જૂનમાં મહિલા બેરોજગારી દર 15 મહિનાના ઉચ્ચ સ્તરે પહોંચ્યો

નવી પદ્ધતિ અપનાવવામાં આવી ત્યારથી આ સૌથી વધુ બેરોજગારી દર
અમદાવાદ : રાષ્ટ્રીય આંકડાકીય કાર્યાલય દ્વારા જાહેર કરાયેલા પિરિયોડિક લેબર ફોર્સ સર્વેના નવીનતમ માસિક બુલેટિન મુજબ, ભારતમાં મહિલા બેરોજગારી દર જૂનમાં વધીને ૧૫ મહિનાના ઉચ્ચ સ્તરે ૫.૯ ટકા થયો છે, જે મે મહિનામાં ૫.૬ ટકા હતો. લેબર ફોર્સ દ્વારા ડેટા સંગ્રહ માટે નવી પદ્ધતિ અપનાવવામાં આવી ત્યારથી આ સૌથી વધુ બેરોજગારી દર છે.
છેલ્લા પાંચ મહિનામાંથી ચાર મહિનામાં મહિલા બેરોજગારી દરમાં વધારો થયો છે. ફેબુ્રઆરીમાં તે ૫.૧ ટકા હતો અને જૂનમાં વધીને ૫.૯ ટકા થયો છે. આ દર એપ્રિલ ૨૦૨૫ (વર્તમાન માસિક શ્રેણીનો પ્રથમ મહિનો) માં નોંધાયેલા ૫ ટકાના સ્તરથી ઘણો ઉપર છે. જૂન મહિનામાં ગ્રામીણ મહિલા બેરોજગારી દર પણ વધીને ૫ ટકાના નવા સિરીઝ ઉચ્ચ સ્તરે પહોંચ્યો, જે એપ્રિલ ૨૦૨૫ પછીનો સૌથી ઉચ્ચ સ્તર છે. મે મહિનામાં ગ્રામીણ મહિલા બેરોજગારી દર ૪.૭ ટકા હતો. મહિલાઓ માટે શહેરી બેરોજગારી દર ઊંચો રહ્યો છે, જે મે મહિનામાં ૮.૨ ટકાથી વધીને જૂનમાં ૮.૪ ટકા થયો છે.
મહિના દરમિયાન એકંદર બેરોજગારી દર ૫.૫ ટકા પર સ્થિર રહ્યો, જે મે મહિનામાં નોંધાયેલા ૧૧ મહિનાના ઉચ્ચ સ્તર સમાન છે. શ્રમ બળ ભાગીદારી દર, જે કામ કરતી અથવા સક્રિય રીતે કામ શોધતી વસ્તીનું પ્રમાણ છે, તે જૂનમાં ૫૪.૪ ટકા પર સ્થિર રહ્યો હતો. મે સુધી સતત ત્રણ મહિના સુધી તેમાં ઘટાડો થયો હતો, પરંતુ તે મેના સ્તરે રહ્યો. ગ્રામીણ વિસ્તારોમાં શ્રમ બળ ભાગીદારી દર આ મહિને ૫૬.૬ ટકા પર સ્થિર રહ્યો, જ્યારે શહેરી વિસ્તારોમાં તે મે મહિનામાં ૪૯.૮ ટકાથી વધીને ૫૦.૧ ટકા થયો. મહિલાઓમાં બેરોજગારી એવા સમયે વધી જ્યારે જૂનમાં મહિલાઓ માટે શ્રમ બળ ભાગીદારી દર ૩૨.૭ ટકા પર સ્થિર રહ્યો હતો.