અમદાવાદ : પશ્ચિમ એશિયાઈ કટોકટીને કારણે પેટ્રોલ અને ડીઝલના ભાવમાં વધારો ભારતમાં ઇલેક્ટ્રિક વાહન (ઈવી) વેચાણને વેગ આપી રહ્યો છે. ઓટો ડીલર્સ એસોસિએશન, ફાડા એ જણાવ્યું હતું કે મે મહિનામાં તમામ વાહન શ્રેણીઓમાં ઇવીનો હિસ્સો ૧૧% ની સર્વકાલીન ઉચ્ચતમ સપાટીએ પહોંચ્યો છે. સમગ્ર નાણાકીય વર્ષ ૨૦૨૫-૨૬ માટે, આ આંકડો લગભગ ૭% હતો.
આ વલણ એવા સમયે આવ્યું છે જ્યારે પેસેન્જર વાહનો, થ્રી-વ્હીલર્સ અને ટ્રેક્ટર સહિત તમામ શ્રેણીઓમાં મે મહિનામાં રિટેલ વેચાણના આંકડા પ્રભાવશાળી હતા. પશ્ચિમ એશિયાઈ સંઘર્ષ સંબંધિત ચિંતાઓ હોવા છતાં, વેચાણ એક વર્ષ પહેલાના સમાન સમયગાળાની તુલનામાં ૧૦% વધીને ૨૫.૩ લાખ યુનિટ થયું હતું.
૧૫ મેથી ઇંધણના ભાવમાં પ્રતિ લિટર લગભગ ૭.૫ રૂપિયાનો વધારો થયો છે, કારણ કે પુરવઠાની ચિંતાઓને કારણે વૈશ્વિક ક્રૂડ ઓઇલના ભાવમાં વધારો થયો છે. ઇંધણના ભાવમાં વધારો થવાને કારણે, મે મહિનામાં ઈવી તરફનું ખરીદી વલણ ૧૧%થી વધુ વધ્યું છે, જે નાણાકીય વર્ષ ૨૦૨૬ માં ૭% હતું.
ટુ-વ્હીલર શ્રેણીમાં ઈવીનો હિસ્સો એક વર્ષ પહેલા ૬.૧૧% થી વધીને ૯.૨૫% થયો છે. થ્રી-વ્હીલર શ્રેણીમાં ઈવીનો હિસ્સો મે ૨૦૨૫ માં ૬૧.૪૬% થી વધીને આ વર્ષે મે મહિનામાં ૬૪.૪૫% થયો હતો. પેસેન્જર વાહન શ્રેણીમાં ઈવી નો હિસ્સો ૪.૫૧% થી વધીને ૬.૬૩% અને કોમર્શિયલ વાહન શ્રેણીમાં ૧.૩૭% થી વધીને ૨.૮૬% થયો છે.
સૂચિત માસ દરમિયાન, પેસેન્જર વાહનોના વેચાણમાં ૨૩%, ટ્રેક્ટરમાં ૧૧%, ટુ-વ્હીલરમાં ૮%, કોમર્શિયલ વાહનોમાં ૫% અને થ્રી-વ્હીલરમાં ૪% નો વધારો થયો હતો.
રિટેલ પેસેન્જર વાહનોનું વેચાણ ૨૩% વધીને ૪૦૨,૫૯૧ યુનિટ થયું હતું, જે ગ્રામીણ વિસ્તારોમાં રિકવરી જાળવી રાખે છે. શહેરી બજારોમાં ૧૯% વૃદ્ધિની સરખામણીમાં ગ્રામીણ બજારોમાં ૩૦% વધારો જોવા મળ્યો હતો.
મે મહિનામાં વૈકલ્પિક ઇંધણનો હિસ્સો વધીને ૩૮% થયો છે. જેમાં સીએનજીનો હિસ્સો ૨૩% અને ઈવીનો હિસ્સો ૭% થયો છે. ડીલરોએ નાની કારના વેચાણમાં સુધારો અને એસયુવીની માંગમાં સતત વધારો દર્શાવ્યો છે.ધ
મે મહિનામાં ટુ-વ્હીલરનું રિટેલ વેચાણ કુલ ૧૮.૪ લાખ વાહનો થયું છે., જે એક વર્ષ પહેલાના સમાન સમયગાળાની સરખામણીમાં ૮% વધુ છે. શહેરી વેચાણમાં ૧૨% અને ગ્રામીણ વેચાણમાં ૫% વધારો થયો હતો.
મે મહિનામાં કોમર્શિયલ વાહનોનું રિટેલ વેચાણ ૫% વધીને ૮૩,૮૨૩ વાહનો થયું હતું. ગ્રામીણ બજારમાં ૮ ટકાનો વધારો થયો હતો, જે શહેરી બજારના ૨.૬૨ ટકાના વિકાસ કરતાં વધુ હતો. ટ્રેક્ટરનું વેચાણ પણ એક વર્ષ પહેલાના સમાન સમયગાળાની તુલનામાં ૧૧ ટકા વધીને ૮૩,૦૯૨ ટ્રેક્ટર થયું હતું.
