વિશ્વ બજારમાં મજબૂતાઈને પગલે ઉંચા મથાળે જળવાતા સોનાચાંદી
મુંબઈ : ગાંધી જયંતિ નિમિત્તે મુંબઈ ઝવેરી બજાર સત્તાવાર બંધ રહ્યું હતું પરંતુ વિશ્વ બજાર પાછળ મુંબઈમાં બંધ બજારે ખાનગીમાં ભાવ મક્કમ જળવાઈ રહ્યા હતા. અમદાવાદમાં પણ ભાવ ઊંચા બોલાતા હતા. અમેરિકામાં શટડાઉન સ્થિતિ ઉપરાંત ભૌગોલિકરાજકીય તાણ વચ્ચે વૈશ્વિક સોનાચાંદીમાં ભાવમાં મજબૂતાઈ જોવા મળી રહી છે. સેફ હેવન તરીકે સોનામાં ટ્રેડરોનું આકર્ષણ જળવાઈ રહ્યું છે.
મુંબઈ ઝવેરી બજાર ગાંધી જયંતિ નિમિત્તે બંધ રહ્યું હતું પરંતુ ખાનગીમાં સોનાચાંદીમાં મક્કમતા જળવાઈ રહી હતી. ઊંચા ભાવને પગલે ગુરુવારે દશેરાના દિવસે રિટેલમાં ઘરાકી પાંખી રહી હોવાનું બજારના વર્તુળોએ જણાવ્યું હતું.
મુંબઈ સોનુ ૯૯.૯૦ પ્રતિ દસ ગ્રામ જીએસટી વગર રૂપિયા ૧,૧૭,૫૫૫ આસપાસ મુકાતુ હતું. જીએસટી સાથે ભાવ રૂપિયા ૧,૨૧,૦૮૩ બોલાતા હતા. ૯૯.૫૦ના દસ ગ્રામના જીએસટી વગરના ભાવ રૂપિયા ૧,૧૭,૦૫૫ બોલાતા હતા. ચાંદી .૯૯૯ એક કિલોના જીએસટી વગર રૂપિયા ૧,૪૬,૦૦૦ બોલાતા હતા.
અમદાવાદ બજારમાં સોનું ૯૯.૯૦ પ્રતિ દસ ગ્રામના રૂપિયા ૧૨૧૭૦૦ જ્યારે ૯૯.૫૦ના દસ ગ્રામ દીઠ ભાવ રૂપિયા ૧,૨૧,૪૦૦ મુકાતા હતા. ચાંદી .૯૯૯ એક કિલોના રૂપિયા ૧,૪૮,૫૦૦ કવોટ થતા હતા.
વિશ્વ બજારમાં સોનુ પ્રતિ ઔંસ ૩૮૯૦ ડોલર જ્યારે ચાંદી ઔંસ દીઠ ૪૭.૯૭ ડોલર કવોટ થતી હતી. અન્ય કિંમતી ધાતુ પ્લેટિનમ ઔંસ દીઠ ૧૫૮૮ ડોલર જ્યારે પેલેડિયમ પ્રતિ ઔંસ ૧૨૫૯ ડોલર મુકાતુ હતું. ડોલરમાં નબળાઈ તથા નબળા આર્થિક ડેટા ઉપરાંત શટડાઉનને કારણે અમેરિકામાં ઊભી થયેલી રાજકીય અનિશ્ચિતતાએ વૈશ્વિક સોનાના ભાવને ટેકો આપ્યો છે.
નાયમેકસ ડબ્લ્યુટીઆઈ પ્રતિ બેરલ ૬૧.૧૭ ડોલર જ્યારે આઈસીઈ બ્રેન્ટ ક્રુડ ઓઈલ મોડી સાંજે પ્રતિ બેરલ ૬૫ડોલરની અંદર ઊતરી ૬૪.૭૭ ડોલર મુકાતું હતું. વિશ્વ બજારમાં ક્રુડ તેલના પૂરવઠામાં વધારો થવાની ધારણાંએ ભાવ દબાણ હેઠળ આવી ગયા છે.
