અમેરિકા, જાપાનની મધ્યસ્થ બેંકોની બેઠક પહેલા વૈશ્વિક બજારોમાં વેચવાલી

ક્રૂડના ઊંચા ભાવ, પશ્ચિમ એશિયામાં તણાવની અસર
અમદાવાદ : સોમવારે વૈશ્વિક બજારોમાં ભારે વેચવાલી જોવા મળી હતી. અમેરિકાથી જાપાન સુધીના બજારોમાં ઘટાડો જોવા મળ્યો હતો, જ્યારે ભારતીય શેરબજારો આજે (૧૪ સપ્ટેમ્બર) ગણેશ ચતુર્થી નિમિત્તે બંધ રહ્યા હતા.
હકીકતમાં, ક્રૂડ ઓઇલના ઊંચા ભાવે વૈશ્વિક બજારો પર દબાણ આવ્યું, જે પ્રતિ બેરલ ૧૦૯ ડોલરની નજીક ટ્રેડ કરી રહ્યા છે.
પશ્ચિમ એશિયામાં ચાલી રહેલા તણાવને કારણે ક્રૂડ ઓઇલના ભાવમાં વધારો થયો છે. રોકાણકારો આ અઠવાડિયે જાપાની અને અમેરિકન મધ્યસ્થ બેંકોની બેઠક પર પણ નજર રાખી રહ્યા છે, જ્યાં વ્યાજ દરમાં વધારો થવાની ધારણા છે.
ક્રૂડ ઓઇલના ભાવમાં મજબૂતીથી વિશ્વભરના શેરબજારો પર દબાણ આવ્યું હતું. સોમવારે યુએસ ફ્યુચર્સ બજારો નબળા ખુલ્યા હતા. શરૂઆતના ટ્રેડિંગમાં, S&P ૫૦૦ ફ્યુચર્સ લગભગ ૦.૮ ટકા, નાસડેક ફ્યુચર્સ ૧.૮ ટકા અને ડાઉ ફ્યુચર્સ ૧૩૦ પોઈન્ટથી વધુ ઘટયા હતા. યુરોપિયન બજારોમાં મુખ્ય સૂચકાંકો પણ લગભગ અડધા ટકા ઘટયા હતા. જોકે, ફીટસી વધારા સાથે ટ્રેડ કરી રહ્યો હતો.
સોમવારે જાપાનનો નિક્કી ૦.૮૧ ટકા ઘટીને બંધ થયો હતો. કોરિયાનો કોસ્પી ઇન્ડેક્સ લગભગ ૩.૨૬ ટકા ઘટયો હતો. ઓસ્ટ્રેલિયન બજારોમાં થોડો વધારો નોંધાયો હતો. જ્યારે ચીની બજારો અડધા ટકાથી વધુ નબળા પડયા હતા. મોડી સાંજે ડાઉ જોન્સમાં ૨૩૫ અને નાસડેકમાં ૨૬૦ પોઇન્ટનો ઘટાડો નધાયો હતો.
આ અઠવાડિયે, સમગ્ર વિશ્વ યુએસ ફેડરલ રિઝર્વના વ્યાજ દરો અંગેના નિર્ણય પર ધ્યાન કેન્દ્રિત કરશે. ફેડનું ભાવિ વલણ બજાર માટે નિર્ણાયક રહેશે. વધુમાં, યુએસ અને ઈરાન વચ્ચે વધતા તણાવ અને બ્રેન્ટ ક્રૂડ તેલની હિલચાલ પણ મહત્વપૂર્ણ ભૂમિકા ભજવશે.
બંધ રહેલા બજારો
આજે ગણેશ ચતુર્થી પર્વને અનુલક્ષીને મુંબઈ શેરબજાર તેમજ નેશનલ સ્ટોક એક્સચેન્જ સત્તાવાર બંધ રહ્યા હતા. આ ઉપરાંત આજે કોમોડિટી એક્સચેન્જ, વિદેશી હૂંડિયામણ બજાર તેમજ મુંબઈ સોના-ચાંદી, તેલીબીયા સહિત અન્ય આગેવાન બજારો બંધ રહ્યા હતા. આજે ગુજરાતના વિવિધ જિલ્લાના આગેવાન માર્કેટયાર્ડો પણ બંધ રહ્યા હતા.