંતાએ પણ ટ્રેડરોનું માનસ ખરડાયું હતું. સોનુ પ્રતિ ઔંસ ૨૦ ડોલર જેટલુ ઘટી ૩૮૧૨ ડોલર જ્યારે ચાંદી ઔંસ દીઠ ૪૬ ડોલરની અંદર ઊતરી ૪૫.૮૧ ડોલર જોવાઈ હતી. અન્ય કિંમતી ધાતુ પ્લેટિનમ તથા પેલેડિયમમાં મોટો કડાકો જોવાયો હતો. પ્લેટિનમ ૫૦ ડોલર ઘટી ૧૫૫૨ ડોલર જ્યારે પેલેડિયમ ૩૦ ડોલર ઘટી ૧૨૩૭ ડોલર કવોટ થતું હતું.
ઓપેક તથા સાથી દેશો દ્વારા નવેમ્બરથી ઉત્પાદન વધારવાની યોજના તથા ઈરાનના કુર્દિસ્તાન ખાતેથી અઢી વર્ષના ગાળા બાદ ક્રુડ તેલની નિકાસ શરૂ થતા ભાવ પર દબાણ ચાલુ રહ્યું હતું. નાયમેકસ ડબ્લ્યુટીઆઈ પ્રતિ બેરલ ૬૨.૭૦ ડોલર જ્યારે આઈસીઈ બ્રેન્ટ ક્રુડ ઓઈલ મોડી સાંજે પ્રતિ બેરલ ૬૭.૨૭ ડોલર મુકાતું હતું.
