ગુડ ન્યૂઝ : EPFO મોટા ફેરફારની તૈયારીમાં, કર્મચારી આ રીતે તાત્કાલિક ઉપાડી શકશે PFની રકમ

EPFO BHIM App withdrawal: કર્મચારી ભવિષ્ય નિધિ સંગઠન(EPFO)ના સભ્યો માટે એક મોટી ડિજિટલ સુવિધા આવી રહી છે, જેનાથી ભવિષ્ય નિધિ(PF)માંથી પૈસા ઉપાડવાનું વધુ સરળ અને ઝડપી બનશે. EPFO ટૂંક સમયમાં BHIM UPI એપ દ્વારા તાત્કાલિક એડવાન્સ ઉપાડ(Instant Advance Withdrawal)ની સુવિધા શરૂ કરવા જઈ રહ્યું છે. આનાથી દેશના 30 કરોડથી વધુ EPFO સભ્યોને ફાયદો થશે અને માનવામાં આવી રહ્યું છે કે આ સુવિધા આગામી 2-3 મહિનામાં શરૂ થઈ શકે છે. આ સિસ્ટમ મહદઅંશે ATMમાંથી પૈસા ઉપાડવા જેવી હશે, એટલે કે જરૂર પડ્યે તરત જ PFમાંથી પૈસા મળી શકશે.

શું છે નવી વ્યવસ્થા?

આ નવી વ્યવસ્થા માટે, EPFOએ નેશનલ પેમેન્ટ્સ કોર્પોરેશન ઓફ ઈન્ડિયા(NPCI) સાથે ભાગીદારી કરી છે. BHIM એપ પર, EPFO સભ્યો આરોગ્ય, શિક્ષણ, લગ્ન અથવા અન્ય કોઈ ખાસ પરિસ્થિતિ જેવી મંજૂર કરાયેલી કેટેગરીમાં PF એડવાન્સ માટે દાવો કરી શકશે. દાવો દાખલ થતાં જ, EPFOની બેકએન્ડ સિસ્ટમ તેની ચકાસણી અને વેરિફિકેશન કરશે. બધું બરાબર જણાય તો, મંજૂર થયેલી રકમ સીધી SBI દ્વારા સભ્યના UPI સાથે જોડાયેલા બેન્ક ખાતામાં તરત જ ટ્રાન્સફર કરી દેવામાં આવશે. શરૂઆતમાં આ સુવિધા માત્ર BHIM એપ પર જ ઉપલબ્ધ થશે, પરંતુ ભવિષ્યમાં તેને અન્ય UPI-આધારિત ફિનટેક એપ્સ પર પણ શરૂ કરી શકાય છે.

ઉપાડ પર લાગી શકે છે મર્યાદા

જોકે, આ સુવિધામાં ઉપાડની રકમ પર કેટલીક મર્યાદાઓ પણ લાગુ થઈ શકે છે. અધિકારીઓના જણાવ્યા મુજબ, શરૂઆતમાં સંપૂર્ણ PF રકમ ઉપાડવાની મંજૂરી આપવામાં આવશે નહીં. ભારતીય રિઝર્વ બેન્ક(RBI) દ્વારા UPI ટ્રાન્ઝેક્શન પર નક્કી કરાયેલી મર્યાદાઓને ધ્યાનમાં રાખીને, ઇન્સ્ટન્ટ ઉપાડની મર્યાદા નક્કી કરવામાં આવશે જેથી તેનો કોઈ દુરુપયોગ ન થાય. હાલમાં, મહત્તમ કેટલી રકમ તરત ઉપાડી શકાશે તે નક્કી થયું નથી, પરંતુ EPFO તેના પર વિચાર કરી રહ્યું છે.

આ પણ વાંચો: સેન્સેક્સ 780, નિફટી 263 પોઈન્ટ તૂટયાં: રોકાણકારોના 7.7 લાખ કરોડ સાફ

હાલમાં શું છે પ્રક્રિયા?

હાલમાં, PF ઉપાડવાની પ્રક્રિયામાં ઘણો સમય લાગે છે. જો કોઈ સભ્ય ઓટો-મોડ હેઠળ ₹5 લાખ સુધીના ઓનલાઈન એડવાન્સ માટે દાવો કરે છે, તો પણ તેને ઓછામાં ઓછા 3 કામકાજી દિવસો લાગી જાય છે. વધુ રકમના દાવા અથવા મેન્યુઅલ પ્રક્રિયામાં આનાથી પણ વધુ સમય લાગે છે. આવી સ્થિતિમાં, BHIM એપ દ્વારા તાત્કાલિક PF ઉપાડની સુવિધા લાખો કર્મચારીઓ માટે, ખાસ કરીને કટોકટીની જરૂરિયાતો સમયે, મોટા રાહતના સમાચાર છે. આ પગલું EPFOને વધુ ડિજિટલ, ઝડપી અને યુઝર-ફ્રેન્ડલી બનાવવાની દિશામાં એક મોટો ફેરફાર માનવામાં આવે છે.