Sun Pharma Organon Deal: ભારતની સૌથી મોટી ફાર્માસ્યુટિકલ કંપની સન ફાર્માસ્યુટિકલ ઇન્ડસ્ટ્રીઝે મોટી જાહેરાત કરી છે. સન ફાર્મા અમેરિકાની જાણીતી ડ્રગમેકર કંપની ઓર્ગેનન એન્ડ કો. ને અંદાજે 11.75 બિલિયન ડોલર (અંદાજે 1.10 લાખ કરોડ રૂપિયા) માં ખરીદવા જઈ રહી છે. આ સોદો ભારતીય ફાર્માસ્યુટિકલ ઇતિહાસમાં અત્યાર સુધીનું સૌથી મોટું વિદેશી સંપાદન સાબિત થશે.
ભારતના ફાર્માસ્યુટિકલ ઇતિહાસમાં સૌથી મોટું વિદેશી સંપાદન
સન ફાર્મા આ ઓલ-કેશ ડીલ હેઠળ ઓર્ગેનનના દરેક શેર માટે 14 ડોલરની ચુકવણી કરશે. આ કિંમત 24 એપ્રિલના ક્લોઝિંગ ભાવ કરતા 24% થી વધુ પ્રીમિયમ દર્શાવે છે. 31 ડિસેમ્બર, 2025 ના રોજ ઓર્ગેનન પર અંદાજે 8.6 બિલિયન ડોલર (આશરે રૂ. 81,029 કરોડ)નું દેવું હતું, જેની જવાબદારી હવે સન ફાર્માની રહેશે. સન ફાર્મા પર માત્ર 198.4 મિલિયન ડોલરનું દેવું છે અને તેનો નફો 1.16 બિલિયન ડોલર (આશરે રૂ. 10,929 કરોડ) નો નોંધાયો હતો.
140થી વધુ દેશોમાં વેચાય છે ઓર્ગેનનની દવાઓ
સન ફાર્મા હાલમાં સ્પેશિયાલિટી મેડિસિન જેવી કે ડર્મેટોલોજી (ત્વચા), ઓન્કોલોજી (કેન્સર) અને ઓબેસિટી (મેદસ્વિતા) જેવી બિમારીની દવાઓમાં પકડ મજબૂત કરી રહી છે. અમેરિકામાં બદલાતી ટેરિફ નીતિઓને કારણે ભારતીય કંપનીઓના માર્જિન પર દબાણ છે, ત્યારે આ સોદો સન ફાર્માને વૈશ્વિક સ્તરે મોટું પ્લેટફોર્મ પૂરું પાડશે. નિષ્ણાતોના મતે, આ સોદાથી સન ફાર્માને ચીન, બ્રાઝિલ અને અન્ય ઉભરતા દેશોના બજારોમાં સીધો પ્રવેશ મળશે. ઓર્ગેનન પાસે મહિલા સ્વાસ્થ્ય અને જનરલ મેડિસિનનો વિશાળ પોર્ટફોલિયો છે, જે 140થી વધુ દેશોમાં વેચાય છે. આ ઉપરાંત, સન ફાર્મા હવે બાયોસિમિલર્સના ક્ષેત્રમાં પણ એન્ટ્રી કરશે.
આ સમાચાર આવતાની સાથે જ શેરબજારમાં સન ફાર્માના શેરમાં ભારે ઉછાળો જોવા મળ્યો હતો. કંપનીના શેર 8.5% સુધી વધ્યા હતા, જે ઓગસ્ટ 2021 પછીનો સૌથી મોટો એક દિવસીય ઉછાળો છે. હાલમાં સન ફાર્માનું માર્કેટ વેલ્યુએશન 40 બિલિયન ડોલરથી પણ વધારે છે.
